ಸಾಮೂಹಿಕ ರಜೆ ತಂತ್ರಕ್ಕೆ ಬೆದರಿದ ಜೆಟ್‌ : ಡಿಸಂಬರ್‌ ತಿಂಗಳ ವೇತನ ಪಾವತಿಗೆ ಒಪ್ಪಿಗೆ

ಮುಂಬಯಿ: ಜೆಟ್‌ ಏರ್‌ ವೇಸ್‌ ನ ಪೈಲಟ್‌ ಗಳು ಮತ್ತು ವಿಮಾನ ನಿರ್ವಹಣಾ ತಾಂತ್ರಿಕ ವರ್ಗದ ಸಿಬ್ಬಂದಿಗಳು ಎಪ್ರಿಲ್‌ 1ರಿಂದ ಸಾಮೂಹಿಕ ರಜೆಯಲ್ಲಿ ಹೋಗುವ ಬೆದರಿಕೆಗೆ ಬಗ್ಗಿರುವ ಜೆಟ್‌ ಏರ್‌ ವೇಸ್‌ ತನ್ನ ಉದ್ಯೋಗಿಗಳಿಗೆ ಡಿಸಂಬರ್‌ ತಿಂಗಳಿನ ವೇತನವನ್ನು ಶೀಘ್ರವೇ ಪಾವತಿಸುವುದಾಗಿ ತಿಳಿಸಿದೆ.

ಆರ್ಥಿಕ ಮುಗ್ಗಟ್ಟಿಗೆ ಸಿಲುಕಿರುವ ಜೆಟ್‌ ಏರ್‌ ವೇಸ್‌ ಆಡಳಿತ ಮಂಡಳಿಯು ತನ್ನ ಉದ್ಯೋಗಿಗಳಿಗೆ ತೀರಾ ಇತ್ತೀಚೆಗಿನ ಬಾಕಿಗಳನ್ನು ಪಾವತಿಸಲು ಸಾಧ್ಯವಿಲ್ಲವೆಂದು ತಿಳಿಸಿದೆ. ‘ಸಂಸ್ಥೆಯು ಪ್ರಸ್ತುತ ದುರಿಸುತ್ತಿರುವ ಸಂಕಷ್ಟ ಪರಿಸ್ಥಿತಿಯಿಂದ ಹೊರಬರಲು ಸಾಧ್ಯವಿರುವ ಎಲ್ಲಾ ಪ್ರಯತ್ನಗಳನ್ನು ಸಂಸ್ಥೆಯ ನಿರ್ದೇಶಕರ ಮಂಡಳಿ ಹಾಗೂ ಆಡಳಿತ ಮಂಡಳಿ ಜಂಟಿಯಾಗಿ ತನ್ನ ಪ್ರಯತ್ನವನ್ನು ಜಾರಿಯಲ್ಲಿರಿಸಿದೆ. ಮತ್ತು ಈ ಮೂಲಕ ಸಂಸ್ಥೆಯ ಕಾರ್ಯಚಟುವಟಿಕೆಗಳನ್ನು ಶೀಘ್ರವೇ ಹಳಿಗೆ ತರುವ ಪ್ರಯತ್ನಗಳು ಸಾಗಿವೆ’ ಎಂಬುದಾಗಿ ಜೆಟ್‌ ಏರ್‌ ವೇಸ್‌ ನ ಮುಖ್ಯಕಾರ್ಯನಿರ್ವಹಣಾಧಿಕಾರಿ ವಿನಯ್‌ ದುಬೆ ಅವರು ತನ್ನೆಲ್ಲಾ ಉದ್ಯೋಗಿಗಳಿಗೆ ಇಮೇಲ್‌ ಒಂದನ್ನು ಕಳುಹಿಸಿದ್ದಾರೆ.

ಇದೆಲ್ಲಾ ಬಹಳ ಸಂಕೀರ್ಣವಾಗಿರುವ ಪ್ರಕ್ರಿಯೆಗಳಾಗಿರುವುದರಿಂದ ನಾವು ಎಣಿಸಿದಕ್ಕಿಂತಲೂ ಹೆಚ್ಚು ಸಮಯ ತೆಗೆದುಕೊಳ್ಳುತ್ತಿದೆ ಆದ ಕಾರಣ ಸದ್ಯಕ್ಕೆ ನಮಗೆ ಡಿಸಂಬರ್‌ ತಿಂಗಳ ವೇತನವನ್ನು ಮಾತ್ರವೇ ನಮ್ಮ ಉದ್ಯೋಗಿಗಳಿಗೆ ಪಾವತಿಸಲು ಸಾಧ್ಯವಾಗುತ್ತಿದೆ ಎಂದು ದುಬೆ ಅವರು ತಿಳಿಸಿದ್ದಾರೆ.