ಮಹದಾಯಿಗೆ ಒಂದು ಹಾಡು

ಮಹದಾಯಿ ಹೋರಾಟದ ಬಗ್ಗೆ ಎಲ್ಲರಿಗೂ ಗೊತ್ತೇ ಇದೆ. ಆ ಭಾಗದ ರೈತರಿಗೆ ಅನ್ಯಾಯವಾದ ಕುರಿತು ಇದುವರೆಗೆ ಅನೇಕ ಸಾಕ್ಷ್ಯಚಿತ್ರಗಳು, ಹಾಡುಗಳು ಮೂಡಿ ಬಂದಿವೆ. ನಟಿ ಪೂಜಾಗಾಂಧಿ ಕೂಡ ಮಹದಾಯಿ ಹೋರಾಟ ಕುರಿತು ಕಿರುಚಿತ್ರವೊಂದನ್ನು ನಿರ್ಮಿಸಿದ್ದರು.

ಈಗ ಆ ಭಾಗದ ರೈತರ ಮೇಲಿರುವ ಕಾಳಜಿಗಾಗಿ ಹಾವೇರಿ ಜಿಲ್ಲೆ ಹಾನಗಲ್‌ನ ಯುವ ಬರಹಗಾರ ಸದಾಶಿವ್‌, ಮಹದಾಯಿ ಕುರಿತ ಹಾಡೊಂದನ್ನು ಬರೆದಿದ್ದಾರೆ. ಸದಾಶಿವ್‌ಗೆ ಮಹದಾಯಿ ಹೋರಾಟ ಬಗ್ಗೆ ಗೊತ್ತಿತ್ತು. ಆ ಭಾಗದ ರೈತರ ಕುರಿತು ಒಂದಷ್ಟು ಮಾಹಿತಿಯನ್ನೂ ಕಲೆಹಾಕಿದ್ದರು.

ಅದೆಲ್ಲವನ್ನೂ ಇಟ್ಟುಕೊಂಡು ಅವರು ಒಂದು ಆಲ್ಬಂ ಮಾಡಿದ್ದಾರೆ. ಸದಾಶಿವ್‌, ಶರಣ್‌ ಅಭಿನಯದ “ರಾಜ್‌ವಿಷ್ಣು’ ಚಿತ್ರಕ್ಕೆ ಸಹ ನಿರ್ದೇಶಕರಾಗಿಯೂ ಕೆಲಸ ಮಾಡಿದ್ದಾರೆ. ಈಗಾಗಲೇ ಮಹದಾಯಿ ಕುರಿತು ಬರೆದಿರುವ ಆ ಹಾಡಿಗೆ ಎಲ್ಲೆಡೆಯಿಂದ ಒಳ್ಳೆಯ ಮಾತುಗಳೂ ಕೇಳಿಬಂದಿವೆ.

ಇದನ್ನು ಮನಗಂಡ ಸದಾಶಿವ್‌, ಈಗ ಕಿರುಚಿತ್ರವೊಂದನ್ನು ತಯಾರಿಸಲು ಮುಂದಾಗಿದ್ದಾರೆ. ಅಂದಹಾಗೆ, ಸದಾಶಿವ್‌ಅವರು ಬರೆದಿರುವ ಮಹದಾಯಿ ಹೋರಾಟದಹಾಡಿಗೆ ಹಿರಿಯ ಸಂಗೀತ ನಿರ್ದೇಶಕ ವಿ.ಮನೋಹರ್‌ ಅವರು ಸಂಗೀತ ಸಂಯೋಜನೆ ಮಾಡಿದ್ದಾರೆ. ಆ ಹಾಡಿಗೆ ಪ್ರಶಸ್ತಿ ವಿಜೇತ ಗಾಯಕ ಚೆನ್ನಪ್ಪ ಹುದ್ದಾರ್‌ ದನಿಯಾಗಿದ್ದಾರೆ.