Advertisement
ಈ ದಾಳಿಯಲ್ಲಿ 24 ಮಂದಿ ಪೊಲೀಸರ ಅತಿಥಿಯಾಗಿದ್ದಾರೆ. ಮೂರು ಕಾರು, ನಾಲ್ಕು ದ್ವಿಚಕ್ರ ವಾಹನಗಳನ್ನೂ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಇಸ್ಪೀಟು ಜುಗಾರಿ ಆಟದಲ್ಲಿ ನಿರತರಾದ ಅಬ್ದುಲ್‌ ಮುನೀರ್‌, ಸಲ್ಮಾನ್‌, ಬಸವರಾಜ, ವಿಷ್ಣು ಕೆ.ವಿ., ದಿನೇಶ್‌, ಕೆ. ವಿನಾಯಕ, ಸಂದೀಪ, ಕೃಷ್ಣ, ಸುಧಾಕರ, ನಾಗರಾಜ, ಸುಬ್ರಹ್ಮಣ್ಯ, ಶ್ರೀಧರ, ಇ. ಆ್ಯಂಟನಿ ಮಸ್ಕರೇನಸ್‌, ಶೃತಿರಾಜ್‌, ರಘು, ಹುಸೇನ್‌, ಸಂದೇಶ್‌, ರಾಜು ಮೊಗೇರ, ಗೋಪಾಲ, ಗಣೇಶ್‌, ಮಿಥುನ್‌, ಸುಧರ್ಮ, ಕಮಲಾಕ್ಷ ಹಾಗೂ ಸುಧಾಕರ ಅವರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಇತ್ತೀಚಿನ ದಿನಗಳಲ್ಲಿ ಕರಾವಳಿಯಲ್ಲಿ ಗಾಂಜಾ, ಮಟ್ಕಾ, ಇಸ್ಪೀಟು ಜುಗಾರಿ ಅಡ್ಡೆಗಳು ಮತ್ತಿತರ ಅಕ್ರಮ ದಂಧೆಗಳು ವಿಸ್ತರಿಸುತ್ತಲೇ ಹೋಗುತ್ತಲಿವೆ. ಅಲ್ಲಲ್ಲಿ ಕೆಲವು ದಾಳಿಗಳು, ಕೇಸಿಗಾಗಿ ಠಾಣೆಗಳಿಗೆ ದಂಧೆಕೋರರನ್ನು ಕರೆಯಿಸಿ ಪೊಲೀಸರು ಪ್ರಕರಣ ದಾಖಲಿಸಿಕೊಳ್ಳುತ್ತಿದ್ದಾರೆ. ಕೆಲವು ಕಡೆಗಳಲ್ಲಿ ಪೊಲೀಸರೇ ಅಕ್ರಮ ಅಡ್ಡೆಗಳಿಗೆ ಸಾಥ್‌ ನೀಡುತ್ತಿದ್ದಾರೆ ಎನ್ನುವ ಮಾತುಗಳೂ ಸಾರ್ವಜನಿಕ ವಲಯದಿಂದ ಕೇಳಿಬರುತ್ತಲೇ ಇದೆ. ಮೊಳಹಳ್ಳಿ ಗ್ರಾಮದಲ್ಲಿ ಅಕ್ರಮ ಇಸ್ಪೀಟು ಜುಗಾರಿ ಅಡ್ಡೆಗೆ ಕೋಟ ಪೊಲೀಸರಿಂದ ನಡೆದ ಬೃಹತ್‌ ದಾಳಿಯಂತೆಯೇ ಹೆಚ್ಚಿನ ಪ್ರಮಾಣದ ದಾಳಿಗಳು ಕರಾವಳಿಯಾದ್ಯಂತ ನಡೆಯಬೇಕಿದೆ. ಮಂಗಳೂರು, ಉಡುಪಿ ಪೊಲೀಸರು ಗಾಂಜಾ ಪ್ರಕರಣಗಳ ಬೆನ್ನು ಬಿದ್ದು ವಿಶೇಷ ಕಾರ್ಯಾಚರಣೆ ನಡೆಸುತ್ತಿರುವಂತೆಯೇ ವೇಶ್ಯಾವಾಟಿಕೆ, ಮಟ್ಕಾ, ಇಸ್ಪೀಟು ಅಡ್ಡೆಗಳ ಮೇಲೂ ನಿರಂತರ ದಾಳಿಗಳಾಗಬೇಕಿದೆ. ಬೇರುಮಟ್ಟದಿಂದ ಈ ದಂಧೆಗಳನ್ನು ಮಟ್ಟ ಹಾಕಲು ಅಸಾಧ್ಯವಾದರೂ, ನಿರಂತರ ದಾಳಿಯಾದರೆ ಅಕ್ರಮ ಚಟುವಟಿಕೆಗಳು ರಾಜಾರೋಷವಾಗಿ ವಿಸ್ತರಣೆಯಾಗಿ ಸಮಾಜಕ್ಕೆ ಕಂಠಕವಾಗುವುದಂತು ತಪ್ಪುತ್ತದೆ. ಈ ಬಗ್ಗೆ ಸುದೀರ್ಘ ವಿಶೇಷ ಕಾರ್ಯಾಚರಣೆ ನಡೆಸುವತ್ತ ಹಿರಿಯ ಪೊಲೀಸ್‌ ಅಧಿಕಾರಿಗಳು ಗಮನಹರಿಸಿದರೆ ಉತ್ತಮ ಎನ್ನುವುದು ಸಾರ್ವಜನಿಕ ವಲಯದ ಅಭಿಮತ.