ಅಂ.ರಾ.ಶೂಟಿಂಗ್‌ ಒಕ್ಕೂಟಕ್ಕೆ ರಣೀಂದರ್‌ ಉಪಾಧ್ಯಕ್ಷರಾಗಿ ಆಯ್ಕೆ

ನವದೆಹಲಿ: ಅಂತಾರಾಷ್ಟ್ರೀಯ ಶೂಟಿಂಗ್‌ ಒಕ್ಕೂಟಕ್ಕೆ ರಣೀಂದರ್‌ ಸಿಂಗ್‌ ಉಪಾಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ.
ನಾಲ್ವರು ಉಪಾಧ್ಯಕ್ಷರ ಸಮಿತಿಯಲ್ಲಿ ಇವರು ಕೂಡ ಒಬ್ಬರಾಗಿದ್ದಾರೆ. ಇದೇ ಮೊದಲ ಸಲ ಪ್ರತಿಷ್ಠಿತ ಹುದ್ಧೆಯನ್ನು ಭಾರತೀಯರೊಬ್ಬರು ಅಲಂಕರಿಸಿದ್ದಾರೆ ಎನ್ನುವುದು ವಿಶೇಷ. 

ಪ್ರಸ್ತುತ ರಣೀಂದರ್‌ ಸಿಂಗ್‌ ಭಾರತೀಯ ರೈಫ‌ಲ್‌ ಸಂಸ್ಥೆ ಮುಖ್ಯಸ್ಥರಾಗಿದ್ದಾರೆ. ಕಳೆದ ವರ್ಷವಷ್ಟೇ ಅವರು ಭಾರತೀಯ ರೈಫ‌ಲ್‌ ಸಂಸ್ಥೆಗೆ ಮುಖ್ಯಸ್ಥರಾಗಿ ಪುನರಾಯ್ಕೆಯಾಗಿದ್ದರು. ಮಾಜಿ ಶೂಟರ್‌ ಆಗಿರುವ ರಣೀಂದರ್‌ ಒಟ್ಟು 161 ಮತ ಪಡೆದು ಹುದ್ಧೆಗೆ ಆಯ್ಕೆಯಾಗಿರುವರು. 

ಐರೆಲಂಡ್‌ನ‌ ಕೆವಿನ್‌ ಕಿಲ್ಟಿ (162), ಅಮೆರಿಕದ ರಾಬರ್ಟ್‌ ಮೈಕೆಲ್‌ (153) ಹಾಗೂ ರಿಪಬ್ಲಿಕ್‌ ಚೀನಾದ ವಾಂಗ್‌ ಯಿಫ‌ೂ (146) ಮತಗಳನ್ನು ಕ್ರಮವಾಗಿ ಪಡೆದುಕೊಂಡರು. 2014ರಲ್ಲಿ ಮ್ಯೂನಿಚ್‌ನಲ್ಲಿ ನಡೆದ ಸಾಮಾನ್ಯ ಸಭೆಯಲ್ಲಿ ರಣೀಂದರ್‌ 22 ಮತಗಳನ್ನು ಪಡೆದು ಮೊದಲ ಸಲ ಜಾಗತಿಕ ಮಟ್ಟದಲ್ಲಿ ಭಾರತ ಅಧಿಕಾರಿಯೊಬ್ಬರು ಸದಸ್ಯತ್ವ ಪಡೆದುಕೊಂಡಿದ್ದನ್ನು ಸ್ಮರಿಸಬಹುದು.