ಮಲ್ಪೆ: 5 ದಿನದ ಅಂತರದಲ್ಲಿ ಒಂದೇ ಮನೆಯ ಇಬ್ಬರು ಮಕ್ಕಳ ಸಾವು

ಮಲ್ಪೆ: ಇಲ್ಲಿನ ಬೈಲಕರೆ ಸಮೀಪದ ಸುಮಯ್ಯ ಭಾನು ಎಂಬವರ ಇಬ್ಬರು ಮಕ್ಕಳು 5 ದಿನಗಳ ಅಂತರದಲ್ಲಿ ಸಾವಿಗೀಡಾದ ಹೃದಯ ವಿದ್ರಾವಕ ಘಟನೆ ನಡೆದಿದೆ.

ಎ. 6ರಂದು ಮಧ್ಯರಾತ್ರಿ ವೇಳೆ ಸುಮಯ್ಯ ಅವರ ಎರಡು ತಿಂಗಳ ಗಂಡು ಮಗು ಸವುದ್‌ ನ್ಯೂಮೋನಿಯಾನಿಂದ ಮೃತಪಟ್ಟಿರುವುದಾಗಿ ಮಲ್ಪೆ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿತ್ತು. ಬಳಿಕ ಎ.10ರಂದು ರಾತ್ರಿ ವೇಳೆ ಎರಡನೆ ಮಗಳು ಆಯಿಷಾ ಎಂಬಾಕೆ ಮನೆಯಲ್ಲಿ ನೀರು ತುಂಬಿದ್ದ ಬಕೆಟ್‌ನಲ್ಲಿ ಮೃತಪಟ್ಟಿದ್ದಾಳೆ ಎಂದು ದೂರು ದಾಖಲಾಗಿದೆ.

ಎರಡು ಮೃತದೇಹಗಳ ಮರಣೋತ್ತರ ಪರೀಕ್ಷೆ ನಡೆಸಲಾಗಿದ್ದು, ಮಾದರಿಯನ್ನು ವಿಧಿ ವಿಜ್ಞಾನ ಪ್ರಯೋಗಾಲಯಕ್ಕೂ ಕಳುಹಿಸಲಾಗಿದೆ. ತನಿಖೆ ಮುಂದುವರಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.