ಬಾದಾಮಿಯಲ್ಲಿ ಲಾಕ್‌ಡೌನ್‌ ಮತ್ತಷ್ಟು ಬಿಗಿ

ಬಾದಾಮಿ:  ಕೋವಿಡ್ 19 ವೈರಸ್‌ ಹರಡದಂತೆ ಮುಂಜಾಗ್ರತಾ ಕ್ರಮವಾಗಿ ಪಟ್ಟಣದಲ್ಲಿ ಲಾಕ್‌ಡೌನ್‌ ಮತ್ತಷ್ಟು ಬಿಗಿಗೊಳಿಸಲಾಗಿದೆ.

ಬೀಳಗಿ, ಹುನಗುಂದ ಮತ್ತು ಬಾದಾಮಿಯಲ್ಲಿ ಯಾವುದೇ ಸೋಂಕಿತ ಪ್ರಕರಣಗಳು ಕಂಡುಬರದೇ ಇರುವ ಹಿನ್ನೆಲೆಯಲ್ಲಿ ಮುಂಜಾಗ್ರತಾ ಕ್ರಮವಾಗಿ ತಾಲೂಕಾಡಳಿತ ದ್ವಿ ಚಕ್ರವಾಹನ ನಿಷೇಧ ಮಾಡಿದೆ. ಬಾದಾಮಿಯಲ್ಲಿ ರಾಮದುರ್ಗ ಸರ್ಕಲ್‌, ಕಬ್ಬಲಗೇರಿ ಸರ್ಕಲ್‌ನಲ್ಲಿ ಮತ್ತು ಹಲಕುರ್ಕಿ ಕ್ರಾಸ್‌ನಲ್ಲಿ ಚೆಕ್‌ಪೋಸ್ಟ್‌ ಹಾಕಲಾಗಿದೆ.

ಅನುಮತಿ ಪಾಸ್‌ ಇಲ್ಲದೇ ಯಾವುದೇ ವಾಹನ ಬಿಡುತ್ತಿಲ್ಲ. ದ್ವಿಚಕ್ರವಾಹನಗಳನ್ನು ಸೀಜ್‌ ಮಾಡಲಾಗುತ್ತಿದೆ. ಚೆಕ್‌ಪೋಸ್ಟ್‌ ನಲ್ಲಿ ಬಿಗಿಯಾದ ಕಠಿಣ ಕ್ರಮ ತೆಗೆದುಕೊಳ್ಳಲಾಗುತ್ತಿದೆ. ತಹಶೀಲ್ದಾರ್‌ ಸುಹಾಸ ಇಂಗಳೆ ನೇತೃತ್ವದಲ್ಲಿ ತಾಪಂ ಇಒ ಡಾ| ಪುನೀತ, ಸಿಪಿಐ ರಮೇಶ ಹಾನಾಪುರ, ಪಿಎಸ್‌ಐ ಪ್ರಕಾಶ ಬಣಕಾರ, ಮುಖ್ಯಾಧಿಕಾರಿ ಜ್ಯೋತಿ ಗಿರೀಶ, ಟಿಎಚ್‌ಒ ಎಂ.ಎನ್‌. ಪಾಟೀಲ ಪೊಲೀಸ್‌, ಕಂದಾಯ, ಆರೋಗ್ಯ, ಪೌರಕಾರ್ಮಿಕರು, ಆಶಾ ಕಾರ್ಯಕರ್ತೆಯರು ಶ್ರಮಿಸುತ್ತಿದ್ದಾರೆ.