ಇಂದ್ರಾಣಿ ಮುಖರ್ಜಿ: ಹಠಾತ್‌ ಹದಗೆಟ್ಟ ಆರೋಗ್ಯ, ಜೆಜೆ ಆಸ್ಪತ್ರೆಗೆ

ಮುಂಬಯಿ : ಭಾರೀ ಕುತೂಹಲ ಕೆರಳಿಸಿದ್ದ ಮತ್ತು ಅಷ್ಟೇ ನಿಗೂಢತೆಯಿಂದ ತುಂಬಿದ್ದ ಶೀನಾ ಬೋರಾ ಮರ್ಡರ್‌ ಕೇಸಿನ ಪ್ರಮುಖ ಆರೋಪಿಯಾಗಿರುವ ಇಂದ್ರಾಣಿ ಮುಖರ್ಜಿ ಅವರ ಆರೋಗ್ಯ ಹಠಾತ್‌ ಹದಗೆಟ್ಟ ಕಾರಣ ಆಕೆಯನ್ನು ನಿನ್ನೆ  ಶುಕ್ರವಾರ ತಡರಾತ್ರಿ ಬೈಕುಲಾ ಜೈಲಿನಿಂದ ಜೆಜೆ ಆಸ್ಪತ್ರೆಗೆ ಸೇರಿಸಲಾಯಿತು. 

ಇಂದ್ರಾಣಿ ಮುಖರ್ಜಿ ಅವರು ಸೇವಿಸುವ ಔಷಧಿಯ ಓವರ್‌ ಡೋಸ್‌ ನೀಡಲಾದ ಕಾರಣ ಆಕೆಯ ಆರೋಗ್ಯ ಹದಗೆಟ್ಟಿರಬಹುದೆಂದು ಶಂಕಿಸಲಾಗಿದೆ. 

ಇಂದ್ರಾಣಿ ಅವರ ಹದಗೆಟ್ಟ ಆರೋಗ್ಯದ ಬಗ್ಗೆ ವೈದ್ಯಾಧಿಕಾರಿಗಳಾಗಲೀ ಜೈಲು ಅಧಿಕಾರಿಗಳಾಗಲೀ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ. ಈ ಹಿಂದೆಯೂ ಒಮ್ಮೆ ಔಷಧದ ಓವರ್‌ ಡೋಸ್‌ ಸೇವನೆಯಿಂದ ಇಂದ್ರಾಣಿ ಆರೋಗ್ಯ ಹದಗೆಟ್ಟು ಆಕೆಯನ್ನು ಆಸ್ಪತ್ರೆಗೆ ಸೇರಿಸಲಾಗಿತ್ತು. 

ಮೂಲಗಳ ಪ್ರಕಾರ ಇಂದ್ರಾಣಿ ಮುಖರ್ಜಿಯನ್ನು ಐಸಿಯು ನಲ್ಲಿ ಇರಿಸಲಾಗಿದ್ದು ಆಕೆಯ ಆರೋಗ್ಯದ ಮೇಲೆ ತೀವ್ರ ನಿಗಾ ಇಡಲಾಗಿದೆ ಎಂದು ತಿಳಿದು ಬಂದಿದೆ.