Macau Badminton: ಶ್ರೀಕಾಂತ್‌ ಕ್ವಾರ್ಟರ್‌ ಫೈನಲಿಗೆ

ಮಕಾವು: ಭಾರತದ ಸ್ಟಾರ್‌ ಶಟ್ಲರ್‌ ಕಿದಂಬಿ ಶ್ರೀಕಾಂತ್‌ ಅವರು ಮಕಾವು ಓಪನ್‌ ಸೂಪರ್‌ 300 ಬ್ಯಾಡ್ಮಿಂಟನ್‌ ಕೂಟದ ಪುರುಷರ ಸಿಂಗಲ್ಸ್‌ನಲ್ಲಿ ಕ್ವಾರ್ಟರ್‌ಫೈನಲ್‌ ಹಂತಕ್ಕೇರಿದ್ದಾರೆ.

ಗುರುವಾರ ನಡೆದ ದ್ವಿತೀಯ ಸುತ್ತಿನ ಪಂದ್ಯದಲ್ಲಿ ಆರನೇ ಶ್ರೇಯಾಂಕದ ಶ್ರೀಕಾಂತ್‌ ಅವರು ತನ್ನ ದೇಶದವರೇ ಆದ ಆಯುಷ್‌ ಶೆಟ್ಟಿ ಅವರನ್ನು 21-13, 21-18 ಗೇಮ್‌ಗಳಿಂದ ಸೋಲಿಸಿದರು. ಮೇ ತಿಂಗಳಲ್ಲಿ ಗಾಯಗೊಂಡ ಬಳಿಕ ಇದೇ ಮೊದಲ ಕೂಟದಲ್ಲಿ ಆಡಿದ ಶ್ರೀಕಾಂತ್‌ ಇದೀಗ ಸಿಂಗಲ್ಸ್‌ ವಿಭಾಗದಲ್ಲಿ ಕಣದಲ್ಲಿ ಉಳಿದ ಏಕೈಕ ಸ್ಪರ್ಧಿಯಾಗಿದ್ದಾರೆ. ಕ್ವಾರ್ಟರ್‌ಫೈನಲ್‌ನಲ್ಲಿ ಅವರು ಹಾಂಕಾಂಗ್‌ನ ದ್ವಿತೀಯ ಶ್ರೇಯಾಂಕದ ಎನ್‌ಜಿ ಕಾ ಲಾಂಗ್‌ ಆ್ಯಂಗಸ್‌ ಅವರನ್ನು ಎದುರಿಸಲಿದ್ದಾರೆ.

ವನಿತೆಯರ ಡಬಲ್ಸ್‌ನಲ್ಲಿ ಟ್ರೀಸಾ ಜಾಲಿ ಮತ್ತು ಗಾಯತ್ರಿ ಗೋಪಿಚಂದ್‌ ಅವರು ಚೈನೀಸ್‌ ತೈಪೆಯ ಲಿನ್‌ ಚಿಹ್‌ ಚುನ್‌ ಮತ್ತು ತೆಂಗ್‌ ಚುನ್‌ ಸನ್‌ ಅವರನ್ನು 22-20, 21-11 ಗೇಮ್‌ಗಳಿಂದ ಉರುಳಿಸಿ ಕ್ವಾರ್ಟರ್‌ಫೈನಲಿಗೇರಿದರು. ಈ ಹೋರಾಟ ಕೇವಲ 38 ನಿಮಿಷಗಳಲ್ಲಿ ಮುಗದಿತ್ತು.