ಹೈ ಬಿಪಿ ಮಾಪನಾಂಕ ಬದಲು?

ಹೊಸದಿಲ್ಲಿ: ಸದ್ಯದಲ್ಲೇ ಮನುಷ್ಯರ ಅಧಿಕ ರಕ್ತದೊತ್ತಡದ ಗಡಿರೇಖೆಯನ್ನು ಈಗಿರುವ 140/90 ಮಾಪನಕ್ಕಿಂತ 130/80ಕ್ಕೆ ಇಳಿಸುವ ಬಗ್ಗೆ  ಭಾರತೀಯ ವೈದ್ಯರು ಒಲವು ತೋರಿದ್ದಾರೆಂದು ಹೈದರಾಬಾದ್‌ನ ಅಪೊಲೊ ಆಸ್ಪತ್ರೆಯ ಹಿರಿಯ ಸಲಹೆಗಾರ ಸಿ. ವೆಂಕಟ ಎಸ್‌. ರಾಮ್‌ ತಿಳಿಸಿದ್ದಾರೆ.   

ಸದ್ಯಕ್ಕೆ ಸಾಮಾನ್ಯ ರಕ್ತದೊತ್ತಡವನ್ನು 120/80ರಿಂದ 129/80 ಎಂದು ಪರಿಗಣಿಸ ಲಾ ಗುತ್ತದೆ. ಈ ಮೌಲ್ಯ 140/80ರಷ್ಟಿದ್ದಾಗ ಅದನ್ನು ಅಧಿಕ ರಕ್ತದೊತ್ತಡದ ಗಡಿರೇಖೆ ಎಂದು ಹೇಳಲಾಗುತ್ತದೆ. ಆದರೆ, ಇನ್ನು ಮುಂದೆ 130/80ಯ ಮಾಪನವನ್ನೇ ಅಧಿಕ ರಕ್ತದೊತ್ತಡದ ಗಡಿ ಎಂದು ಪರಿಗಣಿಸಲು ಆಲೋಚಿಸಲಾಗಿದೆ. ಈ ಬಗ್ಗೆ, ಇಂಡಿಯನ್‌ ಹಾರ್ಟ್‌ ಜರ್ನಲ್‌ ಎಂಬ ನಿಯತ ಕಾಲಿಕೆ ಯಲ್ಲಿ ಅಂಕಣವನ್ನೂ ಬರೆದಿರುವ ರಾಮ್‌, 130/80ಯನ್ನು “ಚಿಕಿತ್ಸೆ ಆರಂಭಿಸಬೇಕಾದ ಅಂಕಿಅಂಶ’ವೆಂದೇ ಪರಿಗಣಿಸಬೇಕೆಂದು ಆಗ್ರಹಿಸಿದ್ದಾರೆ. ಈ ವರೆಗೆ  130/80 ಹಾಗೂ ಅದಕ್ಕಿಂತ ಕೊಂಚ ಹೆಚ್ಚಿನ ರಕ್ತದೊತ್ತಡ ಇರುವ ಲಕ್ಷಾಂತರ ಜನರಿಗೆ “ಹೈ ಬಿಪಿ ರೋಗಿಗಳೆಂಬ’ ಎಂಬ ಹಣೆಪಟ್ಟಿ ಬೀಳಲಿದೆ.  ಈ ಬಗ್ಗೆ “ನ್ಯೂಸ್‌18′ ವರದಿ ಮಾಡಿದೆ.

ಆದರೆ, ಸದ್ಯಕ್ಕಿದು ಇನ್ನೂ ಅಮೆರಿಕ ಹಾಗೂ ಐರೋಪ್ಯ ಒಕ್ಕೂಟದ ವೈದ್ಯಕೀಯ ರಂಗಗಳಲ್ಲಿ ಮಾತ್ರ ಜಾರಿಯಾಗಿದ್ದು, ಭಾರತಕ್ಕಿನ್ನೂ ಕಾಲಿಟ್ಟಿಲ್ಲ. ಅಮೆರಿಕನ್‌ ಕಾಲೇಜ್‌ ಆಫ್ ಕಾರ್ಡಿಯಾಲಜಿ ಮತ್ತು ದ ಅಮೆರಿಕನ್‌ ಹಾರ್ಡ್‌ ಅಸೋಸಿಯೇಷನ್‌ನ ತಜ್ಞರ ಸಮಿತಿಗಳು ಈ ಬದಲಾವಣೆಗೆ ಈಗಾಗಲೇ ಸೂಚನೆ ನೀಡಿವೆ ಎಂದು ಅವರು ವಿವರಿಸಿದ್ದಾರೆ.