ಪಾಟ್ನಾದಲ್ಲಿಂದು ಜೆಡಿಯು ಬಣಗಳ ಬಲಪ್ರದರ್ಶನ

ಹೊಸದಿಲ್ಲಿ: ಬಿಹಾರದಲ್ಲಿ ಶನಿವಾರ ಜೆಡಿಯು ಬಣಗಳ ಬಲ ಪ್ರದರ್ಶನ ನಡೆಯಲಿದೆ. ಶರದ್‌ ಯಾದವ್‌ ನಾಯಕತ್ವದಲ್ಲಿ ಬಂಡಾಯ ನಾಯಕರ ಸಭೆ ಪಾಟ್ನಾದಲ್ಲಿ ನಡೆಯಲಿದ್ದು, ಮುಂದಿನ ಕ್ರಮಗಳ ಬಗ್ಗೆ ನಿರ್ಧಾರ ಕೈಗೊಳ್ಳಲಿದೆ. ಇನ್ನೊಂದೆಡೆ ಬಿಜೆಪಿ ಜತೆ ಕೈಜೋಡಿಸಿರುವ ಸಿಎಂ ನಿತೀಶ್‌ ಕುಮಾರ್‌ ಬಣವೂ ಶನಿವಾರವೇ ರಾಷ್ಟ್ರಿಯ ಕಾರ್ಯಕಾರಿಣಿ ಏರ್ಪಡಿಸಿದೆ. ಪ್ರತಿಪಕ್ಷಗಳು ಗುರುವಾರ ದಿಲ್ಲಿಯಲ್ಲಿ ಸಭೆ ಸೇರಿ ದೇಶದ ಸಂಸ್ಕೃತಿ ಮತ್ತು ಐಕ್ಯತೆಯನ್ನು ರಕ್ಷಿಸುವ ನಿರ್ಧಾರ ಮಾಡಿದ ಬೆನ್ನಲ್ಲೇ ಬಂಡಾಯ ನಾಯಕರ ಸಭೆ ನಡೆಯುತ್ತಿರುವುದರಿಂದ ಬಿಹಾರ ರಾಜಕೀಯ ಮತ್ತಷ್ಟು ರಂಗೇರುವ ಸಾಧ್ಯತೆಯಿದೆ. ಯಾರದು ನಿಜವಾದ ಜೆಡಿಯು, ಯಾವ ಬಣಕ್ಕೆ ಪಕ್ಷ ದ ಚಿಹ್ನೆ ದೊರೆಯಲಿದೆ ಎಂಬ ಕುತೂಹಲವೂ ಮೂಡಿದೆ.