ಹೈದರಾಬಾದ್: ಮಾಲಿವುಡ್‌ ನಟ ಫಾಹದ್‌ ಫಾಸಿಲ್ ಭಾರತೀಯ ಚಿತ್ರರಂಗದಲ್ಲಿ ಬಹುಬೇಡಿಕೆಯ ನಟರಲ್ಲಿ ಒಬ್ಬರು. ಮಲಯಾಳಂ ಮಾತ್ರವಲ್ಲದೆ, ಬಹುಭಾಷೆಯಲ್ಲೂ ಅವರು ಜನಪ್ರಿಯತೆಯನ್ನು ಪಡೆದುಕೊಂಡಿದ್ದಾರೆ. ಇದುವರೆಗೆ ಯಾವ ವಿವಾದವನ್ನೂ ಮೈಮೇಲೆ ಹಾಕಿಕೊಳ್ಳದ ಫಾಹದ್‌ ಈಗ ಟೈಟಲ್‌ ವಿವಾದವೊಂದರಲ್ಲಿ ಸಿಲುಕಿದ್ದಾರೆ.
ಟಾಲಿವುಡ್‌ ನ ʼಪುಷ್ಪʼ ಸಿನಿಮಾದಲ್ಲಿ ಪೊಲೀಸ್‌ ಇನ್ಸ್‌ ಪೆಕ್ಟರ್‌ ಆಗಿ ನೋಡುಗರನ್ನು ಸೆಳೆದ ಫಾಹದ್‌ ಸದ್ಯ ಟಾಲಿವುಡ್‌ ನಲ್ಲಿ ʼಟಾಪ್‌ ಗೇರ್‌ʼ ಮೂಲಕ ಪೂರ್ಣ ಪ್ರಮಾಣದ ಹೀರೋ ಆಗಲು ಹೊರಟಿದ್ದಾರೆ.
ಸುಧೀಶ್‌ ಶಂಕರ್‌ ನಿರ್ದೇಶನದ ʼಟಾಪ್‌ ಗೇರ್‌ʼ ಚಿತ್ರದ ಫಸ್ಟ್‌ ಲುಕ್‌ ಪೋಸ್ಟರ್‌ ಇತ್ತೀಚಿಗೆ ರಿಲೀಸ್‌ ಆಗಿದೆ. ಜೀಪಿನ ಮೇಲೆ ಘೋಷಣೆ ಕೂಗುವ ರೀತಿ ನಿಂತು ಕೊಂಡಿರುವ ಫಾಹದ್‌ ಲುಕ್‌ ವೈರಲ್ ಆಗಿದೆ. ಚಿತ್ರದ ಟೈಟಲ್‌ ಪೋಸ್ಟರ್‌ ರಿಲೀಸ್‌ ಆದ ಬೆನ್ನಲ್ಲೇ ವಿವಾದಕ್ಕೆ ಗುರಿಯಾಗಿದೆ.
ಟಾಲಿವುಡ್‌ ನಿರ್ಮಾಪಕ ಶ್ರೀಧರ್ ರೆಡ್ಡಿ ಫಾಹದ್‌ ಚಿತ್ರದ ಟೈಟಲ್‌ ವಿರುದ್ಧ ಗರಂ ಆಗಿದ್ದಾರೆ. ಈಗಾಗಲೇ ನಾವು ʼಟಾಪ್‌ ಗೇರ್‌ʼ ಚಿತ್ರದ ಟೈಟಲ್‌ ನ್ನು ನೋಂದಣಿ ಮಾಡಿಸಿದ್ದೇವೆ. ಚಿತ್ರದ ಶೂಟಿಂಗ್‌ ಮುಗಿದಿದೆ. ಅಂತಿಮ ಹಂತದ ಪೋಸ್ಟ್‌ ಪ್ರೂಡಕ್ಷನ್‌ ಕೆಲಸದಲ್ಲಿದ್ದೇವೆ ಎಂದಿದ್ದಾರೆ.
ಇದು ಸರಿಯಲ್ಲ. ಒಂದೇ ಟೈಟಲ್‌ ಇಟ್ಟಿರುವುದರಿಂದ ಪ್ರೇಕ್ಷಕರು ಗೊಂದಲಕ್ಕೆ ಒಳಗಾಗುವ ಸಾಧ್ಯತೆಗಳಿರುತ್ತವೆ. ಸಿನಿಮಾದ ನಿರ್ಮಾಪಕರು ಟೈಟಲ್‌ ಬದಲಾಯಿಸುತ್ತಾರೆ ಎನ್ನುವ ನಂಬಿಕೆಯಿದೆ ಎಂದು ಅವರು ಹೇಳಿದ್ದಾರೆ.
ಆದಿ ಸಾಯಿಕುಮಾರ್‌ ನಟನೆಯ ʼಟಾಪ್‌ ಗೇರ್‌ʼ ಚಿತ್ರವನ್ನು ಶಶಿಕಾಂತ್‌ ನಿರ್ದೇಶನ ಮಾಡುತ್ತಿದ್ದಾರೆ. ಚಿತ್ರದ ಫಸ್ಟ್‌ ಲುಕ್‌ ಪೋಸ್ಟರ್‌ ರಿಲೀಸ್‌ ಆಗಿದೆ.
ಫಾಹದ್‌ ಫಾಸಿಲ್ ಚಿತ್ರ ತಂಡ ಇದಕ್ಕೆ ಯಾವ ರೀತಿ ಪ್ರತಿಕ್ರಿಯೆ ನೀಡುತ್ತದೆ ಎನ್ನುವುದನ್ನು ಕಾದು ನೋಡಬೇಕಿದೆ.
