Israel-Hamas war; ಕದನವಿರಾಮ ವಿಸ್ತರಣೆಗೆ ಚಿಂತನೆ

ಜೆರುಸಲೇಂ: ಹಮಾಸ್‌-ಇಸ್ರೇಲ್‌ ಸಂಘರ್ಷದ ಒತ್ತೆಯಾಳುಗಳ ಬಿಡುಗಡೆಯು 4ನೇ ಹಂತ ತಲುಪಿರುವಂತೆಯೇ ಉಭಯ ರಾಷ್ಟ್ರಗಳೆರಡೂ ಕದನವಿರಾಮವನ್ನು ಮತ್ತಷ್ಟು ವಿಸ್ತರಿಸುವತ್ತ ಚಿಂತನೆ ನಡೆಸಿವೆ.

ಈಜಿಪ್ಟ್, ಕತಾರ್‌, ಅಮೆರಿಕ ಸೇರಿದಂತೆ ಹಲವು ರಾಷ್ಟ್ರಗಳೂ ಕೂಡ ಕದನವಿರಾಮ ವಿಸ್ತರಣೆಗೆ ಸಲಹೆ ನೀಡಿವೆ.

ಪ್ಯಾಲೇಸ್ತೀನ್‌ ವಿದೇಶಾಂಗ ಸಚಿವ ರಯೀದ್‌-ಅಲ್‌-ಮಲ್ಕಿ ಈ ಕುರಿತು ಮಾತನಾಡಿ ಸಂಘರ್ಷದಿಂದ ಈಗಾಗಲೇ ಸಾವಿನ ಸಂಖ್ಯೆ ವಿಪರೀತವಾಗಿದೆ. ಗಾಜಾದಲ್ಲಿ ಪರಿಸ್ಥಿತಿ ಸಂಪೂರ್ಣ ಹದಗೆಟ್ಟಿದೆ. ಈ ಹಿನ್ನೆಲೆಯಲ್ಲಿ ನಾಗರಿಕರ ಸಾವು ತಡೆಗಟ್ಟಲು ಸದ್ಯಕ್ಕಿರುವ ಕದನವಿರಾಮವನ್ನು ವಿಸ್ತರಿಸುವ ಅಗತ್ಯವಿದೆ ಎಂದಿದ್ದಾರೆ.

ಇತ್ತ ಇಸ್ರೇಲ್‌ ಕೂಡ ಬಿಡುಗಡೆಯಾಗಬೇಕಿರುವ ಒತ್ತೆಯಾಳುಗಳ ಪಟ್ಟಿಯೂ ತಯಾರಾಗುತ್ತಿರುವ ಹಿನ್ನೆಲೆ ಈ ಎಲ್ಲರೂ ಸುರಕ್ಷಿತವಾಗಿ ದೇಶಕ್ಕೆ ಮರಳುವವರೆಗೆ ಕದನವಿರಾಮ ವಿಸ್ತರಿಸುವುದು ಔಚಿತ್ಯವೆಂದು ಯೋಚಿಸುತ್ತಿದೆ ಎನ್ನಲಾಗಿದೆ. ಅಮೆರಿಕ ಅಧ್ಯಕ್ಷ ಜೋ ಬೈಡನ್‌, ಜೋರ್ಡನ್‌ ವಿದೇಶಾಂಗ ಸಚಿವರು ಕೂಡ ಇದೇ ಸಲಹೆ ನೀಡಿದ್ದಾರೆ.