ಜೂನಿಯರ್‌ ವಿಶ್ವಕಪ್‌ ಶೂಟಿಂಗ್‌: ಭಾಕರ್‌-ಅನ್ಮೋಲ್‌ಗೆ ಚಿನ್ನ

ಸಿಡ್ನಿ: ಭಾರತದ ಮನು ಭಾಕರ್‌ ಮತ್ತು ಅನ್ಮೋಲ್‌ ಅವರು ಐಎಸ್‌ಎಸ್‌ಎಫ್ ಜೂನಿಯರ್‌ ವಿಶ್ವಕಪ್‌ ಶೂಟಿಂಗ್‌ ಸ್ಪರ್ಧೆಯ ಮಿಕ್ಸೆಡ್‌ 10 ಮೀ. ಏರ್‌ ಪಿಸ್ತೂಲ್‌ ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದುಕೊಂಡಿದ್ದಾರೆ. ಇದು ಭಾರತಕ್ಕೆ ಲಭಿಸಿದ ಏಳನೇ ಚಿನ್ನವಾಗಿದೆ. 

ಅರ್ಹತಾ ಸುತ್ತಿನಲ್ಲಿ ವಿಶ್ವದಾಖ ಲೆಯ ಸಾಧನೆ ಮಾಡಿದ್ದ ಭಾಕರ್‌ ಮತ್ತು ಅನ್ಮೋಲ್‌ ಫೈನಲ್‌ನಲ್ಲೂ ಅಮೋಘವಾಗಿ ಆಡಿದರು. ಎದು ರಾಳಿಗಿಂತ ಭಾರೀ ಮುನ್ನಡೆ ಸಾಧಿಸಿದ ಅವರಿಬ್ಬರು 478.9 ಅಂಕ ಪಡೆದು ಚಿನ್ನ ಜಯಿಸಿದರು. ವಿಶ್ವದಾಖಲೆಗಿಂತ ಕೇವಲ 1.8 ಅಂಕ ಹಿನ್ನಡೆಯಲ್ಲಿದ್ದರು. ಅರ್ಹತಾ ಸುತ್ತಿನಲ್ಲಿ 770 ಅಂಕ ಪಡೆದ ಭಾಕರ್‌-ಅನ್ಮೋಲ್‌ ನೂತನ ಜೂನಿಯರ್‌ ಅರ್ಹತಾ ವಿಶ್ವದಾಖಲೆ ನಿರ್ಮಿಸಿದ್ದರು.  ಚೀನದ ಲಿಯು ಜಿನ್ಯಾವೊ-ಲೀ ಕ್ಸುಯಿ (473.3 ಅಂಕ) ಬೆಳ್ಳಿ ಮತ್ತು ವಾಂಗ್‌ ಝೆಹಾವೊ-ಕ್ಸಿಯಾವೊ ಜಿಯಾರು ಕ್ಸುವಾನ್‌ (410.7) ಕಂಚು ಪಡೆದರು. ಭಾರತದ ಇನ್ನೊಂದು ತಂಡ 18ರ ಹರೆಯದ ಗೌರವ್‌ ರಾಣ ಮತ್ತು 19ರ ಹರೆಯದ ಮಹಿಮಾ ತುರಿಹಿ ಅಗರ್ವಾಲ್‌ 4ನೇ ಸ್ಥಾನ ಪಡೆದರು. 

ಮಿಕ್ಸೆಡ್‌ 10 ಮೀ. ಏರ್‌ ರೈಫ‌ಲ್‌ ವಿಭಾಗದಲ್ಲಿ 17ರ ಹರೆಯದ ಶ್ರೇಯಾ ಅಗರ್ವಾಲ್‌ ಮತ್ತು 19ರ ಹರೆಯದ ಅರ್ಜುನ್‌ ಬಬುಟ ಅವರು 432.8 ಅಂಕ ಗಳಿಸಿ ಕಂಚು ಪಡೆದರು. ಏಳು ಚಿನ್ನ ಸಹಿತ ಒಟ್ಟು 18 ಪದಕ ಗೆದ್ದಿರುವ ಭಾರತ ಒಟ್ಟಾರೆ ಪದಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನದಲ್ಲಿದೆ. ಎಂಟು ಚಿನ್ನ ಗೆದ್ದಿರುವ ಚೀನ 22 ಪದಕದೊಂದಿಗೆ ಅಗ್ರಸ್ಥಾನದಲ್ಲಿದೆ.