ಮಹದಾಯಿ ನದಿಯಲ್ಲಿ ಲವಣಾಂಶ ಹೆಚ್ಚಳ

ಪಣಜಿ: ಮಾಂಡವಿ ನದಿಯಲ್ಲಿ ಲವಣಾಂಶ ಪರೀಕ್ಷೆ ನಡೆಸಿದ ರಾಷ್ಟ್ರೀಯ ಜಲವಿಜ್ಞಾನ ಸಂಸ್ಥೆಯ ತಂಡ ಈ ನದಿಯಲ್ಲಿ ಲವಣಾಂಶ ಹೆಚ್ಚಾಗಿರುವುದು ಕಂಡುಹಿಡಿದಿದೆ ಎಂದು ಗೋವಾದ ಪರಿಸರ ವಾದಿ ರಾಜೇಂದ್ರ ಕೇರಕರ್‌ ಮಾಹಿತಿ ನೀಡಿದ್ದಾರೆ.

ಕಳೆದ ಕೆಲ ದಿನಗಳ ಹಿಂದೆ ಎರಡನೇಯ ಬಾರಿ ಮಹದಾಯಿ ನದಿಯ ಲವಣಾಂಶದ ಬಗ್ಗೆ ಅಧ್ಯಯನ ನಡೆಸಲು ರಾಷ್ಟ್ರೀಯ ಜಲವಿಜ್ಞಾನ ಸಂಸ್ಥೆಯ ಡಾ| ಗೋಪಾಲಕೃಷ್ಣ ಮತ್ತು ಎನ್‌. ಪಟೀಕರ್‌ ಅವರನ್ನೊಳಗೊಂಡ ತಂಡವು ಗೋವಾಕ್ಕೆ ಆಗಮಿಸಿ ಮಹದಾಯಿ ನದಿಯ ವಿವಿಧೆಡೆ ಒಟ್ಟೂ 14 ಸ್ಥಳಗಳಿಂದ ನೀರನ್ನು ಸಂಗ್ರಹಿಸಿತ್ತು. ಕಳೆದ ಮಳೆಗಾಲದ ಸಂದರ್ಭದಲ್ಲಿಯೂ ಈ ನದಿಯ ನೀರಿನ ಲವಣಾಂಶ ತಪಾಸಣೆ ನಡೆಸಲಾಗಿತ್ತು ಎಂದು ಪ್ರಸರ ವಾದಿ ರಾಜೇಂದ್ರ ಕೇರಕರ್‌ ಮಾಹಿತಿ ನೀಡಿದರು.

ಪಶ್ಚಿಮ ಕರಾವಳಿಯಲ್ಲಿರು ವಂತೆಯೇ ಗೋವಾದ ಪ್ರಮುಖ ಸಮಸ್ಯೆ ಲವಣಾಂಶದ ಸಮಸ್ಯೆ ಯಾಗಿದೆ. ಲವಣಾಂಶ ಹೆಚ್ಚಾದರೆ ಸಮಸ್ಯೆಯುಂಟಾಗುತ್ತದೆ. ಈ ತಜ್ಞರ ತಂಡವು ಶೀಘ್ರದಲ್ಲಿಯೇ ವರದಿಯನ್ನು ಸುಪ್ರಿಂ ಕೋರ್ಟ್‌ಗೆ ಸಲ್ಲಿಸಲಿದೆ ಎಂದು ರಾಜೇಂದ್ರ ಕೇರಕರ್‌ ಮಾಹಿತಿ ನೀಡಿದರು.