ಬೆಂಗಳೂರು: ವಿಕ್ರಾಂತ್‌ ರೋಣದ ಬಳಿಕ ಕಿಚ್ಚ ಸುದೀಪ್ ಯಾವ ಸಿನಿಮಾವನ್ನು ಮಾಡಲಿದ್ದಾರೆ ಎನ್ನುವ ಕುತೂಹಲ ಅಭಿಮಾನಿಗಳದ್ದು, ಈ ಕುರಿತಾಗಿ ಇತ್ತೀಚೆಗೆ ಅವರು ಒಂದು ಸುಳಿವನ್ನು ನೀಡಿದ್ದರು. ಮೂರು ಸ್ಕ್ರಿಪ್ಟ್‌ ಗಳನ್ನು ಆಯ್ದುಕೊಂಡಿದ್ದೇನೆ ಎಂದು ಹೇಳಿದ್ದರು. ಇದೀಗ ಈ ಬಗ್ಗೆ ಮತ್ತೊಂದು ಬಿಗ್‌ ಅಪ್ಡೇಡ್‌ ನೀಡಿದ್ದಾರೆ.
ಕಿಚ್ಚ ನಾಯಕನಾಗಿ ಮಿಂಚಿದ್ದ ʼವಿಕ್ರಾಂತ್‌ ರೋಣʼ ಬಾಕ್ಸ್‌ ಆಫೀಸ್‌ ನಲ್ಲಿ ಒಳ್ಳೆ ಕಮಾಯಿ ಮಾಡಿತ್ತು. ಇದಾದ ಬಳಿಕ ಉಪ್ಪಿ ಅವರ ʼಕಬ್ಬʼ ಚಿತ್ರದಲ್ಲಿ ಭಾರ್ಗವ ಭಕ್ಷಿಯಾಗಿ ಕಾಣಿಸಿಕೊಂಡಿದ್ದರು. ಕಿಚ್ಚನ 46ನೇ ಸಿನಿಮಾ ಯಾವುದೆನ್ನುವುದು ಸದ್ಯದ ಕುತೂಹಲ.
ಕಿಚ್ಚ46 ಬಗ್ಗೆ ಕೆಲ ಸಮಯದಿಂದ ಟ್ವೀಟ್‌, ಮಿಮ್ಸ್‌ ಗಳು ಹರಿದಾಡುತ್ತಿದೆ. ಇದು ನನಗೆ ತುಂಬಾ ಸ್ಪೆಷೆಲ್ ಎಂದು ಹೇಳಿ ಸದ್ಯ ಮೂರು ಸ್ಕ್ರಿಪ್ಟ್‌ ಗಳನ್ನು ಅಂದರೆ ಮೂರು ಸಿನಿಮಾಗಳನ್ನು ಫೈನಲ್‌ ಮಾಡಿದ್ದೇನೆ. ಈ ಕುರಿತು ಸಿದ್ದತೆಗಳು ನಡೆಯುತ್ತಿದೆ. ಮೂರು ಸ್ಕ್ರಿಪ್ಟ್‌ ಗಳಿಗೆ ಸಾಕಷ್ಟು ಪರಿಶ್ರಮಬೇಕು. ಈ ಕುರಿತು ಆಯಾ ಸಿನಿಮಾ ತಂಡ ಸಿದ್ದತೆಗಳನ್ನು ನಡೆಸುತ್ತಿದೆ. ಶೀಘ್ರದಲ್ಲಿ ಹೊಸ ಪ್ರಾಜೆಕ್ಟ್‌ ಬಗ್ಗೆ ಘೋಷಣೆ ಮಾಡುತ್ತೇನೆ ಎಂದು ಇತ್ತೀಚೆಗಷ್ಟೇ ಟ್ವಿಟರ್‌ ನಲ್ಲಿ ಬರೆದುಕೊಂಡಿದ್ದರು.
ಇದೀಗ ಈ ಬಗ್ಗೆ ಶನಿವಾರ ಮುಂಜಾನೆ (ಎ.29 ರಂದು) ಕಿಚ್ಚ ಟ್ವಿಟರ್‌ ನಲ್ಲಿ ಮತ್ತೊಂದು ಅಪ್ಡೇಡ್‌ ನೀಡಿದ್ದಾರೆ. “ನಾನು ಆಯ್ದುಕೊಂಡ ಮೂರು ಸಿನಿಮಾಗಳಲ್ಲಿ ಒಂದು ಸಿನಿಮಾದ ಪ್ರೋಮೋ ಶೂಟ್ ಇದೇ ಮೇ.22 ರಂದು ನಡೆಯಲಿದೆ ಎಂದು ಹೇಳಲು ತುಂಬಾ ಸಂತೋಷವಾಗುತ್ತಿದೆ. ಜೂ. 1 ರಂದು ಅದು ಲಾಂಚ್‌ ಆಗಲಿದೆ. ಈ ಸಿನಿಮಾ ಮಾಡಲು ತುಂಬಾ ಉತ್ಸುಕನಾಗಿದ್ದೇನೆ” ಎಂದು ಬರೆದುಕೊಂಡಿದ್ದಾರೆ.
ಇದನ್ನು ಕೇಳಿದ ಕಿಚ್ಚನ ಅಭಿಮಾನಿಗಳು ಭಾರೀ ಖುಷ್‌ ಆಗಿದ್ದಾರೆ. ತಮ್ಮ ಮೆಚ್ಚಿನ ನಟನ ಸಿನಿಮಾದ ಟೈಟಲ್‌ ಯಾವುದಾಗಿರಬಹುದು, ನಿರ್ದೇಶಕರು ಯಾರಾಗಿರಬಹುದು ಎನ್ನುವ ಯೋಚನೆಯಲ್ಲಿ ನಿರತರಾಗಿದ್ದಾರೆ.
