ಹೊಸದಿಲ್ಲಿ: ಹಾಲಿ ಚಾಂಪಿಯನ್‌ ಲಕ್ಷ್ಯ ಸೇನ್‌ ಅವರು ತನ್ನ ದೇಶದವರೇ ಆದ ಎಚ್‌.ಎಸ್‌. ಪ್ರಣಯ್‌ ಅವರನ್ನು ನೇರ ಗೇಮ್‌ಗಳಿಂದ ಸೋಲಿಸಿ ಇಂಡಿಯಾ ಓಪನ್‌ ಬ್ಯಾಡ್ಮಿಂಟನ್‌ ಕೂಟದಲ್ಲಿ ದ್ವಿತೀಯ ಸುತ್ತಿಗೇರಿದ್ದಾರೆ.
ಇದೇ ವೇಳೆ ಒಲಿಂಪಿಯನ್‌ ಪಿ.ವಿ. ಸಿಂಧು ವನಿತೆಯರ ಸಿಂಗಲ್ಸ್‌ನಲ್ಲಿ ಥಾಯ್ಲೆಂಡಿನ ಸುಪನಿದಾ ಕಾತೆಹಾಂಗ್‌ ಅವರ ಕೈಯಲ್ಲಿ ಸೋತು ಹೊರಬಿದ್ದಿದ್ದಾರೆ.
ವಿಶ್ವದ 12ನೇ ರ್‍ಯಾಂಕಿನ ಸೇನ್‌ ಅವರು ಪ್ರಣಯ್‌ ಅವರನ್ನು 21-14, 21-15 ಗೇಮ್‌ಗಳಿಂದ ಸೋಲಿಸಲು ಯಶಸ್ವಿಯಾಗಿದ್ದಾರೆ. ಕಳೆದ ವಾರ ನಡೆದ ಮಲೇಷ್ಯಾ ಓಪನ್‌ನ ಪಂದ್ಯದಲ್ಲೂ ಅವರಿಬ್ಬರು ಮುಖಾಮುಖಿಯಾಗಿದ್ದು ಪ್ರಣಯ್‌ ಜಯ ಸಾಧಿಸಿದ್ದರು. ಸೇನ್‌ ಅವರು ಮುಂದಿನ ಸುತ್ತಿನ ಹೋರಾಟದಲ್ಲಿ ಡೆನ್ಮಾರ್ಕ್‌ನ ರಾಸ್ಮಸ್ ಗೆಮ್ಕೆ ಅವರನ್ನು ಎದುರಿಸಲಿದ್ದಾರೆ.
ಮಾಜಿ ಚಾಂಪಿಯನ್‌ ಆಗಿರುವ ಸಿಂಧು ಅವರು ಕಾತೆಹಾಂಗ್‌ ಅವರೆದುರು 12-21, 20-22 ಗೇಮ್‌ಗಳಿಂದ ಸೋಲನ್ನು ಕಂಡರು. ಕಳೆದ ಋತುವಿನ ಸೆಮಿಫೈನಲ್‌ನಲ್ಲಿ ಸಿಂಧು ಅವರು ಇವರೆದುರು ಸೋತಿದ್ದರು.
ಹಾಲಿ ಚಾಂಪಿಯನ್ಸ್‌ ಸಾತ್ವಿಕ್‌ಸಾಯಿರಾಜ್‌ ರಾಂಕಿರೆಡ್ಡಿ ಮತ್ತು ಚಿರಾಗ್‌ ಶೆಟ್ಟಿ ಅವರು ಸ್ಕಾಟ್ಲೆಂಡಿನ ಕ್ರಿಸ್ಟೋಫ‌ರ್‌ ಗ್ರಿಮ್ಲೆ ಮತ್ತು ಮ್ಯಾಥ್ಯೂ ಗ್ರಿಮ್ಲೆ ಅವರನ್ನು 21-13, 21-15 ಗೇಮ್‌ಗಳಿಂದ ಸೋಲಿಸಿ ದ್ವಿತೀಯ ಸುತ್ತು ತಲುಪಿದ್ದಾರೆ. ಭಾರತದ ಸಿಕ್ಕಿ ರೆಡ್ಡಿ ಮತ್ತು ಶ್ರುತಿ ಮಿಶ್ರಾ ಅವರು ಜರ್ಮನಿಯ ಲಿಂಡಾ ಎಫ್ಲೇರ್‌ ಮತ್ತು ಇಶಾಬೆಲ್‌ ಲೊಹಾವು ಅವರೆದುರು 17-21, 19-21 ಗೇಮ್‌ಗಳಿಂದ ಸೋತು ಹೊರಬಿದ್ದರು.
