ಕೃಷ್ಣಾ  ನೀ ಬೇಗನೆ ಬಾರೋ…

ಉಡುಪಿ: ಶ್ರೀಕೃಷ್ಣ ಮಠಕ್ಕೆ ಸೋಮವಾರ ಪ್ರಸಿದ್ಧ ಸಂಗೀತಗಾರ ಡಾ| ಕೆ.ಜೆ. ಯೇಸುದಾಸ್‌ ಅವರು ಸಕುಟುಂಬಿಕರಾಗಿ ಆಗಮಿಸಿ ದೇವರ ದರ್ಶನ ಪಡೆದ ಬಳಿಕ ಶ್ರೀಕೃಷ್ಣ ಮಠದ ಗರ್ಭಗುಡಿ ಎದುರಿನ ಚಂದ್ರಶಾಲೆಯಲ್ಲಿ “ಕೃಷ್ಣಾ ನೀ ಬೇಗನೆ ಬಾರೋ…’ ದಾಸರ ಹಾಡನ್ನು ಸುಶ್ರಾವ್ಯವಾಗಿ ಹಾಡಿದರು.

ಸುಮಾರು ಐದು ಶತಮಾನಗಳ ಹಿಂದೆ ಶ್ರೀ ವ್ಯಾಸರಾಜತೀರ್ಥರು ಬರೆದ ಈ ಹಾಡು ಬಹಳ ಸಂಗೀತಗಾರರ ಕಂಠದಲ್ಲಿ ಹೊರಹೊಮ್ಮಿ ಜನಪ್ರಿಯಗೊಂಡಿದೆ. ಯೇಸುದಾಸ್‌ ಅವರು ಯಾವುದೇ ಪಕ್ಕವಾದ್ಯಗಳಿಲ್ಲದೆ ತಲ್ಲೀನರಾಗಿ ಹಾಡಿದರು. ಪರ್ಯಾಯ ಶ್ರೀ ಪೇಜಾವರ ಮಠದ ಶ್ರೀ ವಿಶ್ವೇಶತೀರ್ಥ ಶ್ರೀಪಾದರು ಯೇಸುದಾಸರ ಹಾಡನ್ನು ಕೇಳಿ ಪ್ರಸಾದ ನೀಡಿ ಹರಸಿದರು.