ಮಾ.24ರಂದು ದಾಳಿ, ತಾಕತ್ತಿದ್ದರೆ ತಡೆಯಿರಿ: ಯೋಗಿಗೆ ಐಸಿಸ್‌ ಬೆದರಿಕೆ

ವಾರಾಣಸಿ : ಇದೇ ಮಾರ್ಚ್‌ 24ರಂದು ಪೂರ್ವಾಂಚಲದಲ್ಲಿ ನಾವು ವಿನಾಶವನ್ನು ಉಂಟುಮಾಡಲಿದ್ದೇವೆ; ತಾಕತ್ತಿದ್ದರೆ ತಡೆಯಿರಿ’ ಎಂದು ಎಚ್ಚರಿಸುವ ಐಸಿಸ್‌ ಉಗ್ರ ಸಂಘಟನೆಯದ್ದೆಂದು ಹೇಳಲಾದ ಪತ್ರವೊಂದು ವಾರಾಣಸಿಯ ಮಿರ್ಜಾಮುರಾದ್‌ ನಲ್ಲಿ ಪತ್ತೆಯಾಗಿದ್ದು ನೂತನ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಅವರಿಗೆ ಈ ಮೂಲಕ ಹೊಸ ಉಗ್ರ ಸವಾಲೊಂದು ಎದುರಾಗಿದೆ.

ಐಸಿಸ್‌ ಸಹಿ ಇರುವ ಈ ಬೆದರಿಕೆ ಪತ್ರದಲ್ಲಿ  ಪಾಕಿಸ್ಥಾನ್‌ ಜಿಂದಾಬಾದ್‌ ಎಂಬ ಘೋಷಣೆಯೂ ಇದೆ.

ರಾಜ್ಯ ಪೊಲೀಸ್‌ ಇಲಾಖೆ ಮತ್ತು ಗುಪ್ತಚರ ದಳ ಈ ಪತ್ರವನ್ನು ಗಂಭೀರವಾಗಿ ಪರಿಗಣಿಸಿದೆ. ಕಾರಣ ಇದು ಪ್ರಧಾನಿ ನರೇಂದ್ರ ಮೋದಿ ಅವರು ಸಂಸದೀಯ ಕ್ಷೇತ್ರದಲ್ಲೇ ಪತ್ತೆಯಾಗಿದೆ.

ಪೊಲೀಸರು ಈ ಬಗ್ಗೆ  ಅಪರಿಚಿತ ವ್ಯಕ್ತಿಗಳ ವಿರುದ್ಧ  ಕೇಸು ದಾಖಲಿಸಿಕೊಂಡಿದ್ದು ಸ್ಥಳೀಯರನ್ನು ಪ್ರಶ್ನಿಸುತ್ತಿದ್ದಾರೆ ಎಂದು ಗ್ರಾಮಾಂತರ ಎಸ್‌ಪಿ ಆಶಿಶ್‌ ತಿವಾರಿ ದೃಢೀಕರಿಸಿದ್ದಾರೆ. 

ಈ ವರ್ಷದ ಆದಿಯಲ್ಲಿ ಪ್ರಧಾನಿ ಮೋದಿ ಹಾಗೂ ರಕ್ಷಣಾ ಸಚಿವ ಮನೋಹರ್‌ ಪರ್ರೀಕರ್‌ ಅವರನ್ನು ಕೊಲ್ಲುವ ಬೆದರಿಕೆಯ ಐಸಿಸ್‌ ಪತ್ರ ಪತ್ತೆಯಾಗಿತ್ತು. ದೇಶದಲ್ಲಿ ಗೋಹತ್ಯೆಯನ್ನು ನಿಷೇಧಿಸಲಾಗಿರುವುದಕ್ಕೆ ವ್ಯಕ್ತವಾದ ಆಕ್ರೋಶ ಅದಾಗಿತ್ತೆಂದು ತಿಳಿಯಲಾಗಿತ್ತು.