‘ಆತ ಕಾಲ್ ಮಾಡಿ ಮಾತಾಡಬೇಕಿತ್ತು’…ದರ್ಶನ್ ಮೌನಕ್ಕೆ ಜಗ್ಗೇಶ್ ಅಸಮಾಧಾನ

ಮೈಸೂರು : ವಿವಾದಿತ ಆಡಿಯೋ ವಿಚಾರವಾಗಿ ನಡೆಯುತ್ತಿರುವ ಬೆಳವಣಿಗೆ ಬಗ್ಗೆ ನಟ ದರ್ಶನ್ ಮೌನವಹಿಸಿರುವುದಕ್ಕೆ ಜಗ್ಗೇಶ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇಂದು (ಫೆ.24) ಬನ್ನೂರಿನಲ್ಲಿ ನಡೆದ ಮಾಧ್ಯಮಗೋಷ್ಟಿಯಲ್ಲಿ ತಮ್ಮ ಬೇಸರ ಹೊರಹಾಕಿರುವ ಹಿರಿಯ ನಟ ಜಗ್ಗೇಶ್, ಇಂತಹ ಸಮಯದಲ್ಲಿ ದರ್ಶನ್ ಆ ಹುಡುಗರಿಗೆ ನೀವು ಯಾರು? ಯಾಕೆ ಹೀಗೆ ಮಾಡ್ತಿದಿರಿ ಅಂತ ಕೇಳಬೇಕಿತ್ತು. ನನಗಾದರೂ ಕಾಲ್ ಮಾಡಿ ಮಾತಾಡಬೇಕಿತ್ತು. ಇದರಿಂದ ನನಗೆ ತುಂಬ ನೋವಾಯಿತು. ಇದು ನಮ್ಮ ಹಿರಿಯರ ದೌರ್ಭಾಗ್ಯ ಎಂದರು.

ದರ್ಶನ್ ಅವರನ್ನು ನಾನು ಬಹಳ ಪ್ರೀತಿಸುತ್ತೇನೆ, ಆತ (ದರ್ಶನ್ ) ಸಂಕಷ್ಟದಲ್ಲಿರುವಾಗ ಕನ್ನಡ ಚಿತ್ರರಂಗದ ಯಾವ ನಟರು ನೆರವಿಗೆ ಬಂದರು ? ಅಂದು ನಾನು ಹಾಗೂ ಸಾರಾ ಗೋವಿಂದು ದರ್ಶನ್ ಪರ ನಿಂತೆವು. ಇದನ್ನು ದರ್ಶನ್ ಇಂದು ನೆನಪು ಮಾಡಿಕೊಳ್ಳಲಿಲ್ಲ ಎಂದು ಜಗ್ಗೇಶ್ ಬೇಸರಿಸಿಕೊಂಡರು.

ನಮ್ಮ ದರ್ಶನ್ ಕನ್ನಡದ ರಜನಿ ಕಾಂತ್ ಎಂದು ಹೇಳಿದಾಗ ನೀವೆಲ್ಲ ಹಿಗ್ಗಿ ಹೀರೆಕಾಯಿ ಆಗಿದ್ದೀರಿ. ಕನ್ನಡದ ತೇರು ನಾಲ್ಕಾರು ಜನ ನಟರು ಎಳೆಯುತ್ತಿದ್ದಾರೆ ಎಂದಾಗ ಖುಷಿ ಪಟ್ಟಿದ್ದೀರಿ. ಆದರೆ ಇದೆಲ್ಲ ಇಂದು ನೆನಪಿಗೆ ಬರಲಿಲ್ಲಲ್ವಾ ? ಎಂದು ಜಗ್ಗೇಶ್ ಪ್ರಶ್ನಿಸಿದರು.

ಇದನ್ನೂ ಓದಿ :ನಟಿ ಪ್ರಿಯಾಂಕಾ ನ್ಯೂ ಲುಕ್ ಡ್ರೆಸ್ ವೈರಲ್…ಕಾಲೆಳೆದ ಟ್ರೋಲಿಗರು!

ನಾವೆಲ್ಲ ಕನ್ನಡದ ಬಗ್ಗೆ ಮಾತಾಡಬೇಕು, ಕನ್ನಡತನ ಉಳಿಸಬೇಕು, ಚಿತ್ರರಂಗದಲ್ಲಿ ಎಲ್ಲರೂ ಒಗ್ಗಟ್ಟಾಗಿರಬೇಕೆನ್ನುವ ಕನಸು ಹಾಗೂ ಹಿರಿಯರ ಮಾತು ಕೇಳಿ ಬೆಳೆದವರು. ಈ ವಿಚಾರ ದೊಡ್ಡದು ಮಾಡಬಾರದೆಂದು ಮೌನವಾಗಿದ್ದೆ. ಅಂದು ಕೂಡ ದರ್ಶನ್ ಅಭಿಮಾನಿಗಳಿಗೆ ಸೂಕ್ಷ್ಮವಾಗಿ ತಿಳಿಹೇಳಲು ಪ್ರಯತ್ನಿಸಿದೆ. ಆದರೆ, ಅವರು ನನ್ನ ಮಾತು ಕೇಳಲಿಲ್ಲ. ಇದರಿಂದ ಏನು ಸಾಧಿಸಿದಿರಿ ನೀವು?  ಇದು ಸತ್ಯ- ಅಸತ್ಯ ಅಂತಾ ಎದೆ ಮುಟ್ಟಿಕೊಂಡು ದರ್ಶನ್ ಅಭಿಮಾನಿಗಳು ಹೇಳಬೇಕು ಎಂದು ಆಗ್ರಹಿಸಿದ ಜಗ್ಗೇಶ್, ಈ ಪ್ರಯೋಗಳನ್ನು ಯಾರ ಮೇಲೂ ಮಾಡಬೇಡಿ, ಇದು ಒಳ್ಳೆಯ ಲಕ್ಷಣವಲ್ಲ ಎಂದರು.

ಅಂದು ಬಂದವರು ತಾಳ್ಮೆಯಿಂದ ಮಾತಾಡಿದ್ದರೆ ನನಗೆ ಖುಷಿಯಾಗುತ್ತಿತ್ತು. ಕೆಲವು ಮಾಧ್ಯಮಗಳು ಇದನ್ನ ತಣ್ಣಗೆ ಮಾಡಬಹುದಿತ್ತೆಂದು ಹೇಳಿದ ಜಗ್ಗೇಶ್, ಇನ್ಮುಂದೆ ಇಲ್ಲಿಗೆ ನಿಲ್ಲಿಸಿಬಿಡಿ, ಮುಂದಕ್ಕೆ ಬೆಳೆಸಬೇಡಿ ಎಂದು ಮನವಿ ಮಾಡಿದರು.