“ಝಾನ್ಸಿ ರಾಣಿ’ಲುಕ್‍ನಲ್ಲಿ ಕಂಗನಾ: Watch

ಬಾಲಿವುಡ್​ನ ಪ್ರತಿಭಾನ್ವಿತ ನಟಿ ಎಂದೇ ಹೆಸರಾಗಿರುವ ನಟಿ ಕಂಗನಾ ಅಭಿನಯದ “ಮಣಿಕರ್ಣಿಕಾ-ದಿ ಕ್ವೀನ್​ ಆಫ್​ ಝಾನ್ಸಿ’ ಚಿತ್ರದ ಟೀಸರ್ ಬಿಡುಗಡೆಯಾಗಿದ್ದು, ರಾಣಿ ವೇಷದಲ್ಲಿ ಇದೇ ಮೊದಲ ಬಾರಿಗೆ ಕಂಗನಾ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಪೋಸ್ಟರ್​ ಮೂಲಕ ಸದ್ದು ಮಾಡಿದ್ದ ಈ ಚಿತ್ರದ ಟೀಸರ್ ಅಮಿತಾ ಬಚ್ಚನ್​ ಹಿನ್ನಲೆ ಧ್ವನಿಯೊಂದಿಗೆ ಆರಂಭವಾಗುತ್ತದೆ. 

ಈಸ್ಟ್​ ಇಂಡಿಯಾ ಕಂಪನಿಯ ದುರಾಡಳಿತದ ವಿರುದ್ಧ ವೀರಾವೇಷದಿಂದ ಹೋರಾಡುವ ದೃಶ್ಯಗಳಲ್ಲಿ ಕಂಗನಾ ನಟನೆ ಮನೋಜ್ಞವಾಗಿದೆ. ಅಲ್ಲದೇ ನಿಜವಾಗಿಯೂ ಝಾನ್ಸಿಯ ರಾಣಿಯೇ ಎನ್ನುವಂತೆ ಕಂಗನಾ ನಟಿಸಿದ್ದಾರೆ. ಈಗಾಗಲೇ ಬಾಹುಬಲಿ, ಪದ್ಮಾವತ್ ಚಿತ್ರದಲ್ಲಿರುವಂತೆ ದೊಡ್ಡ ಸೆಟ್​ಗಳಲ್ಲಿ ಯುದ್ಧದ ದೃಶ್ಯಗಳು ಸಿನಿಪ್ರಿಯರನ್ನು ಸೆಳೆಯುತ್ತದೆ. ರಾಧಾಕೃಷ್ಣ ಜಗರ್ಲಮುಡ್ ನಿರ್ದೇಶನದ ಈ ಚಿತ್ರಕ್ಕೆ ಜೀ ಸ್ಟುಡಿಯೋ ಮತ್ತು ಕಮಲ್ ಜೈನ್ ಬಂಡವಾಳ ಹೂಡಿದ್ದಾರೆ.

ನಿಕ್ ಪೂವೆಲ್ ಮತ್ತು ಹಬೀಬ್ ರಿಯಾಜ್ ಸಾಹಸ ನಿರ್ದೇಶನ, ಪ್ರಸೂನ್ ಜೋಶಿ ಸಂಭಾಷಣೆ, ಶಂಕರ್, ಈಶನ್, ಲಾಯ್ ಸಂಗೀತ ಸಂಯೋಜನೆ ಜೊತೆಗೆ ರಾಮೇಶ್ವರ್ ಭಗತ್ ಸಂಕಲನ ಚಿತ್ರಕ್ಕಿದ್ದು, ಕಂಗನಾ ರನೌತ್, ಜೀಶು ಸೆಂಗುಪ್ತ, ಸುರೇಶ್ ಒಬೆರಾಯ್, ಅತುಲ್ ಕುಲಕರ್ಣಿ, ಅಂಕಿತಾ, ಜೀಶನ್, ನಿಹಾರ್ ಪಾಂಡ್ಯ, ಕುಲಭೂಷಣ್, ಮನೀಶ್ ಸೇರಿದಂತೆ ಮುಂತಾದವರು ತಾರಾಬಳಗದಲ್ಲಿದ್ದಾರೆ. ಚಿತ್ರವು ಜನವರಿ 25ರಂದು ತೆರೆಗೆ ಬರಲು ಸಜ್ಜಾಗಿದೆ.