Karkala: ಕೌಟುಂಬಿಕ ಹಿಂಸೆ ಆರೋಪ; ವಿಷ ಸೇವಿಸಿದ್ದ ವಿವಾಹಿತ ಮಹಿಳೆ ಸಾವು

ಕಾರ್ಕಳ: ಕೌಟುಂಬಿಕ ಸಮಸ್ಯೆಯಿಂದ ಮನನೊಂದು ವಿಷ ಸೇವಿಸಿದ್ದ ಮಹಿಳೆ ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟ ಘಟನೆ ಕಾರ್ಕಳ ರೆಂಜಾಳದಲ್ಲಿ ನಡೆದಿದೆ.

ಕಸಬ ಗ್ರಾಮದ ಜೋಡುರಸ್ತೆ ಮಹಮ್ಮದ್‌ ರಿಜ್ವಾನ್‌ ಅವರ ಪತ್ನಿ ಮೈಮುನಾ (27) ಮೃತಪಟ್ಟವರು. ಅವರು 2017ರಲ್ಲಿ ರಿಜ್ವಾನ್‌ ಅವರೊಂದಿಗೆ ವಿವಾಹವಾಗಿದ್ದರು. ಅತ್ತೆ, ಮಾವ ಸೇರಿದಂತೆ ಪತಿಯ ಮನೆಯವರು ಹಿಂಸೆ ಮಾಡುತ್ತಿದ್ದು, ಮನೆ ಬಿಟ್ಟು ಹೋಗು ಎಂದು ಕಿರುಕುಳ ನೀಡುತ್ತಿದ್ದಾರೆ ಎಂದು ಮೈಮುನಾ ಸಹೋದರಿ ರಶೀದಾ ಅವರಲ್ಲಿ ಅಲವತ್ತುಕೊಂಡಿದ್ದರು. 4 ವರ್ಷಗಳ ಹಿಂದೆ ಚೂರಿ ಹಾಕಿ ಸಾಯಿಸುವುದಾಗಿ ಬೆದರಿಕೆ ಹಾಕಿದ್ದರು. ನ. 28ರಂದು ಮೈಮೂನಾ ಅವರ ಅತ್ತೆಯ ಅಕ್ಕ ಮೆಹರುನ್ನಿಸಾ ಮತ್ತು ಅವರ ಮಗಳು ದಿಲ್ ಶಾದ್‌ ಸೇರಿ ಎಲ್ಲರೂ ಗಲಾಟೆ ಮಾಡಿದ್ದು, ಬೇರೆ ಬಾಡಿಗೆ ಮನೆ ಮಾಡಿ ವಾಸವಾಗಿರುವಂತೆ ಮತ್ತು ಪತಿಗೆ ಬಾಡಿಗೆ ಮನೆಗೆ ಹೋಗದಂತೆ ಮಾಡಿದ್ದಾರೆ ಎಂದು ಅಳಲು ತೋಡಿಕೊಂಡಿದ್ದಾಗಿ ರಶೀದಾ ಹೇಳಿದ್ದಾರೆ.

ಮೈಮೂನಾ ಅವರು ವಾಸವಿದ್ದ ಬಾಡಿಗೆ ಮನೆಗೆ ಪತಿ ಬಾರದೆ ಇದ್ದ ಕಾರಣ, ಅವರನ್ನು ಬಾಡಿಗೆ ಮನೆಗೆ ಕರೆದುಕೊಂಡು ಬರುತ್ತೇನೆಂದು ಅತ್ತೆಯ ಮನೆಗೆ ಹೋಗಿದ್ದ ಸಂದರ್ಭ ಅತ್ತೆಯ ಮನೆಯಲ್ಲಿ ಇಲಿ ಪಾಷಾಣ ಸೇವಿಸಿದ್ದರು. ಆಸ್ವಸ್ಥಗೊಂಡ ಮೈಮೂನಾ ಅವರನ್ನು ಅವರ ಪತಿ ಕಾರ್ಕಳದ ಖಾಸಗಿ ಆಸ್ಪತ್ರೆ ಕರೆದೊಯ್ದು ಅಲ್ಲಿಂದ ಹೆಚ್ಚಿನ ಚಿಕಿತ್ಸೆಗಾಗಿ ಮಂಗಳೂರಿನ ಖಾಸಗಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ಅನಂತರ ನ. 30ರಂದು ಬೆಂಗಳೂರಿನ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿತ್ತು. ಚಿಕಿತ್ಸೆಗೆ ಸ್ಪಂದಿಸದೆ ಡಿ. 2ರಂದು ಮೈಮೂನಾ ಮೃತಪಟ್ಟಿದ್ದಾರೆ.

ದುಷ್ಪ್ರೇರಣೆ: ಪ್ರಕರಣ ದಾಖಲು
ಅತ್ತೆ ನೂರ್ಜಾನ್‌, ಮಾವ ಮೊಹಮ್ಮದ್‌ ಶರೀಫ್, ಇತರರಾದ ಸಿರಾಜ್, ರಫಾತ್‌, ಅಬ್ದುಲ್‌ ಖಾದರ್‌, ಮಜೀದ್‌, ಮೆಹರುನ್ನಿಸಾ ಮತ್ತು ದಿ‌ಲ್ಶಾದ್‌ ಅವರು ಮಾನಸಿಕ ಹಿಂಸೆ ನೀಡಿ, ಸಾಯಲು ದುಷ್ಟೇರಣೆ ನೀಡಿದ ಕಾರಣದಿಂದ ವಿಷ ಸೇವಿಸಿ ಸಾವನಪ್ಪಿದ್ದಾಳೆ ಎಂದು ಸಹೋದರಿ ರಶೀದಾ ಬಾನು ಅವರು ನೀಡಿದ ದೂರಿನಂತೆ ಕಾರ್ಕಳ ನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.