ಫೋಟೋ ತಿರುಚಿ ಗೇಲಿಗೊಳಗಾದ ಲಾಲು

ಪಾಟ್ನಾ: “ಲಾಲು ಬೇಸ್‌(ನೆಲೆ)ನಲ್ಲಿ ಯಾವ ಫೇಸೂ(ಮುಖ) ಲೆಕ್ಕಕ್ಕಿಲ್ಲ. ಬನ್ನಿ, ಗಾಂಧಿ ಮೈದಾನಕ್ಕೆ ಬಂದು ನಿಮ್ಮಿಂದ ಎಷ್ಟು ಸಾಧ್ಯವೋ ಅಷ್ಟನ್ನು ಲೆಕ್ಕ ಮಾಡಿ.’

ಹೀಗೊಂದು ಟ್ವೀಟ್‌ ಭಾನುವಾರ ಆರ್‌ಜೆಡಿ ನಾಯಕ ಲಾಲು ಪ್ರಸಾದ್‌ ಯಾದವ್‌ ಅವರ ಟ್ವಿಟರ್‌ ಖಾತೆಯಲ್ಲಿ ಮಿಂಚಿ, ಸಂಚಲನ ಮೂಡಿಸಿತ್ತು. ಆ ಟ್ವೀಟ್‌ನ ಮೇಲೆ ಲಕ್ಷಾಂತರ ಮಂದಿ ಸೇರಿದ್ದ ಗಾಂಧಿ ಮೈದಾನದ ಫೋಟೋವನ್ನೂ ಅಪ್‌ಲೋಡ್‌ ಮಾಡಲಾಗಿತ್ತು. ಈ ಫೋಟೋ ನೋಡಿ, ಬಿಜೆಪಿಗರು ಬಿಡಿ, ಸ್ವತಃ ಪ್ರತಿಪಕ್ಷಗಳವರ ಮೊಗದಲ್ಲೂ ಪ್ರಶ್ನಾರ್ಥಕ ಚಿಹ್ನೆಯೊಂದು ಮೂಡಿತ್ತು. ಈ ಕುರಿತು ಗುಸು ಗುಸು ಕೇಳಿಬಂದ ಸ್ವಲ್ಪ ಹೊತ್ತಲ್ಲೇ ಫೋಟೋದ ನೈಜ ಬಣ್ಣ ಬಯಲಾಯಿತು.

ಭಾನುವಾರ ಪಾಟ್ನಾದಲ್ಲಿ ನಡೆದ ರ್ಯಾಲಿಯಲ್ಲಿ 25 ಲಕ್ಷಕ್ಕೂ ಅಧಿಕ ಮಂದಿ ಸೇರಿದ್ದರು ಎಂಬುದನ್ನು ಬಿಂಬಿಸಲು ಹೋಗಿದ್ದ ಲಾಲು ಅವರ ತಂಡ, ಜನರು ಸೇರಿದ್ದ ಫೋಟೋವನ್ನು ಫೋಟೋಶಾಪ್‌ನಲ್ಲಿ ತಿರುಚಿ, ಅದಕ್ಕೆ ಇನ್ನೂ ಕೆಲವು ಜನರ ಚಿತ್ರಗಳನ್ನು ಕಾಪಿ, ಪೇಸ್ಟ್‌ ಮಾಡಿತ್ತು. 

ಇದು ಗೊತ್ತಾದೊಡನೆ ಬಿಹಾರ ಡಿಸಿಎಂ ಸುಶೀಲ್‌ ಮೋದಿ ಅವರು, ಗಾಂಧಿ ಮೈದಾನದಲ್ಲಿ ಸೇರಿದ್ದ ಜನರ ನೈಜ ಫೋಟೋ ಹಾಕಿ, “ಲಾಲು ಪ್ರಕಾರ ಈ ಸಂಖ್ಯೆ 25 ಲಕ್ಷವೇ’ ಎಂದು ಪ್ರಶ್ನಿಸಿದರು. ನಂತರ, ಈ ಎರಡೂ ಫೋಟೋಗಳು ಟ್ವಿಟರ್‌ನಲ್ಲಿ ಹರಿದಾಡಿ, ಜೋಕುಗಳೂ ಸೃಷ್ಟಿಯಾದವು. ಲಾಲು ರ್ಯಾಲಿಯಲ್ಲಿ ಭಾರೀ ಸಂಖ್ಯೆಯ ಜನ ಸೇರಿದ್ದಂತೂ ನಿಜ. ಹೀಗಿರುವಾಗ, ಮತ್ತಷ್ಟು ಜನರಿದ್ದಾರೆಂದು ತೋರಿಸಲು ಫೋಟೋವನ್ನು ಎಡಿಟ್‌ ಮಾಡುವ ಅಗತ್ಯವಿರಲಿಲ್ಲ ಎಂಬ ಮಾತುಗಳೂ ಕೇಳಿಬಂದವು.