ಭಾರತದಲ್ಲಿ ವಾರ್ಷಿಕ 850 ಮಿಲಿಯನ್ ಡೋಸ್ ಸ್ಫುಟ್ನಿಕ್-5 ಲಸಿಕೆ ತಯಾರಿಕೆ

ನವದೆಹಲಿ:ಭಾರತದಲ್ಲಿ ರಷ್ಯಾದ ಸ್ಫುಟ್ನಿಕ್-5 ಲಸಿಕೆ ಬಳಕೆಗೆ ಡಿಜಿಸಿಐ ಅನುಮತಿ ನೀಡಿದ್ದು, ವಾರ್ಷಿಕವಾಗಿ ಐದು ಪ್ರಯೋಗಾಲಯಗಳಲ್ಲಿ 850 ಮಿಲಿಯನ್ ಡೋಸ್ ಗಳನ್ನು ಉತ್ಪಾದಿಸಲಾಗುತ್ತದೆ. ಏತನ್ಮಧ್ಯೆ ಸದ್ಯ ತಯಾರಿಕೆಯಲ್ಲಿರುವ ಸ್ಫುಟ್ನಿಕ್-5 ಲಸಿಕೆ ಏಪ್ರಿಲ್ ಅಂತ್ಯದೊಳಗೆ ಲಭ್ಯವಾಗಲಿದೆ ಎಂದು ವರದಿ ತಿಳಿಸಿದೆ.

ಭಾರತದ ಡಿಸಿಜಿಐ(ಡ್ರಗ್ಸ್ ಕಂಟ್ರೋಲರ್ ಜನರಲ್ ಆಫ್ ಇಂಡಿಯಾ) ರಷ್ಯಾದ ಸ್ಫುಟ್ನಿಕ್-5 ಲಸಿಕೆ ಬಳಸಲು ಅನುಮತಿ ನೀಡಿದೆ. ಹಲವಾರು ರಾಜ್ಯಗಳಲ್ಲಿ ಕೋವಿಡ್ ಲಸಿಕೆ ಕೊರತೆಯ ಹಿನ್ನೆಲೆಯಲ್ಲಿ ರಷ್ಯಾದ ಸ್ಫುಟ್ನಿಕ್-5 ಲಸಿಕೆ ಬಳಕೆಗೆ ಡಿಸಿಜಿಐ ಅನುಮತಿ ನೀಡಿರುವುದಾಗಿ ವರದಿ ಹೇಳಿದೆ.

ಭಾರತದ ರೆಡ್ಡೀಸ್ ಪ್ರಯೋಗಾಲಯದಲ್ಲಿ ಸ್ಫುಟ್ನಿಕ್-5 ಲಸಿಕೆ ಉತ್ಪಾದಿಸಲಾಗುತ್ತಿದ್ದು, ಇದು ಶೇ.91.6ರಷ್ಟು ಪರಿಣಾಮಕಾರಿಯಾಗಿದೆ ಎಂದು ತಿಳಿಸಿದೆ. ಈಗಾಗಲೇ ರೆಡ್ಡೀಸ್ ಪ್ರಯೋಗಾಲಯ ಸ್ಫುಟ್ನಿಕ್-5 ಲಸಿಕೆಯ ಪ್ರಯೋಗ ಜನರ ಮೇಳೆ ನಡೆಸಿದ್ದು, ದೇಶದಲ್ಲಿ ತುರ್ತು ಬಳಕೆಗೆ ಅನುಮತಿ ನೀಡುವಂತೆ ಮನವಿ ಮಾಡಿತ್ತು.

ಅತೀ ಹೆಚ್ಚು ಜನಸಂಖ್ಯೆ ಹೊಂದಿರುವ ಭಾರತ ರಷ್ಯಾದ ಸ್ಫುಟ್ನಿಕ್-5 ಲಸಿಕೆ ಬಳಕೆಗೆ ಅನುಮತಿ ನೀಡಿರುವುದಾಗಿ ರಷ್ಯಾದ ಆರ್ ಡಿಐಎಫ್(ರಷ್ಯನ್ ಡೈರೆಕ್ಟ್ ಇನ್ವೆಸ್ಟ್ ಮೆಂಟ್ ಫಂಡ್) ಪ್ರಕಟಣೆಯಲ್ಲಿ ತಿಳಿಸಿದೆ.