ಪತ್ರಕರ್ತ ಖಶೋಗ್ಗಿ ಕೊಲೆ ನಿಜ

ರಿಯಾದ್‌/ವಾಷಿಂಗ್ಟನ್‌: ಪತ್ರಕರ್ತ ಜಮಾಲ್‌ ಖಶೋಗ್ಗಿ ಇಸ್ತಾಂಬುಲ್‌ನಲ್ಲಿರುವ ರಾಯಭಾರ ಕಚೇರಿಯಲ್ಲಿ ಕೊಲ್ಲಲ್ಪಟ್ಟಿದ್ದಾರೆ ಎಂದು ಸೌದಿ ಅರೇಬಿಯಾ ಶನಿವಾರ ಒಪ್ಪಿ ಕೊಂಡಿದೆ. ಇದರ ಜತೆಗೆ ಗುಪ್ತಚರ ವಿಭಾಗದ ಉಪ ಮುಖ್ಯಸ್ಥ ಅಹ್ಮದ್‌ ಅಲ್‌-ಅಸ್ಸಿರಿ, ರಾಜಮನೆತನದ ಮಾಧ್ಯಮ ಸಲಹೆಗಾರ ಸೌದ್‌ ಅಲ್‌-ಖಟಾನಿ ಅವರನ್ನು ಹುದ್ದೆ ಗಳಿಂದ ವಜಾ ಮಾಡಲಾಗಿದೆ. 

ಪತ್ರಕರ್ತನ ನಾಪತ್ತೆ ಬಗ್ಗೆ 2 ವಾರಗಳ ಕಾಲ ನಿರಾಕರಣೆಯ ನಿಲುವನ್ನೇ ಮುಂದುವರಿಸಿಕೊಂಡು ಬಂದಿದ್ದ ಸೌದಿ ಅರೇಬಿಯಾ ಬುಧವಾರ ಖಶೋಗ್ಗಿ ಹತ್ಯೆಯಾಗಿ ರುವ ಬಗ್ಗೆ ಧ್ವನಿಮುದ್ರಿಕೆಯ ದಾಖಲೆಗಳಿವೆ ಎಂದು ಟರ್ಕಿಯ ಪತ್ರಿಕೆ ವರದಿ ಮೂರು ದಿನಗಳು ಕಳೆದ ಬಳಿಕ ಈ ತಪ್ಪೊಪ್ಪಿಗೆ ನೀಡಿದೆ. ರಾಯಭಾರ ಕಚೇರಿಯಲ್ಲಿ ಖಶೋಗ್ಗಿ ಜತೆಗಿನ ಚರ್ಚೆ ಕೈ ಮೀರಿ ಹೋದ ಬಳಿಕ ಅವರು ಇಲ್ಲವಾದರು ಎಂದಷ್ಟೇ  ಸೌದಿಯ ಅಟಾರ್ನಿ ಜನರಲ್‌ ಶೇಖ್‌ ಸೌದ್‌ ಅಲ್‌-ಮೊಜೇಬ್‌ ಮಾಹಿತಿ ನೀಡಿದ್ದಾರೆ. ಪತ್ರಕರ್ತ ಜಮಾಲ್‌ ಖಶೋಗ್ಗಿ ಕೊಲೆ ಆಗಿರುವುದು ಅಮೆರಿಕ-ಸೌದಿ ಅರೇಬಿಯಾ ನಡುವೆ ಬಿಕ್ಕಟ್ಟಿಗೆ ಕಾರಣವಾಗಲಿದೆ ಎಂದು ಹೇಳಲಾಗುತ್ತಿದೆ.

ಈ ಬೆಳವಣಿಗೆ ಬಗ್ಗೆ ದುಃಖವಾಗಿದೆ ಮುಂದಿನ ಕ್ರಮದ ಬಗ್ಗೆ ತೀರ್ಮಾನ ಕೈಗೊಂಡಿಲ್ಲ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌  ಟ್ರಂಪ್‌ ಪ್ರತಿಕ್ರಿಯೆ ನೀಡಿದ್ದಾರೆ.