Maharashtra ಛತ್ರಿ ಹಿಡಿದು ಬಸ್‌ ಚಲಾಯಿಸಿದ ಚಾಲಕ

ಮಳೆ ಬರುತ್ತಿರುವಾಗ ಬಸ್‌ ಸಿಕ್ಕರೆ ಸಾಕಪ್ಪ, ಸದ್ಯ ಮಳೆಯಲ್ಲಿ ನೆನೆಯದೇ ಸೇರಬೇಕಾದ ಸ್ಥಳ ಸೇರಬಹುದು ಅಂದ್ಕೋತೀವಿ. ಆದರೆ, ಬಸ್‌ ಒಳಗೂ ಮಳೆ ಬರುವಂತಿದ್ದರೆ ಹೇಗಿರುತ್ತಿತ್ತು ? ಇಲ್ಲೊಂದೆಡೆ ಸಾರಿಗೆ ವ್ಯವಸ್ಥೆಯಲ್ಲಿನ ಅವ್ಯವಸ್ಥೆಯಿಂದಾಗಿ ಬಸ್‌ ಒಂದರ ಒಳಗೂ ಮಳೆ ಬರುವಂತಾಗಿದ್ದು, ಆ ಮಳೆಯಲ್ಲೇ ಚಾಲಕ ಛತ್ರಿ ಹಿಡಿದು ಬಸ್‌ ಚಲಾಯಿಸಿದ್ದಾರೆ. ಆ ವಿಡಿಯೋ ಈಗ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಮಹಾರಾಷ್ಟ್ರದ ಗಡಿcರೋಲಿ ಮಾರ್ಗದ ಸರ್ಕಾರಿ ಬಸ್‌ ಒಂದರಲ್ಲಿ ರೂಫ್ ಹಾಳಾಗಿದ್ದು, ಡ್ರೈವರ್‌ನ ಮೇಲೆಯೇ ಮಳೆ ನೀರು ಬೀಳುತ್ತಿತ್ತು. ಇದರಿಂದ ಬೇಸತ್ತ ಡ್ರೈವರ್‌ ಒಂದು ಕೈನಲ್ಲಿ ಛತ್ರಿ ಹಿಡಿದು, ಮತ್ತೊಂದು ಕೈನಲ್ಲಿ ಸ್ಟೇರಿಂಗ್‌ ಹಿಡಿದು ಬಸ್‌ ಚಲಾಯಿಸಿದ್ದಾರೆ.

ಈ ವಿಡಿಯೋ ವೈರಲ್‌ ಆಗುತ್ತಿದ್ದಂತೆ ಸಮಸ್ಯೆ ಸರಿ ಪಡಿಸುವಂತೆ ನೆಟ್ಟಿಗರು ಆಡಳಿತವನ್ನು ಆಗ್ರಹಿಸಿದ್ದಾರೆ. ಸಾರಿಗೆ ಸಂಸ್ಥೆ ಕೂಡ ವಿಡಿಯೋ ನಿಜವೋ ಸುಳ್ಳೋ ಎಂದು ಖಚಿತಪಡಿಸಿಕೊಂಡು ಸಮಸ್ಯೆ ಇತ್ಯರ್ಥಪಡಿಸಲು ತೀರ್ಮಾನಿಸಿದೆ.