ಸದ್ಯ ಧ್ರುವ ಸರ್ಜಾ ಅಭಿನಯದ “ಪೊಗರು’ ಸಿನಿಮಾ ತೆರೆಗೆ ಬರೋದಕ್ಕೆ ಸಿದ್ಧವಾಗುತ್ತಿದೆ. ಸುಮಾರು ಎರಡು ವರ್ಷಗಳ ಬಳಿಕ, ಮದುವೆಯ ನಂತರ ಧ್ರುವ ಸರ್ಜಾ ಅಭಿನಯಿಸಿರುವ ಚಿತ್ರ ತೆರೆಗೆ ಬರುತ್ತಿರುವುದರಿಂದ, ಸಹಜವಾಗಿಯೇ “ಪೊಗರು’ ಚಿತ್ರದ ಬಗ್ಗೆ ಚಿತ್ರರಂಗದಲ್ಲಿ, ಧ್ರುವ ಅಭಿಮಾನಿಗಳಲ್ಲಿ ಒಂದಷ್ಟು ನಿರೀಕ್ಷೆ, ಕುತೂಹಲಗಳು ಮನೆ ಮಾಡಿವೆ. ಆದರೆ “ಪೊಗರು’ ಯಾವಾಗ ಬಿಡುಗಡೆ ಆಗುತ್ತದೆ ಎನ್ನುವ ಅಭಿಮಾನಿಗಳ ಪ್ರಶ್ನೆಗೆ ಇನ್ನೂ ಉತ್ತರ ಸಿಕ್ಕಿಲ್ಲ.
ಇವೆಲ್ಲದರ ನಡುವೆ ಇದೀಗ ಧ್ರುವ ಸರ್ಜಾ “ಪೊಗರು’ ಸಿನಿಮಾ ಬಿಡುಗಡೆಯ ಬಗ್ಗೆ ಮಾತನಾಡಿದ್ದಾರೆ. ಬುಧವಾರ ಶ್ರೀನಿ ಅಭಿನಯಿಸುತ್ತಿರುವ “ಓಲ್ಡ್‌ ಮಾಂಕ್‌’ ಚಿತ್ರದ ಮುಹೂರ್ತ ಸಮಾರಂಭಕ್ಕೆ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದ ಧ್ರುವ ಸರ್ಜಾಗೆ “ಪೊಗರು’ ಚಿತ್ರ ಯಾವಾಗ ತೆರೆಗೆ ಎಂಬ ಪ್ರಶ್ನೆ ಮಾಧ್ಯಮಗಳಿಂದ ಎದುರಾಯಿತು. ಈ ವೇಳೆ ಮಾತನಾಡಿದ ಧ್ರುವ ಸರ್ಜಾ, “ಏಪ್ರಿಲ್‌ನಲ್ಲಿ “ಪೊಗರು’ ಸಿನಿಮಾ ಬಿಡುಗಡೆ ಆಗಲಿದೆ.
ಸದ್ಯ ಸಿನಿಮಾ ಸೆನ್ಸಾರ್‌ ಮುಂದಿರುವುದರಿಂದ ಸೆನ್ಸಾರ್‌ ಆದ ಬಳಿಕ ಸರಿಯಾದ ದಿನಾಂಕವನ್ನು ಘೋಷಣೆ ಮಾಡಲಾಗುವುದು’ ಎಂದು ತಿಳಿಸಿದ್ದಾರೆ. ಇನ್ನು ಏಪ್ರಿಲ್‌ನಲ್ಲಿ “ಕೋಟಿಗೊಬ್ಬ-3′, “ರಾಬರ್ಟ್‌’ ಹೀಗೆ ದೊಡ್ಡ ಸ್ಟಾರ್ ನಟರ ಚಿತ್ರಗಳು ಒಂದರ ಹಿಂದೊಂದು ತೆರೆಗೆ ಬರುತ್ತಿರುವ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಧ್ರುವ, “ಏಪ್ರಿಲ್‌ನಲ್ಲಿ ಬೇರೆ ನಟರ ದೊಡ್ಡ ಸಿನಿಮಾಗಳು ಬಂದರೆ ತೊಂದರೆಯಿಲ್ಲ. ಯಾರು ಮೊದಲು ಬರುತ್ತಾರೋ ಬರಲಿ. ಅವರ ನಂತರ ನಾವು ಬರುತ್ತೇವೆ’ ಎಂದರು.
ಮೂಲಗಳ ಪ್ರಕಾರ, ಮಾರ್ಚ್‌ ತಿಂಗಳಲ್ಲಿ “ಪೊಗರು’ ಚಿತ್ರದ ಆಡಿಯೋ ಹಾಗೂ ಎರಡನೇ ಟ್ರೇಲರ್‌ ರಿಲೀಸ್‌ ಮಾಡಲು ಚಿತ್ರತಂಡ ತಯಾರಿ ಮಾಡಿಕೊಳ್ಳುತ್ತಿದ್ದು, ಅದಾದ ಒಂದು ತಿಂಗಳ ಬಳಿಕ “ಪೊಗರು’ ಚಿತ್ರ ತೆರೆಗೆ ಬರಲಿದೆ ಎನ್ನಲಾಗುತ್ತಿದೆ. “ಪೊಗರು’ ಚಿತ್ರಕ್ಕೆ ನಂದ ಕಿಶೋರ್‌ ನಿರ್ದೇಶನವಿದ್ದು, ಚಿತ್ರದಲ್ಲಿ”ಕಿರಿಕ್‌’ ಚೆಲುವೆ ರಶ್ಮಿಕಾ ಮಂದಣ್ಣ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಒಟ್ಟಾರೆ ಈ ವರ್ಷದ ಬೇಸಿಗೆಗೆ “ಪೊಗರು’ ತೆರೆಗೆ ಬರೋದು ಬಹುತೇಕ ಖಚಿತವಾಗಿದ್ದು, ದಿನಾಂಕ ಮಾತ್ರ ಇನ್ನಷ್ಟೇ ನಿಗದಿಯಾಗಬೇಕಿದೆ.
