ಪುನೀತ್‌ ರಾಜ್‌ಕುಮಾರ್‌ ಪ್ರಮುಖ ಪಾತ್ರವೊಂದರಲ್ಲಿ ನಟಿಸಿರುವ “ಲಕ್ಕಿಮ್ಯಾನ್‌’ ಚಿತ್ರ ಸೆ. 09ರಂದು ಬಿಡುಗಡೆಯಾಗುತ್ತಿದೆ. ಈಗಾಗಲೇ ಬಿಡುಗಡೆಯಾಗಿರುವ ಚಿತ್ರದ ಟೀಸರ್‌, ಟ್ರೇಲರ್‌ಗಳಿಗೆ ಮೆಚ್ಚುಗೆ ವ್ಯಕ್ತವಾಗುವ ಮೂಲಕ ಸಿನಿಮಾದ ಮೇಲಿನ ನಿರೀಕ್ಷೆ ಹೆಚ್ಚಾಗಿದೆ. ಇತ್ತೀಚೆಗೆ ಈ ಚಿತ್ರಕ್ಕೆ ಸೆನ್ಸಾರ್‌ ಆಗಿದ್ದು, “ಯು’ ಪ್ರಮಾಣ ಪತ್ರ ಸಿಕ್ಕಿದೆ.
ಸಾಮಾನ್ಯವಾಗಿ ಬಹುತೇಕ ಸಿನಿಮಾಗಳಿಗೆ “ಯು/ಎ’ ಸಿಗುತ್ತದೆ. ಆದರೆ, “ಲಕ್ಕಿಮ್ಯಾನ್‌’ ಔಟ್‌ ಅಂಡ್‌ ಔಟ್‌ ಫ್ಯಾಮಿಲಿ ಡ್ರಾಮಾವಾಗಿದ್ದು, ಈಗ “ಯು’ ಪ್ರಮಾಣ ಪತ್ರ ಪಡೆದುಕೊಂಡಿದೆ. ಈ ಚಿತ್ರದಲ್ಲಿ ಪುನೀತ್‌ ರಾಜ್‌ಕುಮಾರ್‌ ದೇವರ ರೂಪದಲ್ಲಿ ಕಾಣಿಸಿಕೊಂಡಿದ್ದಾರೆ. ಅವರ ಪಾತ್ರವೇ ದೇವರಾಗಿರುವುದರಿಂದ ಅಭಿಮಾನಿ ಗಳು ಕೂಡಾ ತಮ್ಮ ನೆಚ್ಚಿನ “ದೇವರ’ನ್ನು ತೆರೆಮೇಲೆ ನೋಡಲು ಉತ್ಸುಕರಾಗಿದ್ದಾರೆ.
ಇನ್ನು, ಈ ಚಿತ್ರದಲ್ಲಿ “ಡಾರ್ಲಿಂಗ್‌’ ಕೃಷ್ಣ ನಾಯಕರಾಗಿ ನಟಿಸಿದ್ದಾರೆ. ಇವರಿಗೆ ಜೋಡಿಯಾಗಿ ಸಂಗೀತಾ ಶೃಂಗೇರಿ ಕಾಣಿಸಿಕೊಂಡಿದ್ದಾರೆ. ಕೃಷ್ಣ ಕೂಡಾ ಈ ಚಿತ್ರದ ಬಗ್ಗೆ ಸಾಕಷ್ಟು ಎಕ್ಸೈಟ್‌ ಆಗಿದ್ದಾರೆ. ಚಿತ್ರದ ಬಗ್ಗೆ ಮಾತನಾಡುವ ನಾಯಕ ಕೃಷ್ಣ, “ಪುನೀತ್‌ ಅವರ ಜೊತೆ ಒಂದೆರಡು ಸಿನಿಮಾಗಳಲ್ಲಿ ನಟಿಸಿದ್ದೆ. ಆದರೆ, ಹೆಚ್ಚು ದೃಶ್ಯಗಳಿರಲಿಲ್ಲ. “ಲಕ್ಕಿಮ್ಯಾನ್‌’ನಲ್ಲಿ ಪುನೀತ್‌ ಅವರೊಂದಿಗೆ ತುಂಬಾ ಸೀನ್‌ಗಳಿವೆ. ಇವತ್ತು ಅವರಿಲ್ಲ ಎಂಬುದನ್ನು ಊಹಿಸಿಕೊಳ್ಳಲು ಕಷ್ಟವಾಗುತ್ತಿದೆ’ ಎಂದ ಕೃಷ್ಣ “ಲಕ್ಕಿಮ್ಯಾನ್‌’ ಎಲ್ಲರಿಗೂ ಇಷ್ಟವಾಗುವ ಸಿನಿಮಾ ಎನ್ನಲು ಮರೆಯಲಿಲ್ಲ.
ಅಂದಹಾಗೆ, ಇದು “ಓ ಮೈ ಕಡವುಳೆ’ ಎಂಬ ತಮಿಳು ಚಿತ್ರದ ರೀಮೇಕ್‌. ಈ ಚಿತ್ರವನ್ನು ನೋಡಿ ಕೃಷ್ಣ ತುಂಬಾ ಇಷ್ಟಪಟ್ಟಿದ್ದರಂತೆ. ಜೊತೆಗೆ ಈ ಪಾತ್ರ ತನಗೆ ಸಿಕ್ಕರೆ ಚೆನ್ನಾಗಿರುತ್ತದೆ ಎಂದುಕೊಂಡಿದ್ದರಂತೆ. ಅದಾಗಿ ಮೂರು ತಿಂಗಳಲ್ಲೇ “ಲಕ್ಕಿಮ್ಯಾನ್‌’ ಕುರಿತಾಗಿ ಕರೆ ಬಂತಂತೆ.
ನಾಯಕಿ ಸಂಗೀತಾ ಶೃಂಗೇರಿ ಇಲ್ಲಿ ಶ್ರೀಮಂತ ಹುಡುಗಿಯಾಗಿ, ಮದುವೆ ಬಗ್ಗೆ ತನ್ನದೇ ಆದ ಒಂದಷ್ಟು ಸಂದೇಹಗಳನ್ನಿಟ್ಟುಕೊಂಡಿರುವ ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರಂತೆ. ಚಿತ್ರದಲ್ಲಿ ರೋಶನಿ ಪ್ರಕಾಶ್‌ ಕೂಡಾ ನಟಿಸಿದ್ದಾರೆ. ಈ ಚಿತ್ರವನ್ನು ಮೀನಾಕ್ಷಿ ಸುಂದರಂ ಹಾಗೂ ಆರ್‌.ಸುಂದರಂ ಕಾಮರಾಜ್‌ ನಿರ್ಮಿಸಿದ್ದಾರೆ.
