ಸಲಿಂಗಿ ದಂಪತಿಗಳ ಮಗುವಿನ ನಾಮಕರಣ ಸಮಾರಂಭ; ಹಿತೈಷಿಗಳು ಭಾಗಿ

ಕೋಝಿಕ್ಕೋಡ್:ಇತ್ತೀಚೆಗಷ್ಟೇ ಮಗುವಿಗೆ ಜನ್ಮ ನೀಡಿದ ಕೇರಳದ ಸಲಿಂಗಿ ದಂಪತಿಗಳು ಅಂತಾರಾಷ್ಟ್ರೀಯ ಮಹಿಳಾ ದಿನದಂದು ತಮ್ಮ ನವಜಾತ ಶಿಶುವಿಗೆ ನಾಮಕರಣ ಸಮಾರಂಭವನ್ನು ನಡೆಸಿದ್ದಾರೆ.

ಬುಧವಾರ ಸಂಜೆ ನಡೆದ ಸಮಾರಂಭದಲ್ಲಿ ಮಗುವಿಗೆ ”ಜಬಿಯಾ ಜಹದ್” ಎಂದು ನಾಮಕರಣ ಮಾಡಲಾಯಿತು, ಇದರಲ್ಲಿ ಹಲವಾರು ಟ್ರಾನ್ಸ್‌ಜೆಂಡರ್ ಸಮುದಾಯದ ವ್ಯಕ್ತಿಗಳು ಮತ್ತು ಸಮಾಜದ ವಿವಿಧ ಕ್ಷೇತ್ರಗಳ ಹಿತೈಷಿಗಳು ಭಾಗವಹಿಸಿದ್ದರು.

ಉತ್ಸುಕರಾದ ಜಿಯಾ ಪಾವಲ್ ಮತ್ತು ಜಹದ್ ಅವರು ತಮ್ಮ ಮಗು ಸಮಾಜದಲ್ಲಿ ಬೆಳಕನ್ನು ಹರಡಲಿ ಎಂದು ಹಾರೈಸಿದರು. ಮಗುವಿನ ಲಿಂಗವನ್ನು ಬಹಿರಂಗಪಡಿಸಲು ಅವರು ಬಯಸುವುದಿಲ್ಲ ಎಂಬ ಅವರ ಹಿಂದಿನ ಘೋಷಣೆಯ ಬಗ್ಗೆ ಕೇಳಿದಾಗ, ಪಾವಲ್ ಅದನ್ನು ಜಗತ್ತಿಗೆ ಬಹಿರಂಗಪಡಿಸುವ ಸಂದರ್ಭಕ್ಕಾಗಿ ಕಾಯುತ್ತಿದ್ದೇವೆ ಎಂದು ಹೇಳಿದರು.

ಮಗುವಿಗೆ ಇಟ್ಟ ಹೆಣ್ಣಿನ ಹೆಸರಿನ ಕುರಿತು ಕೇಳಿದಾಗ “ಈಗ ಅದು ಎಲ್ಲರಿಗೂ ಸ್ಪಷ್ಟವಾಗಿದೆ. ನಮ್ಮ ಮಗುವಿನ ಜನನವು ಎಲ್ಲರಿಗೂ ತಿಳಿಯಬೇಕೆಂದು ನಾವು ನಿಜವಾಗಿಯೂ ಬಯಸಿದ್ದೇವೆ. ನನ್ನ ಆಸೆ ಈಡೇರಿದ್ದಕ್ಕೆ ನನಗೆ ತುಂಬಾ ಖುಷಿಯಾಗಿದೆ. ಈ ಸಮಾರಂಭ ಕನಸಾಗಿತ್ತು” ಎಂದು ಅವರು ಹೇಳಿದರು.

ಕಳೆದ ತಿಂಗಳು ಇಲ್ಲಿನ ಸರಕಾರಿ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ಮಗುವಿಗೆ ಜನ್ಮ ನೀಡಿದ ಆಕೆಯ ಸಂಗಾತಿ ಜಹಾದ್,ಮುಂದಿನ ಆರು ತಿಂಗಳವರೆಗೆ ನಮಗೆ ಸಂಪೂರ್ಣವಾಗಿ ವಿಶ್ರಾಂತಿ ಪಡೆಯಬೇಕಾಗಿದೆ” ಎಂದು ಟ್ರಾನ್ಸ್‌ಮ್ಯಾನ್ ಹೇಳಿದರು.