Winter Session: ಎಲೆಚುಕ್ಕೆ ರೋಗ; ಅಡಿಕೆ ಬೆಳೆಗಾರರಿಗೆ ಪರಿಹಾರಕ್ಕೆ ಆಗ್ರಹ

ಬೆಳಗಾವಿ: ಎಲೆಚುಕ್ಕೆ ರೋಗದಿಂದ ಸಂತ್ರಸ್ತರಾದ ಅಡಿಕೆ ಬೆಳೆಗಾರರಿಗೆ ಪರಿಹಾರ ನೀಡಬೇಕೆಂದು ಕಾಂಗ್ರೆಸ್‌ ಸದಸ್ಯರೂ ಸೇರಿ ಪಕ್ಷಾತೀತವಾಗಿ ಎಲ್ಲ ಶಾಸಕರೂ ಸರಕಾರದ ಮೇಲೆ ಒತ್ತಡ ಹೇರಿದರು.

ಶುಕ್ರವಾರ ವಿಧಾನಸಭೆ ಪ್ರಶ್ನೋತ್ತರ ಕಲಾಪದಲ್ಲಿ ಕಾಂಗ್ರೆಸಿನ ಭೀಮಣ್ಣ ಟಿ. ನಾಯ್ಕ, ಎಲೆಚುಕ್ಕೆ ರೋಗಕ್ಕೆ ಮದ್ದು ಕಂಡುಹಿಡಿಯುವ ಸಂಶೋಧನ ಕೇಂದ್ರವನ್ನು ಶಿರಸಿಯಲ್ಲಿ ಸ್ಥಾಪಿಸಬೇಕು ಹಾಗೂ ಅಡಿಕೆ ಬೆಳೆಗಾರರಿಗೆ ಪರಿಹಾರ ನೀಡಬೇಕು ಎಂದು ಆಗ್ರಹಿಸಿದರು.

ಇದಕ್ಕೆ ವಿಪಕ್ಷ ಶಾಸಕರಾದ ಆರಗ ಜ್ಞಾನೇಂದ್ರ, ಭಾಗೀರಥಿ ಮುರುಳ್ಯ ದನಿಗೂಡಿಸಿದರು.ತೋಟಗಾರಿಕೆ ಸಚಿವ ಎಸ್‌.ಎಸ್‌. ಮಲ್ಲಿಕಾರ್ಜುನ್‌ ಉತ್ತರಿಸಿ, ರಾಜ್ಯದಲ್ಲಿ ಎಲೆಚುಕ್ಕೆ ರೋಗದಿಂದ 53,977 ಹೆಕ್ಟೇರ್‌ ಪ್ರದೇಶದಲ್ಲಿ ಅಡಿಕೆ ಬೆಳೆ ಹಾನಿಗೀಡಾಗಿದೆ.

ತೋಟಗಾರಿಕೆ ಇಲಾಖೆಯಲ್ಲಿ ಪರಿಹಾರ ನೀಡಲು ಅವಕಾಶವಿಲ್ಲ. ರೋಗ ನಿಯಂತ್ರಣಕ್ಕಾಗಿ ಪರಿಹಾರಾತ್ಮಕ ಸಂಶೋಧನೆ ನಡೆಯುತ್ತಿವೆ. ಇದಕ್ಕಾಗಿ ಶಿವಮೊಗ್ಗ ವಿ.ವಿ.ಗೆ 50 ಲಕ್ಷ ರೂ.ಗಳನ್ನು ನೀಡಲಾಗಿದೆ. ಸಸ್ಯ ಸಂರಕ್ಷಣೆ ಔಷಧ ವಿತರಿಸಲಾಗುತ್ತಿದೆ ಎಂದರು.