ನವದೆಹಲಿ: ತಾಯಿಗೆ ಮಕ್ಕಳೆಂದರೆ ಎಷ್ಟು ಪ್ರೀತಿಯೋ ಅದೇ ರೀತಿ ಮಕ್ಕಳಿಗೂ ಕೂಡಾ ತಾಯಿ ಬಗ್ಗೆ ತುಂಬಾ ಪ್ರೀತಿ ಮತ್ತು ಕಾಳಜಿ ಹೊಂದಿರುತ್ತಾರೆ. ಅದಕ್ಕೊಂದು ಸೇರ್ಪಡೆ ಎಂಬಂತೆ ತನ್ನ ಬುದ್ಧಿ ಚಾತುರ್ಯದಿಂದ ತಾಯಿಯ ಜೀವ ಉಳಿಸಿದ ಪುಟ್ಟ ಬಾಲಕನ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭರ್ಜರಿ ವೈರಲ್ ಆಗಿದೆ.
ಇದನ್ನೂ ಓದಿ:ಬೆತ್ತಲೆ ಫೋಟೋ ಶೂಟ್, ಟ್ವೀಟ್‌ ವಾರ್‌,ಬಾಯ್ಕಾಟ್.. 2022 ರ ಬಿಟೌನ್‌ ವಿವಾದಗಳ ಸುತ್ತ
ಈ ವಿಡಿಯೋ ಪುಟ್ಟ ಬಾಲಕನನ್ನು ಮೆಚ್ಚುವಂತೆ, ಗೌರವಿಸುವ ಜೊತೆಗೆ ಸ್ವಲ್ಪ ಭಾವನಾತ್ಮಕವಾಗುವಂತೆ ಮಾಡಬಹುದು. ಐಪಿಎಸ್ ಅಧಿಕಾರಿ ದೀಪಾಂಶು ಕಬ್ರಾ ಅವರು ತಮ್ಮ ಟ್ವೀಟರ್ ಖಾತೆಯಲ್ಲಿ ಬಾಲಕನ ವೀಡಿಯೊ ಕ್ಲಿಪ್ ಅನ್ನು ಶೇರ್ ಮಾಡಿದ್ದು, ಸಾವಿರಾರು ಮಂದಿ ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ವೀಡಿಯೋದಲ್ಲೇನಿದೆ?
ಮಹಿಳೆಯೊಬ್ಬರು ತನ್ನ ಗ್ಯಾರೇಜ್ ನ ಬಾಗಿಲನ್ನು ರಿಪೇರಿ ಮಾಡಲು ಏಣಿ ಹತ್ತಿದ್ದರು. ಆದರೆ ಆಗ ಏಣಿ ದಿಢೀರನೆ ಕೆಳಗೆ ಬಿದ್ದಿದ್ದು, ಆಕೆ ಛಾವಣಿಯನ್ನು ಹಿಡಿದುಕೊಂಡು ನೇತಾಡತೊಡಗಿದ್ದು, ಸಹಾಯ ಮಾಡುವಂತೆ ಕೂಗಿಕೊಂಡಿದ್ದಳು. ಪಕ್ಕದಲ್ಲಿದ್ದ ಪುಟ್ಟ ಮಗ ಕೂಡಲೇ ಓಡಿ ಹೋಗಿ ಏಣಿಯನ್ನು ಪ್ರಯತ್ನಪಟ್ಟು ತಾಯಿಯ ಬಳಿ ತಂದಿದ್ದ, ಆಗ ತಾಯಿ ಕಾಲಿನಿಂದ ಏಣಿಯನ್ನು ತನ್ನತ್ತ ಎಳೆದುಕೊಂಡು ನಿಧಾನಕ್ಕೆ ಕೆಳಕ್ಕೆ ಇಳಿಯುತ್ತಿರುವ ದೃಶ್ಯ ಸೆರೆಯಾಗಿದೆ.
ಈ ಪುಟ್ಟ ಮಗುವಿನ ಧೈರ್ಯ ಮತ್ತು ಬುದ್ಧಿವಂತಿಕೆಯನ್ನು ಎಷ್ಟು ಹೊಗಳಿದರೂ ಸಾಕಾಗುವುದಿಲ್ಲ ಎಂದು ದೀಪಾಂಶು ಕಬ್ರಾ ಹಿಂದಿಯಲ್ಲಿ ಕ್ಯಾಪ್ಶನ್ ನೀಡಿ ವಿಡಿಯೋವನ್ನು ಶೇರ್ ಮಾಡಿದ್ದು, ಎಲ್ಲರೂ ಮಗುವಿನ ಚಾಣತನಕ್ಕೆ ಶಹಬ್ಬಾಸ್ ಎಂದಿದ್ದಾರೆ.
