ಸಂಪೂರ್ಣ ಕನ್ನಡ ಅಕ್ಷರಗಳಿರುವ ಕೀಲಿಮಣೆ ರಚನೆ

ಬೆಂಗಳೂರು: ಕನ್ನಡ ಟೈಪಿಂಗ್‌ ಸುಲಭವಾಗಿ ಕಲಿಯಬಹುದಾದ ಹಾಗೂ ಕನ್ನಡ ಸೇರಿ ಐದು ಭಾಷೆಗಳನ್ನು ಕಲಿಯುವಂತಹ ಕೀಲಿಮಣೆಯನ್ನು ಕ-ನಾದ ಸಂಸ್ಥೆ ಅಭಿವೃದ್ಧಿಪಡಿಸಿದೆ. 

ಬೆಂಗಳೂರು ಮೂಲದ ಕ-ನಾದ ಸಂಸ್ಥೆಯು ಸಂಪೂರ್ಣ ಕನ್ನಡ ಅಕ್ಷರಗಳಿಂದ ಕೂಡಿದ ಕೀಲಿಮಣೆ ವಿನ್ಯಾಸಗೊಳಿಸಿದೆ. ಇಂಗ್ಲಿಷ್‌ ಅಕ್ಷರಗಳಿರುವ ಕೀಲಿಮಣೆಯಲ್ಲಿ ಮಕ್ಕಳು ಸುಲಭವಾಗಿ ಕನ್ನಡ ಟೈಪಿಂಗ್‌ ಕಲಿಯಲು ಸಾಧ್ಯವಾಗುವುದಿಲ್ಲ.

ಆದರೆ, ಹೊಸ ಕೀಲಿಮಣೆಯಿಂದ ಕನ್ನಡ ಟೈಪಿಂಗ್‌ ಸುಲಭವಾಗಿ ಕಲಿಯಬಹುದಾಗಿದೆ. ಕನ್ನಡ ಭಾಷೆಯೊಂದಿಗೆ ಮಲಯಾಳಂ, ತೆಲುಗು, ಸಂಸ್ಕೃತ ಹಾಗೂ ಹಿಂದಿ ಭಾಷೆಗಳನ್ನು ಕೂಡ ಕಲಿಯಬಹುದಾಗಿದೆ.

ವಿಶೇಷವೆಂದರೆ ಕನ್ನಡ ಭಾಷೆಯಲ್ಲಿ ನಿಮ್ಮ ಹೆಸರು ಟೈಪ್‌ ಮಾಡಿದರೆ, ಇತರೆ ಭಾಷೆಗಳಲ್ಲಿ ನಿಮ್ಮ ಹೆಸರು ಟೈಪ್‌ ಆಗುತ್ತದೆ. ಕನ್ನಡ ಗಣಕ ಪರಿಷತ್ತಿನೊಂದಿಗೆ ಒಪ್ಪಂದ ಮಾಡಿಕೊಳ್ಳಲು ಸಂಸ್ಥೆ ಮುಂದಾಗಿದ್ದು, ಶೀಘ್ರವೇ ಹೊಸ ತಂತ್ರಾಂಶ ಮಾರುಕಟ್ಟೆಗೆ ಬರಲಿದೆ ಎಂದು ಕ-ನಾದ ಸಂಸ್ಥೆಯ ಗುರುಪ್ರಸಾದ್‌ ಮಾಹಿತಿ ನೀಡಿದರು.