INDvsNZ: ಭಾರತಕ್ಕೆ ಬೃಹತ್‌ ಗುರಿ ನೀಡಿದ ಕಿವೀಸ್; ಸ್ಪಿನ್‌ ಜಾಲದಲ್ಲಿ ಗೆಲ್ಲುತ್ತಾ ಭಾರತ

ಪುಣೆ: ಸರಣಿ ಸೋಲಿನ ಸಂಕಷ್ಟಕ್ಕೆ ಸಿಲುಕಿರುವ ಭಾರತವು ಸರಣಿ ಜೀವಂತವಾಗಿರಿಸಿಕೊಳ್ಳಲು ಪುಣೆ ಪಂದ್ಯದಲ್ಲಿ ಹರಸಾಹಸ ಪಡುತ್ತಿದೆ. ನ್ಯೂಜಿಲ್ಯಾಂಡ್‌ ತಂಡವು ಎರಡನೇ ಇನ್ನಿಂಗ್ಸ್‌ ನಲ್ಲಿ 255 ರನ್‌ ಗಳಿಗೆ ಆಲೌಟಾಗಿದೆ. ಪುಣೆ ಪಂದ್ಯ ಗೆಲ್ಲಲು ಭಾರತಕ್ಕೆ 359 ರನ್‌ ಗುರಿ ನೀಡಿದೆ.

ಎರಡನೇ ದಿನದಾಟದ ಅಂತ್ಯಕ್ಕೆ 198 ರನ್‌ ಗೆ ಐದು ವಿಕೆಟ್‌ ಕಳೆದುಕೊಂಡಿದ್ದ ಕಿವೀಸ್‌ ಇಂದು ಆರಂಭದಲ್ಲಿ ಸತತ ವಿಕೆಟ್‌ ಕಳೆದುಕೊಂಡಿತು. ಆದರೆ ಬಿರುಸಿನ ಬ್ಯಾಟಿಂಗ್‌ ನಡೆಸಿದ ಗ್ಲೆನ್‌ ಫಿಲಿಪ್ಸ್‌ ಸಿಕ್ಸರ್‌ ಬೌಂಡರಿ ಆಟವಾಡಿ 48 ರನ್‌ ಗಳಿಸಿ ಕಿವೀಸ್‌ ತಂಡದ ಮೊತ್ತವನ್ನು 255ಕ್ಕೆ ಏರಿಸಿದರು. ಟಾಮ್‌ ಬ್ಲಂಡೆಲ್‌ 41 ರನ್‌ ಗಳಿಸಿದರು. ಎರಡನೇ ದಿನದಾಟದಲ್ಲಿ ನಾಯಕ ಟಾಮ್‌ ಲ್ಯಾಥಂ 86 ರನ್‌ ಮಾಡಿದ್ದರು.

ಮೊದಲ ಇನ್ನಿಂಗ್ಸ್‌ ನಲ್ಲಿ ಏಳು ವಿಕೆಟ್‌ ಪಡೆದಿದ್ದ ವಾಷಿಂಗ್ಟನ್‌ ಸುಂದರ್‌ ಮತ್ತೆ ನಾಲ್ಕು ವಿಕೆಟ್‌ ಕಿತ್ತರೆ, ಜಡೇಜಾ ಮೂರು ಮತ್ತು ಅಶ್ವಿನ್‌ ಎರಡು ವಿಕೆಟ್‌ ಪಡೆದರು.

ಸರಣಿ ಉಳಿಸಿಕೊಳ್ಳಬೇಕಾದರೆ ಭಾರತವು 359 ರನ್‌ ಗಳಿಸಿಲೇಬೇಕಾದ ಒತ್ತಡದಲ್ಲಿದೆ. ಸ್ಪಿನ್‌ ಟ್ರ್ಯಾಕ್‌ ನಲ್ಲಿ ಮೊದಲ ಇನ್ನಿಂಗ್ಸ್‌ ನಲ್ಲಿ ಪರದಾಡಿದ್ದ ರೋಹಿತ್‌ ಹುಡುಗರಿಗೆ ಅಗ್ನಿ ಪರೀಕ್ಷೆ ಎದುರಾಗಿದೆ.

ಚೊಚ್ಚಲ ಟೆಸ್ಟ್‌ ಸರಣಿ ಜಯದತ್ತ ಕಿವೀಸ್‌

ನ್ಯೂಜಿಲೆಂಡ್‌ 1955-56ರಲ್ಲಿ ಭಾರತದಲ್ಲಿ ಆಡಲಾರಂಭಿಸಿದ ಬಳಿಕ ಟೆಸ್ಟ್‌ ಸರಣಿ ಜಯಿಸಿದ್ದಿಲ್ಲ. ಇದೇ ಮೊದಲ ಬಾರಿಗೆ ಸರಣಿ ಜಯಿಸುವ ಸನಿಹ ತಲುಪಿದೆ. ವಿಶೇಷವೆಂದರೆ ಇದುವರೆಗೆ ಕಿವೀಸ್‌ ಕೇವಲ 3 ಬಾರಿ ಭಾರತದಲ್ಲಿ ಟೆಸ್ಟ್‌ ಪಂದ್ಯಗಳನ್ನು ಗೆದ್ದಿದೆ.

ಸತತ 18 ಸರಣಿ ಜಯದ ಓಟ ಅಂತ್ಯ?

ಭಾರತ ತವರಲ್ಲಿ ಕೊನೆಯ ಸಲ ಸರಣಿ ಕಳೆದುಕೊಂಡದ್ದು 2012-13ರಲ್ಲಿ, ಇಂಗ್ಲೆಂಡ್‌ ವಿರುದ್ಧ ಸೋತಿತ್ತು. ಅನಂತರ ತವರಿನಲ್ಲಿ ಸತತ 18 ಸರಣಿಗಳಲ್ಲಿ ಗೆದ್ದು ಅಜೇಯ ದಾಖಲೆ ಕಾಯ್ದುಕೊಂಡು ಬಂದಿದೆ. ಈಗ ಆ ಅಜೇಯ ಓಟ ಅಂತ್ಯವಾಗುವ ಸುಳಿವು ಸಿಕ್ಕಿದೆ