ಬಿ.ವೋಕ್‌ ಕೋರ್ಸ್‌ಗೆ ಪ್ರಸ್ತಾವನೆ ಆಹ್ವಾನ

ಬೆಂಗಳೂರು: ವಿಶ್ವವಿದ್ಯಾಲಯ ಅನುದಾನ ಆಯೋಗದಿಂದ 12ಬಿ ಮಾನ್ಯತೆ ಪಡೆದಿರುವ ರಾಜ್ಯದ ಪದವಿ ಕಾಲೇಜುಗಳಿಂದ ಬಿ.ವೋಕ್‌(ಬ್ಯಾಚುಲರ್‌ ಆಫ್ ಒಕೇಷನ್‌) ಕೋರ್ಸ್‌ ಆರಂಭಿಸಲು ಕಾಲೇಜು ಶಿಕ್ಷಣ ಇಲಾಖೆ ಪ್ರಸ್ತಾವನೆ ಆಹ್ವಾನಿಸಿದೆ.

ಬಿ.ವೋಕ್‌ ವೃತ್ತಿ ಶಿಕ್ಷಣ ನೀಡುವ ಕೋರ್ಸ್‌ ಆಗಿದ್ದು, ಶಿಕ್ಷಣದ ಜತೆಗೆ ಉದ್ಯೋಗಾವಕಾಶಗಳನ್ನು ಈ ಕೋರ್ಸ್‌ ಮೂಲಕ ಒದಗಿಸಿಕೊಡಲಾಗುತ್ತದೆ. ಬಿ.ವೋಕ್‌ ಕೋರ್ಸ್‌ ತೆರೆಯಲು ಯುಜಿಸಿ 12ಬಿ ಮಾನ್ಯತೆ ನೀಡುತ್ತದೆ. ಈ ಮಾನ್ಯತೆ ಪಡೆದ ರಾಜ್ಯದ ಪದವಿ ಕಾಲೇಜುಗಳು ಜುಲೈ 1ರೊಳಗೆ ಪ್ರಸ್ತಾವನೆ ಸಲ್ಲಿಸಬೇಕು ಎಂದು ಪ್ರಕಟಣೆ ತಿಳಿಸಿದೆ.

ರಾಜ್ಯದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ವಿದ್ಯಾರ್ಥಿಗಳ ಹಿತದೃಷ್ಟಿಯಿಂದ ಕಡ್ಡಾಯವಾಗಿ ಬಿ.ವೋಕ್‌ ಕೋರ್ಸ್‌ ತೆರೆಯಲು ಸರ್ಕಾರ ಸೂಚನೆ ನೀಡಿದೆ. ಹೀಗಾಗಿ ಯುಜಿಸಿ 12ಬಿ ಮಾನ್ಯತೆ ಪಡೆದಿರುವ 159 ಕಾಲೇಜುಗಳು ಕಡ್ಡಾಯವಾಗಿ ಪ್ರಸ್ತಾವನೆ ಸಲ್ಲಿಸಬೇಕು.

ಇದಕ್ಕಾಗಿ ಪ್ರಾಂಶುಪಾಲರಿಗೆ ಮಾಹಿತಿ ಶಿಬಿರ ಹಮ್ಮಿಕೊಳ್ಳಲಾಗಿದೆ. ಯುಜಿಸಿಗೆ ಆನ್‌ಲೈನ್‌ ಮೂಲಕ ದಾಖಲೆ ನೀಡಬೇಕಿರುವುದರಿಂದ ಕಾಲೇಜಿನ ಪರಿಚಯಾತ್ಮಕ ಮಾಹಿತಿ ಅಗತ್ಯವಿದೆ ಎಂದು ಇಲಾಖೆ ಸೂಚಿಸಿದೆ.