ಚುನಾವಣೆ ವೆಚ್ಚ 10,500 ಕೋಟಿ?

ಹೊಸದಿಲ್ಲಿ: ಕರ್ನಾಟಕ ಚುನಾವಣೆ ಪ್ರಚಾರ ಸಂದರ್ಭದಲ್ಲಿ ವಶಪಡಿಸಿಕೊಂಡ ಅಕ್ರಮ ಹಣ 2013ರ ಚುನಾವಣೆಗಿಂತ 9-10 ಪಟ್ಟು ಹೆಚ್ಚು. ಸ್ವತಃ ಚುನಾವಣ ಆಯೋಗ ಈಗಾಗಲೇ ಈ ಮಾಹಿತಿ ನೀಡಿದೆ. ಆದರೆ ಈ ಚುನಾವಣೆಗಾಗಿ ವಿವಿಧ ಪಕ್ಷಗಳು ಮತ್ತು ಅಭ್ಯರ್ಥಿಗಳು ಮಾಡಿರುವ ಖರ್ಚಿನ ಮೊತ್ತ ಕೇಳಿದರೆ ಬೆಚ್ಚಿ ಬೀಳಬೇಕು. ಕಾರಣ ಅದು ಬರೋಬ್ಬರಿ 9,500 ಕೋಟಿ ರೂ.ಗಳಿಂದ 10,500 ಕೋಟಿ ರೂ.!

ಉಸಿರು ಬಿಗಿ ಹಿಡಿದು ಕೇಳಿಸಿಕೊಳ್ಳಬೇಕಾದ ಇಂಥದ್ದೊಂದು ಮಾಹಿತಿಯನ್ನು ದಿಲ್ಲಿಯ ಸೆಂಟರ್‌ ಫಾರ್‌ ಮೀಡಿಯಾ ಸ್ಟಡೀಸ್‌ (ಸಿಎಂಎಸ್‌) ಸೋಮವಾರ ಬಿಡುಗಡೆ ಮಾಡಿದೆ. ಕರ್ನಾಟಕದಲ್ಲಿ ಐದು ವರ್ಷಗಳ ಹಿಂದೆ ನಡೆದಿದ್ದ ವಿಧಾನಸಭೆ ಚುನಾವಣೆಗೆ ಹೋಲಿಕೆ ಮಾಡಿದರೆ ಇದು ಅತ್ಯಂತ “ವೆಚ್ಚದಾಯಕ ವಿಧಾನಸಭೆ ಚುನಾವಣೆ’ ಎಂದೂ ಸಿಎಂಎಸ್‌ ಹೇಳಿದೆ. ಈ ಲೆಕ್ಕಾಚಾರದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಕೈಗೊಂಡಿರುವ ಪ್ರಚಾರದ ಖರ್ಚು ಸೇರಿಲ್ಲ.

ಇದು ಹೀಗೇ ಮುಂದುವರಿದರೆ 2019ರಲ್ಲಿ ನಡೆಯಲಿರುವ ಲೋಕ ಸಭೆ ಚುನಾವಣೆಗೆ ಪಕ್ಷಗಳು 50 ಸಾವಿರ ಕೋಟಿ ರೂ.ಗಳಿಂದ 60 ಸಾವಿರ ಕೋಟಿ ರೂ.ಗಳ ವರೆಗೆ ವೆಚ್ಚ ಮಾಡುವುದು ಖಚಿತ ಎಂದು ಅದು ತನ್ನ ಅಧ್ಯಯನದಲ್ಲಿ ಹೇಳಿದೆ. 2014ರ ಚುನಾವಣೆಗೆ ಆಜೂಬಾಜು 30 ಸಾವಿರ ಕೋಟಿ ರೂ. ವೆಚ್ಚವಾಗಿರಬಹುದು ಎಂದು ಸಿಎಂಎಸ್‌ನ ಎನ್‌. ಭಾಸ್ಕರ ರಾವ್‌ ಹೇಳಿದ್ದಾರೆ.

ಈ ಬಾರಿಯ ಚುನಾವಣೆಯ ಒಟ್ಟು ವೆಚ್ಚದ ಪೈಕಿ ಅಭ್ಯರ್ಥಿಯ ವೆಚ್ಚದ ಪ್ರಮಾಣವೂ ಶೇ.75ರಷ್ಟು ವೃದ್ಧಿಯಾಗಿದೆ. ಹೀಗಾಗಿ ವೈಯಕ್ತಿಕ ನೆಲೆಯಲ್ಲಿ ಲೋಕ ಸಭೆ ಚುನಾವಣೆ ವೇಳೆ ಅಭ್ಯರ್ಥಿ ವೆಚ್ಚ ಮಾಡುವ ಪ್ರಮಾಣ ಶೇ. 55-60ರಷ್ಟು ಹೆಚ್ಚಾಗಲಿದೆ.