ರೈಲ್ವೆ ಟಿಕೆಟ್‌ ಇ-ಬುಕಿಂಗ್‌ ನಿಯಮ ಬದಲಾವಣೆ

ಹೊಸದಿಲ್ಲಿ : ಇತ್ತೀಚೆಗಷ್ಟೇ, ತತ್ಕಾಲ್‌ ಮೂಲಕ ರೈಲು ಟಿಕೆಟ್‌ ಬುಕ್‌ ಮಾಡುವ ನಿಯಮಗಳಲ್ಲಿ ಬದಲಾವಣೆ ತಂದಿರುವ ರೈಲ್ವೆ ಇಲಾಖೆ, ಇದೀಗ ಅಂತರ್ಜಾಲದ ಮೂಲಕ ರೈಲ್ವೆ ಟಿಕೆಟ್‌ ಮುಂಗಡ ಬುಕ್ಕಿಂಗ್‌ನ ನಿಯಮಾವಳಿಗಳಲ್ಲೂ ಬದಲಾವಣೆ ತಂದಿದೆ. ಮುಂಗಡ ಟಿಕೆಟ್‌ ಬುಕಿಂಗ್‌ನಲ್ಲಿ ಅಕ್ರಮಗಳೂ ಹೆಚ್ಚಾಗುತ್ತಿರುವುದರಿಂದ ಇವುಗಳಿಗೆ ತಡೆ ಹಾಕಲು ಕೇಂದ್ರ ಸರಕಾರ ಈ ನಿರ್ಧಾರ ಕೈಗೊಂಡಿದೆ. ಪ್ರಯಾಣಕ್ಕಿಂತ 120 ದಿನ ಮುಂಚೆಯೇ  ಟಿಕೆಟ್‌ ಬುಕಿಂಗ್‌ ಮಾಡಬಹುದು. ಒಂದು ಯೂಸರ್‌ ಐಡಿಯಿಂದ ಕೇವಲ ಆರು ಟಿಕೆಟ್‌ಗಳಿಗೆ ಮಾತ್ರ ಅವಕಾಶವಿರುತ್ತದೆ. ಆಧಾರ್‌ ಸಂಖ್ಯೆ ಪರಿಶೀಲನೆಗೊಳಪಟ್ಟಿರುವ ಪ್ರಯಾಣಿಕರು ತಿಂಗಳಲ್ಲಿ 12 ಟಿಕೆಟ್‌ ಬುಕ್‌ ಮಾಡಬಹುದು.

ಇ-ಬುಕಿಂಗ್‌ನ ಆರಂಭಿಕ ಸೇವಾವಧಿಯಲ್ಲಿ (ಬೆ. 8ರಿಂದ 10 ಗಂಟೆ) ಎರಡು ಟಿಕೆಟ್‌ ಮಾತ್ರ ಬುಕಿಂಗ್‌ಗೆ ಅವಕಾಶವಿರುತ್ತದೆ. ಯೂಸರ್‌ ನೇಮ್‌, ಇ ಮೇಲ್‌ ವಿಳಾಸ, ಮೊಬೈಲ್‌ ಸಂಖ್ಯೆ, ಚೆಕ್‌ ಬಾಕ್ಸ್‌ ಎಲ್ಲವೂ ಮುಗಿದ ನಂತರ ಸೆಕ್ಯುರಿಟಿ ಪ್ರಶ್ನೆಗೆ ಉತ್ತರಿಸಬೇಕು. ಆನ್‌ಲೈನ್‌ ಮುಂಗಡ ಬುಕಿಂಗ್‌ ಆರಂಭವಾದ ಮೊದಲ ಅರ್ಧಗಂಟೆಯಲ್ಲಿ ಅಧಿಕೃತ ಏಜೆಂಟರಿಗೆ ಟಿಕೆಟ್‌ ಬುಕಿಂಗ್‌ ಗೆ ಅವಕಾಶವಿರುವುದಿಲ್ಲ ಕ್ಯಾಪ್ಚಾ ತುಂಬಲು 5 ಸೆಕೆಂಡ್‌ ಮಾತ್ರ ಅವಕಾಶ. ಹಣ ಪಾವತಿಗೆ 10 ಸೆಕೆಂಡ್‌ ಕಾಲಾವಧಿಯಿದ್ದು, ಒನ್‌ ಟೈಮ್‌ ಪಾಸ್‌ವರ್ಡ್‌ ಕಡ್ಡಾಯ ಮಾಡಲಾಗಿದೆ. ತತ್ಕಾಲ್‌ ಟಿಕೆಟ್‌ಗಳನ್ನು ಪ್ರಯಾಣಕ್ಕೆ ಒಂದು ದಿನ ಮುಂಚಿತವಾಗಿ ಬುಕ್‌ ಮಾಡಬಹುದು.