ಒಮಾನ್‌ ಟ್ಯಾಂಕರ್‌ ಮೇಲಿನ ದಾಳಿ: ಅಮೆರಿಕದ ಆರೋಪ ನಿರಾಧಾರ ಎಂದ ಇರಾನ್‌

ಟೆಹರಾನ್‌ : ಗಲ್ಫ್ ಆಫ್ ಓಮಾನ್‌ ನಲ್ಲಿ ಎರಡು ಟ್ಯಾಂಕರ್‌ಗಳ ಮೇಲೆ ನಡೆದಿರುವ ವಿನಾಶಕಾರಿ ದಾಳಿಗೆ ಇರಾನ್‌ ಕಾರಣವೆಂದು ಅಮೆರಿಕ ಮಾಡಿರುವ ಆರೋಪವನ್ನು ತಳ್ಳಿ ಹಾಕಿರುವ ಟೆಹರಾನ್‌, ಈ ರೀತಿಯ ಆರೋಪಗಳು ನಿರಾಧಾರಾರ ಮತ್ತು ಅನಪೇಕ್ಷಿತ ಎಂದು ಹೇಳಿದೆ.

ಅಮೆರಿಕದ ವಿದೇಶ ಸಚಿವ ಮೈಕ್‌ ಪಾಂಪಿಯೋ ಮಾಡಿರುವ “ನಿರಾಧಾರ ಆರೋಪ” ಗಳಿಗೆ ಪ್ರತಿಕ್ರಿಯಿಸಿರುವ ಇರಾನ್‌ ವಿದೇಶ ಸಚಿವಾಲಯ ವಕ್ತಾರ ಅಬ್ಟಾಸ್‌ ಮೌಸವಿ “ನಿಜಕ್ಕಾದರೆ ಇರಾನ್‌ ಸಂಕಷ್ಟದಲ್ಲಿದ್ದ ಒಮಾನ್‌ ನ ಟ್ಯಾಂಕರ್‌ಗಳನ್ನು ಮತ್ತು ಅದರ ಚಾಲಕ ಸಿಬಂದಿಗಳನ್ನು ಎಷ್ಟು ಸಾಧ್ಯವೋ ಅಷ್ಟು ಬೇಗ ಅಪಾಯದಿಂದ ಪಾರು ಮಾಡಿದೆ ಎಂದು ಹೇಳಿದ್ದಾರೆ. ಅವರ ಈ ಹೇಳಿಕೆಯನ್ನು ಟೆಲಿಗ್ರಾಂ ಚ್ಯಾನಲ್‌ ಪ್ರಕಟಿಸಿದೆ.