Advertisement
ಕೌಶಲ್‌ 135 ಎಸೆತಗಳಿಂದ ಈ ಬ್ಯಾಟಿಂಗ್‌ ಸಾಹಸ ಪ್ರದರ್ಶಿಸಿದರು. ಈ ಸಂದರ್ಭ 18 ಬೌಂಡರಿ ಹಾಗೂ 9 ಸಿಕ್ಸರ್‌ಗಳು ಸಿಡಿದವು. ಇದರೊಂದಿಗೆ ಮುಂಬಯಿ ಪರ ಅಜಿಂಕ್ಯ ರಹಾನೆ ಬಾರಿಸಿದ 187 ರನ್ನುಗಳ ದಾಖಲೆ ಪತನಗೊಂಡಿತು. ಅವರು 2007-08ರ ಋತುವಿನಲ್ಲಿ ಮಹಾರಾಷ್ಟ್ರ ವಿರುದ್ಧ ಈ ಸಾಧನೆಗೈದಿದ್ದರು.
“ನಾನು ದ್ವಿಶತಕದ ನಿರೀಕ್ಷೆಯಲ್ಲೇ ಇರಲಿಲ್ಲ. ಕೇವಲ 30 ರನ್‌ ಅಗತ್ಯವಿದ್ದಾಗ ನಾನು ಇದನ್ನು ಸಾಧಿಸಬಲ್ಲೆ ಎಂಬ ವಿಶ್ವಾಸ ಮೂಡಿತು. ಪೂರ್ತಿಗೊಂಡಾಗ ಬಹಳ ಖುಷಿಯಾಯಿತು. ಡ್ರೆಸ್ಸಿಂಗ್‌ ರೂಮಿಗೆ ಬಂದ ಬಳಿಕವೇ ಇದು ದಾಖಲೆ ಎಂಬುದು ನನಗೆ ತಿಳಿಯಿತು’ ಎಂದು 27ರ ಹರೆಯದ ಕೌಶಲ್‌ ಹೇಳಿದರು. ಇದೇ ಕೂಟದಲ್ಲಿ ಬಿಹಾರ್‌ ವಿರುದ್ಧ ಪದಾರ್ಪಣೆ ಮಾಡಿದ ಕೌಶಲ್‌, ಈಗಾಗಲೇ 7 ಪಂದ್ಯಗಳಿಂದ 3 ಶತಕ ಬಾರಿಸಿದ್ದಾರೆ. ಕೌಶಲ್‌ ತಮ್ಮ ಜತೆಗಾರ ವಿನೀತ್‌ ಸಕ್ಸೇನಾ ಜತೆಗೂಡಿ ಮೊದಲ ವಿಕೆಟಿಗೆ 296 ರನ್‌ ಪೇರಿಸಿದರು. ಈ ಸಂದರ್ಭದಲ್ಲಿ ದಿಲ್ಲಿ ಆರಂಭಿಕರಾದ ಶಿಖರ್‌ ಧವನ್‌-ಆಕಾಶ್‌ ಚೋಪ್ರಾ ಅವರ 277 ರನ್ನುಗಳ ಜತೆಯಾಟದ ದಾಖಲೆ ಪತನಗೊಂಡಿತು. ಇವರು 2007-08ರಲ್ಲಿ ಪಂಜಾಬ್‌ ವಿರುದ್ಧ ಈ ಸಾಧನೆಗೈದಿದ್ದರು. ವಿನೀತ್‌ ಸಕ್ಸೇನಾ ಗಳಿಕೆ 100 ರನ್‌. ಉತ್ತರಾಖಂಡ ಎರಡೇ ವಿಕೆಟಿಗೆ 366 ರನ್‌ ಪೇರಿಸಿದರೆ, ಸಿಕ್ಕಿಮ್‌ 6ಕ್ಕೆ 167 ರನ್‌ ಗಳಿಸಿ ಶರಣಾಯಿತು.