ಇರಾನಿನ ಉಪ ಆರೋಗ್ಯ ಸಚಿವರಿಗೇ ಕೊರೊನಾ ಸೋಂಕು!

ಟೆಹ್ರಾನ್: ಚೀನಾ ಸಹಿತ ಜಗತ್ತಿನ ಹಲವು ದೇಶಗಳನ್ನು ಕಂಗೆಡಿಸಿರುವ ಕೋವಿಡ್ 19 ಹೆಸರಿನ ಮಾರಕ ವೈರಸ್ ಇದೀಗ ಮಧ್ಯಪ್ರಾಚ್ಯಕ್ಕೂ ಕಾಲಿಟ್ಟಿದೆ. ಇನ್ನೊಂದು ಆಘಾತಕಾರಿ ವಿಷಯವೆಂದರೆ ಇರಾನ್ ದೇಶದ ಉಪ ಆರೋಗ್ಯ ಸಚಿವರಿಗೆ ಕೊರೋನಾ ಬಾಧಿಸಿದೆ.

ಇಲ್ಲಿನ ಉಪ ಆರೋಗ್ಯ ಸಚಿವರಾಗಿರುವ ಇರಾಝ್ ಹ್ಯಾರಿರ್ಚಿ ಅವರಲ್ಲಿ ಕೊರೋನಾ ವೈರಸ್ ಪಾಸಿಟಿವ್ ಆಗಿರುವುದು ಪತ್ತೆಯಾಗಿದೆ. ಈ ವಿಷಯವನ್ನು ಆರೋಗ್ಯ ಸಚಿವರ ಮಾಧ್ಯಮ ಸಲಹೆಗಾರರು ಟ್ವೀಟ್ ಮೂಲಕ ಖಚಿತಪಡಿಸಿದ್ದಾರೆ.

ಸೋಮವಾರದಂದು ನಡೆದಿದ್ದ ಪತ್ರಿಕಾಗೋಷ್ಠಿಯೊಂದರಲ್ಲಿ ಹ್ಯಾರಿರ್ಚಿ ಅವರು ಪದೇ ಪದೇ ಕೆಮ್ಮುತ್ತಿದ್ದರು ಹಾಗೂ ಬೆವರುತ್ತಿದ್ದರು ಎಂದೂ ಸಹ ಇರಾನ್ ಸರಕಾರದ ವಕ್ತಾರ ಅಲಿ ರಬೀಯಿ ಅವರು ಮಾಹಿತಿ ನೀಡಿದ್ದಾರೆ.