ಭಗತ್ ಸಿಂಗ್ ಟೆರರಿಸ್ಟ್ ಎಂದ ಜಮ್ಮು ವಿವಿ ಪ್ರೊಫೆಸರ್; ತನಿಖೆಗೆ ಆದೇಶ

ಜಮ್ಮು-ಕಾಶ್ಮೀರ: ಭಾರತ ಸ್ವಾತಂತ್ರ್ಯ ಸಂಗ್ರಾಮದ ಕ್ರಾಂತಿಕಾರಿ ಭಗತ್ ಸಿಂಗ್ ಅವರನ್ನು “ಭಯೋತ್ಪಾದಕ” ಎಂದು ಜಮ್ಮು ಯೂನಿರ್ವಸಿಟಿಯ ಪ್ರೊಫೆಸರ್ ಮೊಹಮ್ಮದ್ ತಾಜುದ್ದೀನ್ ಅವರು ಹೇಳಿರುವುದಾಗಿ ಆರೋಪಿಸಿ ಯೂನಿರ್ವಸಿಟಿಯ ಕೆಲವು ವಿದ್ಯಾರ್ಥಿಗಳು ದೂರು ನೀಡಿರುವುದಾಗಿ ಮಾಧ್ಯಮದ ವರದಿ ತಿಳಿಸಿದೆ.

ಪ್ರೊಫೆಸರ್ ಮೊಹಮ್ಮದ್ ಸುಮಾರು 2ಗಂಟೆಗಳ ಕಾಲ ನೀಡಿದ ಉಪನ್ಯಾಸದಲ್ಲಿ ಭಗತ್ ಸಿಂಗ್ ಅವರನ್ನು ಭಯೋತ್ಪಾದಕ ಎಂದು ಉಲ್ಲೇಖಿಸಿರುವ 25 ಸೆಕೆಂಡ್ ನ ಕ್ಲಿಪ್ ಅನ್ನು ಕಟ್ ಮಾಡಿ ಪುರಾವೆಯನ್ನಾಗಿ ವಿದ್ಯಾರ್ಥಿಗಳು ಯೂನಿರ್ವಸಿಟಿಯ ಉಪಕುಲಪತಿಗೆ ದೂರು ನೀಡಿದ್ದಾರೆ ಎಂದು ವರದಿ ವಿವರಿಸಿದೆ.

ಉಪಕುಲಪತಿ ಮನೋಜ್ ಕೆ ಧಾರ್ ಅವರು ಎಎನ್ಐ ಜೊತೆ ಮಾತನಾಡುತ್ತ, ದೂರನ್ನು ದಾಖಲಿಸಿರುವ ಬಗ್ಗೆ ಅವರು ಖಚಿತಪಡಿಸಿದ್ದಾರೆ. ಅಲ್ಲದೇ ಈ ಘಟನೆ ಬಗ್ಗೆ ತನಿಖೆ ನಡೆಸಲು ಆರು ಜನರನ್ನೊಳಗೊಂಡ ಸಮಿತಿಯನ್ನು ನಿಯೋಜಿಸಲಾಗಿದೆ. ವಿಚಾರಣೆ ಪೂರ್ಣಗೊಳ್ಳುವವರೆಗೂ ಆರೋಪಿತ ಪ್ರೊಫೆಸರ್ ಗೆ ಪಾಠ ಮಾಡುವಂತಿಲ್ಲ ಎಂದು ಸೂಚನೆ ನೀಡಲಾಗಿದೆ ಎಂಬುದಾಗಿ ಉಪಕುಲಪತಿ ತಿಳಿಸಿದ್ದಾರೆ.

ಕಳೆದ ಗುರುವಾರ ಕೆಲವು ವಿದ್ಯಾರ್ಥಿಗಳು ಸಂಜೆ ನನ್ನ ಬಂದು ಭೇಟಿಯಾಗಿ, ಈ ಘಟನೆ ಬಗ್ಗೆ ಮಾಹಿತಿ ನೀಡಿದ್ದರು. ಅಷ್ಟೇ ಅಲ್ಲ ಸೀಡಿಯನ್ನು ಸಾಕ್ಷಿಯಾಗಿ ನೀಡಿದ್ದರು. ಕೂಡಲೇ ನಾನು ತನಿಖೆ ನಡೆಸಲು ಸಮಿತಿಯನ್ನು ರಚಿಸಿದ್ದೆ ಎಂದು ಉಪಕುಲಪತಿ ಧಾರ್ ತಿಳಿಸಿದ್ದಾರೆ.