ಮಂಗಳೂರಿನ ಬೆಡಗಿ ಜೊಸಿಟಾ ಅನೊಲಾ ರೊಡ್ರಿಗಸ್‌ ಸ್ಪರ್ಧಿ

ಮಂಗಳೂರು: ನಗರದ ಕೊಡಿಯಾಲ್‌ಬೈಲ್‌ನ ಬೆಡಗಿ ಶಾರದಾ ಪ. ಪೂ. ಕಾಲೇಜಿನ ವಿದ್ಯಾರ್ಥಿನಿ ಜೊಸಿಟಾ ಅನೊಲಾ ರೊಡ್ರಿಗಸ್‌ ಮೇ 20ರಿಂದ 28ರ ತನಕ ಚೀನದ ಮಕಾವೊದಲ್ಲಿ ನಡೆಯಲಿರುವ ವರ್ಲ್ಡ್ ಸೂಪರ್‌ ಮಾಡೆಲ್‌ ಟೀನ್‌ ಫ್ಯಾಶನ್‌ ಸ್ಪರ್ಧೆಯಲ್ಲಿ ದಕ್ಷಿಣ ಏಶಿಯಾವನ್ನು ಪ್ರತಿನಿಧಿಸಲು ಆಯ್ಕೆಯಾಗಿದ್ದಾರೆ. 

ವರ್ಲ್ಡ್ ಸೂಪರ್‌ ಮಾಡೆಲ್‌ ಟೀನ್‌ ಸ್ಪರ್ಧೆಯ ವಿಜೇತರು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಮತ್ತು ಕುಟುಂಬದವರು ನಡೆಸುತ್ತಿರುವ ಮಾಡೆಲ್‌ ಮ್ಯಾನೇಜ್‌ಮೆಂಟ್‌ ಕಂಪೆನಿ “ಟ್ರಂಪ್‌ ಮಾಡೆಲ್‌ ಏಜನ್ಸಿ’ಯಿಂದ ಮಾಡೆಲಿಂಗ್‌ ಗುತ್ತಿಗೆ ಪಡೆಯಲಿದ್ದಾರೆ.

ಜೊಸಿಟಾ ಅನೊಲಾ ರೊಡ್ರಿಗಸ್‌ ಕೊಡಿಯಾಲ್‌ಬೈಲ್‌ನ ಅನಿತಾ ಲೋಬೊ ಅವರ ಪುತ್ರಿಯಾಗಿದ್ದು, ಶಾರದಾ ಪ.ಪೂ. ಕಾಲೇಜಿನಲ್ಲಿ ಪ್ರಥಮ ವರ್ಷದ ಕೋರ್ಸ್‌ ಪೂರ್ಣಗೊಳಿಸಿದ್ದಾರೆ. ಅವರು ಅನುಪಮಾ ಸುವರ್ಣ ಅವರು ಮುಖ್ಯಸ್ಥರಾಗಿರುವ ಫ್ಯಾಶನ್‌ ಗ್ರೂಮಿಂಗ್‌ ಆ್ಯಂಡ್‌ ಟ್ಯಾಲೆಂಟ್‌ ಮ್ಯಾನೇಜ್‌ಮೆಂಟ್‌ ಕಂಪೆನಿ “ಫ್ಯಾಶನ್‌ ಎಬಿಸಿಡಿ’ಯಲ್ಲಿ ತರಬೇತಿ ಪಡೆಯುತ್ತಿದ್ದಾರೆ. ಅಲ್ಲದೆ ಸಿಜಿÉಂಗ್‌ ಗೈಸ್‌ ಡಾನ್ಸ್‌ ಸ್ಟುಡಿಯೋ ಸಂಸ್ಥೆಯ ಶುಭಾ ಕಿರಣ್‌ ಅವರ ಶಿಷ್ಯೆಯಾಗಿ ವೃತ್ತಿಪರ ನೃತ್ಯ ತರಬೇತಿ ಹೊಂದಿದ್ದಾರೆ. 

ಹಲವು ಸುತ್ತಿನ ತರಬೇತಿ ಮತ್ತು ಆಡಿಶನ್‌ಗಳ ಬಳಿಕ ಅವರನ್ನು ವರ್ಲ್ಡ್ ಸೂಪರ್‌ ಮಾಡೆಲ್‌ ಟೀನ್‌ ಆಡಿಶನ್‌ಗೆ ಕಳುಹಿಸಲಾಗಿತ್ತು. ಬೆಂಗಳೂರಿನಲ್ಲಿ ಆಡಿಶನ್‌ನಲ್ಲಿ ಭಾಗವಹಿಸಿದ್ದ 150 ಸ್ಪರ್ಧಿಗಳಲ್ಲಿ ಜೊಸಿಟಾ ಅವರು ಒಬ್ಬರಾಗಿದ್ದಾರೆ.