Maharashtra 10 ದಿನ ಕಳೆದರೂ ಬಗೆಹರಿಯದ ಸಿಎಂ ಆಯ್ಕೆ ಕಗ್ಗಂಟು; ಅಜಿತ್ ಪವಾರ್‌ ದೆಹಲಿಗೆ

ಮುಂಬೈ:ಮಹಾರಾಷ್ಟ್ರದ ಮುಖ್ಯಮಂತ್ರಿ ಆಯ್ಕೆ ಕಗ್ಗಂಟು ಕಳೆದ ಹತ್ತು ದಿನಗಳಿಂದ ಮುಂದುವರಿದಿದ್ದು, ಏತನ್ಮಧ್ಯೆ ಹಂಗಾಮಿ ಮುಖ್ಯಮಂತ್ರಿ ಏಕನಾಥ ಶಿಂಧೆ ಅನಾರೋಗ್ಯದ ನೆಪವೊಡ್ಡಿ ಸೋಮವಾರ (ಡಿ.02) ಎಲ್ಲಾ ಸಭೆಗಳನ್ನು ರದ್ದು ಮಾಡಿದ್ದಾರೆ. ಮತ್ತೊಂದೆಡೆ ಸರ್ಕಾರ ರಚನೆ ಕಸರತ್ತಿಗಾಗಿ ಎನ್‌ ಸಿಪಿ ಮುಖಂಡ ಅಜಿತ್‌ ಪವಾರ್‌ ದೆಹಲಿಗೆ ತೆರಳಿ ಬಿಜೆಪಿ ಹೈಕಮಾಂಡ್‌ ಜತೆ ಚರ್ಚಿಸಲು ಮುಂದಾಗಿರುವುದಾಗಿ ವರದಿ ತಿಳಿಸಿದೆ.

ಏಕನಾಥ ಶಿಂಧೆ ಖಾತೆ ಹಂಚಿಕೆ ಅಂತಿಮಗೊಳಿಸುವ ನಿಟ್ಟಿನಲ್ಲಿ ಮಹಾಯುತಿ ಮುಖಂಡರ ಸಭೆಗೆ ಹಾಜರಾಗಬೇಕಿತ್ತು. ಆದರೆ ಗಂಟಲು ಬೇನೆ ಮತ್ತು ಜ್ವರದಿಂದ ಬಳಲುತ್ತಿರುವ ಶಿಂಧೆ ತಮ್ಮ ಹುಟ್ಟೂರಾದ ಸತಾರಾದಲ್ಲೇ ಇದ್ದು, ಮುಂಬೈಗೆ ಆಗಮಿಸಿಲ್ಲ. ಹೀಗಾಗಿ ಮಂಗಳವಾರ (ನ.03) ಸಭೆ ನಿಗದಿಪಡಿಸಲಾಗಿದೆ ಎಂದು ವರದಿ ವಿವರಿಸಿದೆ.

ಶಿವಸೇನಾ ಮೂಲದ ಪ್ರಕಾರ, ಮಹಾಯುತಿ ಮುಖಂಡರು ಇಂದು ಯಾವುದೇ ಸಭೆಯನ್ನು ನಿಗದಿಪಡಿಸಿಲ್ಲವಾಗಿತ್ತು ಎಂದು ತಿಳಿಸಿದೆ. ಮಹಾಯುತಿಯಲ್ಲಿ ಶಿಂಧೆ ಬಣದ ಶಿವಸೇನಾ, ಅಜಿತ್‌ ಪವಾರ ಬಣದ ಎನ್‌ ಸಿಪಿ ಹಾಗೂ ಬಿಜೆಪಿ ಸೇರಿದೆ.

ಮಹಾಯುತಿ ಮೈತ್ರಿ 288 ಸದಸ್ಯ ಬಲದ ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯಲ್ಲಿ 230 ಸ್ಥಾನಗಳಲ್ಲಿ ಜಯಗಳಿಸಿತ್ತು. ಫಲಿತಾಂಶದಲ್ಲಿ ಬಿಜೆಪಿ 132 ಸ್ಥಾನ, ಶಿವಸೇನಾ 57 ಹಾಗೂ ಎನ್‌ ಸಿಪಿ 42 ಕ್ಷೇತ್ರಗಳಲ್ಲಿ ಜಯಗಳಿಸಿತ್ತು. ಬಿಜೆಪಿ ಅತೀ ಹೆಚ್ಚು ಸ್ಥಾನಗಳಲ್ಲಿ ಜಯಗಳಿಸಿದ್ದರಿಂದ ದೇವೇಂದ್ರ ಫಡ್ನವೀಸ್‌ ಅವರೇ ಮುಂದಿನ ಮುಖ್ಯಮಂತ್ರಿಯನ್ನಾಗಿ ಆಯ್ಕೆ ಮಾಡುವ ಸಂಭವ ಇದ್ದಿರುವುದಾಗಿ ವರದಿ ತಿಳಿಸಿದೆ.