ಕಾಸರವಳ್ಳಿ ಹೊಸ ಚಿತ್ರಕ್ಕೆ ಚಾಲನೆ

ಹಿರಿಯ ನಿರ್ದೇಶಕ ಗಿರೀಶ್‌ ಕಾಸರವಳ್ಳಿ ಅವರ ಹೊಸ ಚಿತ್ರಕ್ಕೆ ಇತ್ತೀಚೆಗೆ ಚಾಲನೆ ಸಿಕ್ಕಿದೆ. ಸಚಿವ ಶ್ರೀನಿವಾಸ ಪೂಜಾರಿ ಚಿತ್ರಕ್ಕೆ ಚಾಲನೆ ನೀಡಿದರು. ಗಿರೀಶ್‌ ಕಾಸರವಳ್ಳಿಯವರು ಏಳು ವರ್ಷಗಳ ನಂತರ ನಿರ್ದೇಶಿಸುತ್ತಿರುವ ಸಿನಿಮಾವಿದು. ಹಿರಿಯ ಕವಿ, ಸಾಹಿತಿ ಜಯಂತ್‌ ಕಾಯ್ಕಿಣಿ ಅವರ “ಹಾಲಿನ ಮೀಸೆ’ ಕಥೆ ಆಧರಿಸಿ ಕಾಸರವಳ್ಳಿಯವರು “ಇಲ್ಲಿರಲಾರೆ ಅಲ್ಲಿಗೆ ಹೋಗಲಾರೆ’ ಚಿತ್ರ ಮಾಡುತ್ತಿದ್ದಾರೆ.

ಮನುಷ್ಯ ಬದುಕು ಕಟ್ಟಿಕೊಳ್ಳಲು ತಾನಿರುವ ಜಾಗದಿಂದ ಬೇರೆಡೆ ಹೋಗಿ ಹೊಸ ಭವಿಷ್ಯ ಕಟ್ಟಿಕೊಳ್ಳುವ ತವಕ ಹಾಗೂ ಅನಿವಾರ್ಯವಾಗಿ ಹೊರ ಬಂದ ಬದುಕಿಗೆ ಮತ್ತೆ ಹಿಂದಿರುಗಲಾಗದೇ ಪಡುವ ತಾಕಲಾಟ, ತೊಳಲಾಟ ಹೇಗಿರುತ್ತದೆ ಎಂಬ ಕಥಾಹಂದರದೊಂದಿಗೆ ಈ ಚಿತ್ರ ಸಾಗುತ್ತದೆ. ಚಿತ್ರವನ್ನು ಎಸ್‌.ವಿ.ಶಿವಕುಮಾರ್‌ ನಿರ್ಮಿಸುತ್ತಿದ್ದು, ಎಚ್‌.ಎಂ.ರಾಮಚಂದ್ರ ಛಾಯಾಗ್ರಹಣವಿದೆ.