ಮುಂಬಯಿ: ಈ ಬಾರಿಯ ಐಪಿಎಲ್‌ನಲ್ಲಿ ಅತ್ಯಂತ ನೋವಿನಲ್ಲಿರುವವರ ಸಾಲು ಬಹಳ ದೊಡ್ಡದು. ಇದರಲ್ಲಿ ಮುಂದಿರುವವರು ಮುಂಬೈ ಇಂಡಿಯನ್ಸ್‌ ತಂಡದ ನಾಯಕ ರೋಹಿತ್ ಶರ್ಮ.
ತಂಡಕ್ಕೆ ಅತ್ಯಧಿಕ 5 ಐಪಿಎಲ್‌ ಟ್ರೋಫಿಗಳನ್ನು ತಂದಿತ್ತ ರೋಹಿತ್‌ಗೆ ಈ ಬಾರಿ ಅದೃಷ್ಟ ಸಂಪೂರ್ಣ ಕೈಕೊಟ್ಟಿದೆ. ಸತತ 8 ಪಂದ್ಯಗಳನ್ನು ಸೋಲುವ ಮೂಲಕ ಮುಂಬೈ ಕೂಟದಿಂದ ನಿರ್ಗಮಿಸಿದೆ.
ರವಿವಾರ ರಾತ್ರಿ ಲಕ್ನೋ ವಿರುದ್ಧ ಗೆಲ್ಲುವ ಅವಕಾಶವಿದ್ದರೂ ತಂಡದ ಬ್ಯಾಟರ್‌ಗಳು ಕೈಕೊಟ್ಟಿದ್ದರಿಂದ ಮುಂಬೈ ಸೋಲನ್ನೇ ಅಪ್ಪಿಕೊಳ್ಳಬೇಕಾಯಿತು. ಈ ಆಘಾತದ ಬಳಿಕ ರೋಹಿತ್ ಶರ್ಮ ಮುಂಬೈ ತಂಡದ ಅಭಿಮಾನಿಗಳನ್ನು ಸಮಾಧಾನಗೊಳಿಸುವ ಕೆಲಸ ಮಾಡಿದ್ದಾರೆ.
ಇದನ್ನೂ ಓದಿ:ಸಾರ್ವಜನಿಕ ಸ್ಥಳಗಳಲ್ಲಿ ಉಗುಳಿದರೂ ಬೀಳುತ್ತೆ ದಂಡ: ಸರಕಾರದಿಂದ ಹೊಸ ಕೋವಿಡ್ ಮಾರ್ಗಸೂಚಿ
“ಈ ಬಾರಿ ನಮ್ಮ ಸಾಧನೆ ಉನ್ನತ ಮಟ್ಟದಲ್ಲಿರಲಿಲ್ಲ. ನಾವು ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫ‌ಲರಾದೆವು. ನಮ್ಮ ಪಾಲಿಗೆ ಇದು ಕೆಟ್ಟ ಕಾಲ. ಮುಂದೆ ಇದು ಸರಿದು ಹೋಗಲಿದೆ. ಆದರೆ ಈ ಬಾರಿಯ ವೈಫ‌ಲ್ಯಕ್ಕೆ ವಿಷಾದವಿದೆ. ಆದರೆ ನಾನು ಈ ತಂಡವನ್ನು ತುಂಬ ಪ್ರೀತಿಸುತ್ತೇನೆ. ನಮ್ಮ ತಂಡದ ಮೇಲೆ ಅಚಲವಾದ ನಂಬಿಕೆ ಇರಿಸಿದವರೆಗೆ, ನಿಷ್ಠೆ ತೋರಿದವರಿಗೆ, ತಂಡದ ಹಿತೈಷಿಗಳನ್ನೆಲ್ಲ ಈ ಸಂದರ್ಭದಲ್ಲಿ ಪ್ರಶಂಸಿಸಬಯಸುತ್ತೇನೆ’ ಎಂದು ರೋಹಿತ್ ಶರ್ಮ ಬರೆದುಕೊಂಡಿದ್ದಾರೆ.
ರೋಹಿತ್ ಶರ್ಮ ಅವರ ಈ ಕ್ರೀಡಾಸ್ಫೂರ್ತಿ ಮತ್ತು ತಂಡ ಪ್ರೀತಿಗೆ ಅಭಿಮಾನಿಗಳು ಭಾರೀ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಮುಂದಿನ ವರ್ಷ ಭರ್ಜರಿಯಾಗಿ ಕಮ್‌ಬ್ಯಾಕ್‌ ಮಾಡೋಣ ಎಂದು ಹುರಿದುಂಬಿಸಿದ್ದಾರೆ.
