ನಿರ್ದೇಶಕ ಯೋಗಿ, ಕಣ್ಸನ್ನೆ ಮೂಲಕ ರಾತ್ರೋರಾತ್ರಿ ಜನಪ್ರಿಯಳಾದ ಪ್ರಿಯಾ ಪ್ರಕಾಶ್‌ ವಾರಿಯರ್‌ ಅವರನ್ನು ಭೇಟಿಯಾಗಿ ಬಂದು, ಆ ಫೋಟೋಗಳನ್ನು ಮಾಧ್ಯಮಕ್ಕೆ ಬಿಡುಗಡೆ ಮಾಡಿ, ತಮ್ಮ ಹೊಸ ಚಿತ್ರ “ಯೋಗಿ ಲವ್ಸ್‌ ಸುಪ್ರಿಯಾ’ ಚಿತ್ರಕ್ಕೆ ಪ್ರಿಯಾ ಪ್ರಕಾಶ್‌ ನಾಯಕಿಯಾಗುವ ಸಾಧ್ಯತೆ ಇದೆ ಎಂದು ಹೇಳಿದ್ದರು. ಅದು ದೊಡ್ಡ ಸುದ್ದಿಯೂ ಆಗಿತ್ತು. ಈಗ “ಯೋಗಿ ಲವ್ಸ್‌ ಸುಪ್ರಿಯಾ’ ಚಿತ್ರದ ಮುಹೂರ್ತವಾಗಿದೆ. ಅದೂ ಚಿತ್ರದ ನಾಯಕಿ ಇಲ್ಲದೇ …
ಹಾಗಾದರೆ, ಪ್ರಿಯಾ ಪ್ರಕಾಶ್‌ ಬರಲ್ವಾ ಎಂದರೆ, “ಮಾತುಕತೆ ಮಾಡಿದ್ದೇವೆ. ಈಗ ಅವರು ಸಂಪರ್ಕಕ್ಕೆ ಸಿಗುತ್ತಿಲ್ಲ. ಮೂರ್‍ನಾಲ್ಕು ತಿಂಗಳು ಅವರು ಬಿಝಿ ಇದ್ದಾರೆ. ಅವರು ಬಂದರೂ ಬರಬಹುದು, ಬರದೇನೂ ಇರಬಹುದು. ಹಾಗಾಗಿ, ನಾವು ಚಿತ್ರದ ಮತ್ತೂಬ್ಬ ನಾಯಕಿ ಇರುವ ದೃಶ್ಯಗಳ ಚಿತ್ರೀಕರಣ ಮಾಡುತ್ತೇವೆ. ಪ್ರಿಯಾ ಪ್ರಕಾಶ್‌ ಬಾರದಿದ್ದರೆ ಬೇರೆ ನಾಯಕಿಯನ್ನು ಆಯ್ಕೆ ಮಾಡುತ್ತೇವೆ’ ಎನ್ನುವುದು ಚಿತ್ರದ ನಿರ್ದೇಶಕ ಕಂ ನಾಯಕ ಯೋಗಿ ಅವರ ಮಾತು.
ಅಂದಹಾಗೆ, “ಯೋಗಿ ಲವ್ಸ್‌ ಸುಪ್ರಿಯಾ’ ಎರಡು ಶೇಡ್‌ನ‌ಲ್ಲಿ ಹೋಗುವ ಕಥೆಯಾಗಿದ್ದು, ಸ್ಕೂಲ್‌ ಲವ್‌ಸ್ಟೋರಿ ಜೊತೆಗೆ ಕಾಲೇಜ್‌ ಲವ್‌ಸ್ಟೋರಿಯೂ ಸೇರಿಕೊಳ್ಳುತ್ತದೆಯಂತೆ. ಲವ್‌ ಜೊತೆಗೆ ಜೀವನದಲ್ಲಿ ಗುರಿ, ಸಾಧನೆ ಮುಖ್ಯ ಎಂಬ ಅಂಶವನ್ನು ಈ ಚಿತ್ರದಲ್ಲಿ ಹೇಳಲಿದ್ದಾರಂತೆ. ಈಗಾಗಲೇ ಚಿತ್ರಕ್ಕೆ ಹೈದರಾಬಾದ್‌ನ ನಕ್ಷತ್ರ ಎನ್ನುವವರು ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಆದರೆ, ಮುಹೂರ್ತದ ದಿನ ಮಾತ್ರ ಯೋಗಿಗೆ ಯಾವ ನಾಯಕಿಯೂ ಇರಲಿಲ್ಲ. ಚಿತ್ರದ ಬಗ್ಗೆ ಹೆಚ್ಚೇನು ಮಾತನಾಡಲು ಯೋಗಿ ಬಳಿ ವಿಷಯವಿರಲಿಲ್ಲ.
ಚಿತ್ರದ ಮುಹೂರ್ತಕ್ಕೆ ನಟಿ ಪ್ರಣೀತಾ ಬಂದು ಕ್ಲಾಪ್‌ ಮಾಡಿದ ಖುಷಿಯಷ್ಟೇ ಎದ್ದು ಕಾಣುತ್ತಿತ್ತು. ಚಿತ್ರಕ್ಕೆ ವೀರ್‌ಸಮರ್ಥ್ ಸಂಗೀತ ನೀಡುತ್ತಿದ್ದು, ರಾಜಶೇಖರ್‌ ಛಾಯಾಗ್ರಹಣವಿದೆ. ಚಿತ್ರವನ್ನು ಮಂಜುನಾಥ್‌ ನಿರ್ಮಿಸುತ್ತಿದ್ದಾರೆ. ನಿರ್ದೇಶಕರು ಆಗಾಗ ಬಂದು ಸಿನಿಮಾ ಮಾಡುವ ಎಂದು ಕೇಳಿಕೊಳ್ಳುತ್ತಿದ್ದರಂತೆ. ಆ ಕಾರಣದಿಂದ ಸಿನಿಮಾ ಮಾಡುತ್ತಿರುವುದಾಗಿ ಹೇಳಿದರು ಮಂಜು.
