Karkala; ಬೈಕಿನಿಂದ ಬಿದ್ದು ಸಹಸವಾರೆ ಸಾವು

ಕಾರ್ಕಳ: ಪುತ್ರನ ಜತೆ ಬೈಕಿನಲ್ಲಿ ಸಹಸವಾರೆಯಾಗಿ ತೆರಳುತ್ತಿದ್ದ ವೇಳೆ ಮಹಿಳೆಯೊಬ್ಬರು ಬೈಕಿನಿಂದ ಆಯತಪ್ಪಿ ಬಿದ್ದು ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಗೆ ಸಾಗಿಸುವ ವೇಳೆ ಮೃತಪಟ್ಟ ಘಟನೆ ಕಾರ್ಕಳ ತಾಲೂಕಿನ ನಿಟ್ಟೆ ಗರಡಿಯ ಬಳಿ ಜು. 21ರಂದು ಸಂಭವಿಸಿದೆ.

ನಿಟ್ಟೆ ಗ್ರಾಮದ ಕೆಳಗಿನ ಮನೆ ನಿವಾಸಿ, ನಿಟ್ಟೆ ಕಾಲೇಜು ಉದ್ಯೋಗಿ ಭಾಸ್ಕರ್‌ ಶೆಟ್ಟಿ ಅವರ ಪತ್ನಿ ಮಲ್ಲಿಕಾ ಶೆಟ್ಟಿ (43) ಮೃತ ಮಹಿಳೆ. ಶುಕ್ರವಾರ ತನ್ನ ತವರು ಮನೆಯಾದ ಮಂಗಳೂರಿನ ಸುರತ್ಕಲ್‌ಗೆ ಬಸ್ಸಿನಲ್ಲಿ ಹೋಗಲು ಪುತ್ರ ಭವಿಷ್‌ನ ಜತೆ ಬೈಕಿನಲ್ಲಿ ನಿಟ್ಟೆ ಬಸ್ಸು ನಿಲ್ದಾಣಕ್ಕೆ ಹೋಗುತ್ತಿದ್ದಾಗ ಘಟನೆ ನಡೆದಿದೆ.
ಬೈಕಿನಲ್ಲಿ ತೆರಳುತ್ತಿದ್ದ ಸಂದರ್ಭದಲ್ಲಿ ಮಳೆ ಬಂದ ಹಿನ್ನೆಲೆಯಲ್ಲಿ ಹಿಂಬದಿಯಲ್ಲಿ ಕುಳಿತಿದ್ದ ಮಲ್ಲಿಕಾ ಶೆಟ್ಟಿ ಕೊಡೆ ಬಿಡಿಸಲು ಮುಂದಾದಾಗ ಗಾಳಿಯ ರಭಸಕ್ಕೆ ಕೊಡೆಯೊಂದಿಗೆ ಆಯತಪ್ಪಿ ರಸ್ತೆಗೆ ಬಿದ್ದ ಪರಿಣಾಮ ತಲೆಗೆ ಗಂಭೀರ ಗಾಯವಾಗಿದ್ದು, ಕೂಡಲೇ ಆಸ್ಪತ್ರೆಗೆ ಸಾಗಿಸುವ ವೇಳೆಯಲ್ಲಿ ಅವರು ಮೃತಪಟ್ಟಿದ್ದಾರೆ. ಈ ಬಗ್ಗೆ ಕಾರ್ಕಳ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.