ಆರೋಗ್ಯ ಯೋಧರು: ಜಿಲ್ಲೆ ಪೂರ್ತಿ ಹೊಲಿಗೆ ಯಂತ್ರದ ಸದ್ದು

ಜಮ್ಮು ಮತ್ತು ಕಾಶ್ಮೀರದ ಅನಂತ್‌ ನಾಗ್‌ ಜಿಲ್ಲೆಯಲ್ಲೀಗ ಕೇವಲ ಹೊಲಿಗೆ ಯಂತ್ರಗಳ ಸದ್ದು ಮಾತ್ರವೇ ಕೇಳಿಸುತ್ತಿದೆ. ಲಾಕ್‌ ಡೌನ್‌ ಆಗಿರುವ ಕಾರಣ ಮನೆಗಳಿಂದ ಯಾರೂ ಹೊರಬರುತ್ತಿಲ್ಲ. ವಾಹನಗಳು ಓಡಾಡುತ್ತಿಲ್ಲ. ಹಾಗಾದರೆ, ಹೊಲಿಗೆ ಸದ್ದು ಏಕೆ ಕೇಳಿಬರುತ್ತಿದೆ ಎಂದು ಯೋಚಿಸುತ್ತಿದ್ದೀರಾ? ಇಲ್ಲಿನ ಬಹುತೇಕ ಯುವತಿಯರು ಸ್ವಯಂಪ್ರೇರಿತರಾಗಿ ಆರೋಗ್ಯ ಸೇವಾ ಸಿಬಂದಿಗೆಂದು ಮಾಸ್ಕ್ ಗಳು ಹಾಗೂ ಪಿಪಿಇ ಗಳನ್ನು (ವೈಯಕ್ತಿಕ ಸುರಕ್ಷಾ ಸಾಧನ) ಹೊಲಿಯುತ್ತಿದ್ದಾರೆ.

ಹೊಸದಾಗಿ ಕೇಂದ್ರಾಡಳಿತ ಪ್ರದೇಶವಾಗಿ ಅಸ್ತಿತ್ವಕ್ಕೆ ಬಂದಿರುವ ಇಲ್ಲಿ ಇದುವರೆಗೆ ಒಟ್ಟಾರೆ 152 ಕೋವಿಡ್ ಸೋಂಕಿನ ಪ್ರಕರಣಗಳು ದೃಢಪಟ್ಟಿವೆ. ಕಾಶ್ಮೀರದಲ್ಲಿ ಮಾಸ್ಕ್ ಗಳಿಗೆ ಭಾರೀ ಕೊರತೆಯಿದೆ ಎಂಬುದು ನಮಗೆ ಗೊತ್ತು. ಈ ರೀತಿಯಲ್ಲಾದರೂ ಸಮಾಜಕ್ಕೆ ನಮ್ಮಿಂದಾದ ಕೊಡುಗೆ ನೀಡೋಣ ಎಂಬ ನಿಟ್ಟಿನಲ್ಲಿ ಮಾಸ್ಕ್ ಹಾಗೂ ಪಿಪಿಇ ತಯಾರಿಸುತ್ತಿದ್ದೇವೆ. ಬೆಳಗ್ಗೆ 9ರಿಂದ ಸಂಜೆ 5 ರವರೆಗೆ ನಿರಂತರವಾಗಿ ಹೊಲಿಗೆ ಕೆಲಸದಲ್ಲಿ ತೊಡಗಿಸಿಕೊಳ್ಳುತ್ತಿದ್ದೇವೆ. ಹೆಚ್ಚು ಹೆಚ್ಚು ಮಾಸ್ಕ್ ತಯಾರಿಸಿದಷ್ಟೂ ನಮ್ಮ ಸಮಾಜಕ್ಕೇ ಅನುಕೂಲ ಎನ್ನುವುದು ಈ ಯುವತಿಯರ ಮಾತು.