ಮಾಫಿಯಾ ಖರ್ಚಲ್ಲಿ ಹುಡುಗ ಹುಡುಗಿ ಮತ್ತು ಜೀವನ!

ಐದಾರು ವರ್ಷಗಳ ಹಿಂದೆ “ದಿಲ್ದಾರ್‌’ ಎಂಬ ಸಿನಿಮಾ ಬಂದಿದ್ದು ನಿಮಗೆ ನೆನಪಿರಬಹುದು. ಆ ಚಿತ್ರದ ನಿರ್ದೇಶಕ ಅಮರ್‌ ಈಗ “ನಾನು ನಮ್‌ ಹುಡ್ಗಿ ಖರ್ಚಿಗೊಂದು ಮಾಫಿಯಾ’ ಎಂಬ ಸಿನಿಮಾ ಮಾಡುತ್ತಿದ್ದಾರೆ. ಈ ಚಿತ್ರ ಅಕ್ಷರಾ ಪ್ರೊಡಕ್ಷನ್ಸ್‌ನಡಿ ನಿರ್ಮಾಣವಾಗುತ್ತಿದೆ. ಈಗಾಗಲೇ ಆಡಿಯೋ ಬಿಡುಗಡೆಯಾಗಿರುವ ಈ ಚಿತ್ರ ಸದ್ಯದಲ್ಲೇ ಬಿಡುಗಡೆಯಾಗಲಿದೆ.

“ನಾನು ನಮ್‌ ಹುಡ್ಗಿ ಖರ್ಚಿಗೊಂದು ಮಾಫಿಯಾ’ ಲವ್‌ ಕಂ ಆ್ಯಕ್ಷನ್‌ ಸಬೆjಕ್ಟ್. ಹಾಗಂತ ಗಾಂಧಿನಗರದ ಸಿದ್ಧಸೂತ್ರಗಳ ಸುತ್ತ ಸುತ್ತುವ ಸಿನಿಮಾವಂತೂ ಅಲ್ಲವೇ ಅಲ್ಲ ಎಂದು ವಿಶ್ವಾಸದಿಂದ ಹೇಳುವ ಅಮರ್‌ಗೆ ಈ ಸಿನಿಮಾ ಕೂಡಾ ಒಂದು ಹೊಸ ಪ್ರಯತ್ನವಾಗಿ ಪ್ರೇಕ್ಷಕರ ಮನಗೆಲ್ಲುವ ವಿಶ್ವಾಸವಿದೆ. “ಇಲ್ಲಿ ಪ್ರತಿ ಅಂಶಗಳಿಗೂ ಸಂಬಂಧವಿದೆ. ಒಂದಕ್ಕೊಂದು ಲಿಂಕ್‌ನೊಂದಿಗೆ ಸಾಗುವ ಈ ಸಿನಿಮಾದಲ್ಲಿ ಹಲವು ಸೂಕ್ಷ್ಮ ವಿಷಯಗಳನ್ನು ಹೇಳುವ ಪ್ರಯತ್ನ ಮಾಡಿದ್ದೇನೆ. ಇಲ್ಲಿ ಹುಡುಗಿ ಅಂದರೆ ಪ್ರೀತಿ. ಪ್ರತಿಯೊಬ್ಬರ ಜೀವನದಲ್ಲೂ ಒಂದು ಹುಡುಗಿ ಬಂದು ಹೋಗಿರುತ್ತಾಳೆ. ಇನ್ನು ಮಾಫಿಯಾ ಅನ್ನೋದನ್ನು ನಾಯಕನ ಕೆಲಸ ಎನ್ನಬಹುದು. ಯಾವುದೇ ಒಂದು ಕೆಲಸದ ಹಿಂದೆ ಗೊತ್ತಿಧ್ದೋ ಗೊತ್ತಿಲ್ಲದೆಯೋ ಒಂದು ಮಾಫಿಯಾ ಇರುತ್ತದೆ. ಕೆಲವರು ಶ್ರೀಮಂತರಾಗಲು, ಕೈ ತುಂಬಾ ಕಾಸು ಮಾಡಲು ದೊಡ್ಡ ದೊಡ್ಡ ಮಾಫಿಯಾಗೆ ಕೈ ಹಾಕಿದರೆ, ಇನ್ನು ಕೆಲವರು ಖರ್ಚಿಗಾಗಿ, ತಮ್ಮ ಜೀವನ ನಡೆಸಲು ಮಾಫಿಯಾ ಮಾಡುತ್ತಾರೆ.

ಎಲ್ಲವೂ ಕಾನೂನು ಪ್ರಕಾರ, ನೀಟಾಗಿ ನಡೆಯುತ್ತಿದೆ ಎಂದು ನಾವಂದುಕೊಂಡರೂ ಅದರ ಹಿಂದೆ ನಮಗೆ ಗೊತ್ತಿಲ್ಲದ ಒಂದು ಮಾಫಿಯಾ ಇರುತ್ತದೆ. ಈ ವಿಷಯ ಕೂಡಾ ಕಥೆಗೆ ಲಿಂಕ್‌ ಆಗುತ್ತದೆ. ಮುಖ್ಯವಾಗಿ ಹೇಳಬೇಕೆಂದರೆ ಇದು ರಿಯಲಿಸ್ಟಿಕ್‌ ಸಿನಿಮಾ. ಇಲ್ಲಿ ನೈಜತೆಗೆ ಹೆಚ್ಚು ಒತ್ತುಕೊಟ್ಟಿದ್ದೇನೆ. ಸಿನಿಮಾ ನೋಡುತ್ತಿದ್ದಾಗ ನಮ್ಮ ಕಥೆಯೇ ತೆರೆಮೇಲೆ ಬರುತ್ತಿದೆಯಾ ಎಂಬ ಭಾವನೆ ಪ್ರೇಕ್ಷಕರಿಗೆ ಬರುತ್ತದೆ. ಕಮರ್ಷಿಯಲ್‌ ಸಿನಿಮಾ ಎಂಬ ಕಾರಣಕ್ಕೆ ಬಿಲ್ಡಪ್‌ ಆಗಲಿ, ಅನಾವಶ್ಯಕ ದೃಶ್ಯಗಳನ್ನು ಸೇರಿಸಿಲ್ಲ. ನನಗೆ ತುಂಬಾ ಖುಷಿಕೊಟ್ಟ ಸಿನಿಮಾವಿದು’ ಎನ್ನುವ ಅಮರ್‌, ಚಿತ್ರದ ಮೂಲಕ ಸಮಾಜಕ್ಕೊಂದು ಮೆಸೇಜ್‌ ಕೊಡುವ ಪ್ರಯತ್ನ ಮಾಡಿದ್ದಾರಂತೆ. 

ಈ ಚಿತ್ರದ ಮೂಲಕ ಶ್ಯಾಮ್‌ ಸುಂದರ್‌ ಹೀರೋ ಆದರೆ, ಶ್ರದ್ಧಾ ಬೆಣಗಿ ನಾಯಕಿಯಾಗಿ ಚಿತ್ರರಂಗಕ್ಕೆ ಎಂಟ್ರಿಕೊಡುತ್ತಿದ್ದಾರೆ. ಇನ್ನು ಅಮರ್‌ ಈ ಚಿತ್ರದಲ್ಲೊಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರಕ್ಕೆ ಕುಮಾರ್‌ ಅವರ ಛಾಯಾಗ್ರಹಣವಿದ್ದು, ಖ್ಯಾತ ಸಂಗೀತ ನಿರ್ದೇಶಕ ಎ.ಆರ್‌.ರೆಹಮಾನ್‌ ಜೊತೆ ಅನೇಕ ವರ್ಷಗಳ ಕಾಲ ಕೆಲಸ ಮಾಡಿದ ಅನುಭವವಿರುವ ವಿಕ್ರಮ್‌ ವರ್ಮನ್‌ ಸಂಗೀತ ಸಂಯೋಜಿಸಿದ್ದಾರೆ. ಚಿತ್ರದ ಮಾಸ್ಟರಿಂಗ್‌ ಕೆಲಸವನ್ನು ಕ್ಯಾಲಿಫೋರ್ನಿಯಾದಲ್ಲಿ ಮಾಡಿರುವುದು ವಿಶೇಷ. ಚಿತ್ರದಲ್ಲಿ ಕನ್ನಡ ರ್ಯಾಪ್‌, ಮೆಲೋಡಿ, ಸ್ಲೋ ಮೆಲೋಡಿ, ಡ್ಯುಯೆಟ್‌ ಹಾಗೂ ಒಂದು ಐಟಂ ನಂಬರ್‌ ಇದ್ದು, ಎಲ್ಲವೂ ಹೊಸತನದಿಂದ ಕೂಡಿದೆ.