Malaysia Super 1000; ಸಾತ್ವಿಕ್‌-ಚಿರಾಗ್‌ ಕ್ವಾರ್ಟರ್‌ಫೈನಲಿಗೆ

ಕೌಲಾಲಂಪುರ: ಭಾರತದ ಸ್ಟಾರ್‌ ಡಬಲ್ಸ್‌ ಆಟಗಾರರಾದ ಸಾತ್ವಿಕ್‌ಸಾಯಿರಾಜ್‌ ರಾಂಕಿರೆಡ್ಡಿ ಮತ್ತು ಚಿರಾಗ್‌ ಶೆಟ್ಟಿ ಅವರು ಮಲೇಷ್ಯಾ ಸೂಪರ್‌ 1000 ಬ್ಯಾಡ್ಮಿಂಟನ್‌ ಕೂಟದಲ್ಲಿ ಕ್ವಾರ್ಟರ್‌ಫೈನಲ್‌ ಹಂತಕ್ಕೇರಿದ್ದಾರೆ. ಇದೇ ವೇಳೆ ಸಿಂಗಲ್ಸ್‌ನಲ್ಲಿ ಎಚ್‌. ಎಸ್‌. ಪ್ರಣಯ್‌ ಅವರ ಹೋರಾಟ ದ್ವಿತೀಯ ಸುತ್ತಿನಲ್ಲಿ ಅಂತ್ಯಗೊಂಡಿದೆ.

ಸಾತ್ವಿಕ್‌-ಚಿರಾಗ್‌ ಅವರು ಮಲೇಷ್ಯದ ಎನ್‌ ಅಜ್ರಿನ್‌ ಮತ್ತು ತಾಸ್‌ ಡಬ್ಲ್ಯುಕೆ ಅವರನ್ನು 21-15, 21-15 ಗೇಮ್‌ಗಳಿಂದ ಉರುಳಿಸಿದರು. ಕ್ವಾರ್ಟರ್‌ಫೈನಲ್‌ನಲ್ಲಿ ಅವರು ಸ್ಥಳೀಯ ಫೇವರಿಟ್‌ ಯೆ ಸಿನ್‌ ಆಂಗ್‌ ಮತ್ತು ಇ ಯಿ ತೆಯೊ ಅವರನ್ನು ಎದುರಿಸಲಿದ್ದಾರೆ. ವರ್ಷದ ಆರಂಭದಲ್ಲಿಯೇ ನಮ್ಮ ಹೋರಾಟ ಉತ್ತಮವಾಗಿ ಸಾಗಿರುವುದು ಖುಷಿ ನೀಡಿದೆ. ಕೂಟದಲ್ಲಿ ಶ್ರೇಷ್ಠ ನಿರ್ವಹಣೆ ನೀಡಲು ಪ್ರಯತ್ನಿಸಲಿದ್ದೇವೆ ಎಂದು ಚಿರಾಗ್‌ ಹೇಳಿದ್ದಾರೆ.

ಸಿಂಗಲ್ಸ್‌ನಲ್ಲಿ ಪ್ರಣಯ್‌ ಚೀನದ ಲಿ ಶಿ ಫೆಂಗ್‌ ಅವರ ವಿರುದ್ದ ದ್ವಿತೀಯ ಸುತ್ತಿನಲ್ಲಿ 8-21, 21-15, 21-23 ಗೇಮ್‌ಗಳಿಂದ ವೀರೋಚಿತವಾಗಿ ಸೋಲನ್ನು ಕಂಡರು.ಭಾರತದ ಮಾಳವಿಕಾ ಬನ್ಸೋಡ್‌ ಚೀನದ ಹ್ಯಾನ್‌ ಯೂಯಿ ಅವರೆದುರು 18-21, 11-21 ಗೇಮ್‌ಗಳಿಂದ ಸೋತು ನಿರಾಶೆ ಅನುಭವಿಸಿದರು. ಡಬಲ್ಸ್‌ನಲ್ಲಿ ಟ್ರೀಸಾ ಜಾಲಿ ಮತ್ತು ಗಾಯತ್ರಿ ಗೋಪಿಚಂದ್‌ ಕೂಡ ಸೋತರು.