ಕೆಎಎಸ್‌ ಪರೀಕ್ಷೆ: ಯತೀಶ್‌ಗೆ 8ನೇ ರಾಂಕ್

ಮಂಗಳೂರು: ಕರ್ನಾಟಕ ಲೋಕಸೇವಾ ಆಯೋಗ ನಡೆಸಿದ 2014ನೇ ಸಾಲಿನ ಕೆಎಎಸ್‌ ಪರೀಕ್ಷೆಯಲ್ಲಿ ಮಂಗಳೂರು ತಾಲೂಕು ಹಳೆಯಂಗಡಿ ತೋಕೂರು ನಿವಾಸಿ ಯತೀಶ್‌ ಉಳ್ಳಾಲ್‌ 8ನೇ ರ್‍ಯಾಂಕ್‌ ಪಡೆಯುವ ಮೂಲಕ ಸಹಾಯಕ ಆಯುಕ್ತ ಸ್ಥಾನಕ್ಕೆ ಆಯ್ಕೆಯಾಗಿದ್ದಾರೆ.

ಪ್ರಸ್ತುತ ಮೂಡಬಿದಿರೆಯ ಮೈಟ್‌ ಎಂಜಿನಿಯರಿಂಗ್‌ ಕಾಲೇಜಿನಲ್ಲಿ ಕೆಮೆಸ್ಟ್ರಿ ಅಸಿಸ್ಟೆಂಟ್‌ ಪ್ರೊಫೆಸರ್‌ ಆಗಿರುವ ಅವರು ಮೂಲತಃ ಉಳ್ಳಾಲ ನಿವಾಸಿ. ಮೂಲ್ಕಿಯಲ್ಲಿ ಪದವಿಯವರೆಗೆ ವಿದ್ಯಾಭ್ಯಾಸ ನಡೆಸಿ, ಎನ್‌ಐಟಿಕೆಯಲ್ಲಿ ಉನ್ನತ ಅಧ್ಯಯನ ನಡೆಸಿದ್ದಾರೆ.

ಉಭಯ ಜಿಲ್ಲೆಗಳಿಂದ ಒಂಬತ್ತು ಮಂದಿ ಕರ್ನಾಟಕ  ಲೋಕಸೇವಾ ಆಯೋಗ ನಡೆಸಿದ ಪರೀಕ್ಷೆಯಲ್ಲಿ ಸಹಾಯಕ ಆಯುಕ್ತ ಹುದ್ದೆಯ ಟಾಪ್‌ 30ರಲ್ಲಿ ಆಯ್ಕೆಯಾಗಿದ್ದಾರೆ. 2014ರ ಗೆಜೆಟ್‌ ಪ್ರೊಬೆಷನರಿ ಹುದ್ದೆಗಳ ನೇಮಕಾತಿಗೆ ಸಂಬಂಧಿಸಿದಂತೆ ಅಂತಿಮ ಫಲಿತಾಂಶ ಶನಿವಾರ ಹೊರಬಿದ್ದಿದ್ದು, ಒಟ್ಟು 464 ಮಂದಿ ಅಂತಿಮ ಪಟ್ಟಿಯಲ್ಲಿದ್ದಾರೆ. ಮೊದಲ 56 ಸ್ಥಾನ ಪಡೆದಿರುವವರನ್ನು ಸಹಾಯಕ ಆಯುಕ್ತ ಹುದ್ದೆಗಳಿಗೆ ಆಯ್ಕೆ ಮಾಡಲಾಗಿದೆ. ಈ ಪಟ್ಟಿಯಲ್ಲಿ ಜಿಲ್ಲೆಯ ಇಬ್ಬರು ಸ್ಥಾನ ಪಡೆದುಕೊಂಡಿದ್ದಾರೆ.