ಹೊಸದಿಲ್ಲಿ : ಕಡಿಮೆ ವೆಚ್ಚದ ವಿಮಾನಯಾನಕ್ಕೆ ಹೆಸರಾಗಿರುವ ಇಂಡಿಗೋ ಏರ್‌ ಲೈನ್ಸ್‌ ಸಂಸ್ಥೆ ತನ್ನ 11ನೇ ವಾರ್ಷಿಕೋತ್ಸವದ ಪ್ರಯುಕ್ತ ಕೇವಲ 1,111 ರೂ.ಗಳಿಂದ ತೊಡಗುವ ವಿಮಾನ ಯಾನ ವೆಚ್ಚದ ವಿಶೇಷ ಕೊಡುಗೆಯನ್ನು ಸಾದರಪಡಿಸಿದೆ.
ಆಗಸ್ಟ್‌ 2ರಿಂದ ಆರಂಭಗೊಂಡಿರುವ ಈ ಕೊಡುಗೆಯು ಇದೇ ಭಾನುವಾರ ಆಗಸ್ಟ್‌ 6ರ ವರೆಗೆ ಚಾಲ್ತಿಯಲ್ಲಿರುತ್ತದೆ. ಈ ಐದು ದಿನಗಳ ವಿಶೇಷ ಮಾರಾಟದ ವೇಳೆ ಖರೀದಿಸಲಾಗುವ ವಿಮಾನ ಯಾನದ ಟಿಕೆಟುಗಳನ್ನು ಆಗಸ್ಟ್‌ 21ರಿಂದ ಮುಂದಿನ ವರ್ಷ ಮಾಚ್‌ರ 24ರ ವರೆಗಿನ ಅವಧಿಯಲ್ಲಿ ಬಳಸಬಹುದಾಗಿರುತ್ತದೆ.
ಈ ವಿಶೇಷ ಕೊಡುಗೆ ಯೋಜನೆಯಡಿ ಶ್ರೀನಗರ – ದಿಲ್ಲಿ ವಿಮಾನ ಪ್ರಯಾಣದ ದರ ರೂ. 1,611. ದಿಲ್ಲಿ – ಉದಯಪುರ ರೂ.1,411, ದಿಲ್ಲಿ ಮುಂಬಯಿ ರೂ.1,911, ಮುಂಬಯಿ – ಮಸ್ಕತ್‌ ರೂ. 5,711 ಮತ್ತು ಮುಂಬಯಿ – ದೋಹಾ ರೂ. 7,011.
ಈ ಕೊಡುಗೆಯು ಮೊದಲು ಬಂದವರಿಗೆ ಮೊದಲು ಎಂಬ ನೆಲೆಯಲ್ಲಿ ಇರುತ್ತದೆ; ಆದರೆ ಹಣ ಮರುಪಾವತಿ ಇರುವುದಿಲ್ಲ ಎಂದು ಏರ್‌ ಲೈನ್ಸ್‌ ಪ್ರಕಟನೆ ತಿಳಿಸಿದೆ.
ಈ ವಿಶೇಷ ಕೊಡುಗೆಯು ಆಯ್ದ ನಾನ್‌ ಸ್ಟಾಪ್‌ ಹಾರಾಟಗಳಾಗಿರುವ ಅಗರ್ತಲ, ಅಹ್ಮದಾಬಾದ್‌, ಅಮೃತ್‌ಸರ, ಬಾಗ್‌ದೋರಾ, ಬ್ಯಾಂಕಾಕ್‌, ಬೆಂಗಳೂರು, ಭುವನೇಶ್ವರ, ಚಂಡೀಗಢ, ಚೆನ್ನೈ, ಕೊಯಮುತ್ತೂರು, ಡೆಹರಾಡೂನ್‌, ದಿಲ್ಲಿ, ದೀಬ್ರೂಗಢ, ದೀಮಾಪುರ,ದೋಹಾ, ದುಬೈ, ಗೋವಾ, ಗುವಾಹಟಿ, ಹೈದರಾಬಾದ್‌, ಇಂಫಾಲ, ಇಂದೋರ್‌, ಜೈಪುರ, ಜಮ್ಮು, ಕೊಚ್ಚಿ, ಕೋಲ್ಕತ, ಕೋಯಿಕ್ಕೋಡ್‌, ಲಕ್ನೋ, ಮಧುರೆ, ಮಂಗಳೂರು, ಮುಂಬಯಿ, ಮಸ್ಕತ್‌, ನಾಗ್ಪುರ, ಪಟ್ನಾ, ಪೋರ್ಟ್‌ ಬ್ಲೇರ್‌, ಪುಣೆ, ರಾಯ್‌ಪುರ,ರಾಂಚಿ, ಶಾರ್ಜಾ, ಸಿಂಗಾಪುರ, ಶ್ರೀನಗರ, ತಿರುವನಂತಪುರ, ಉದಯ್‌ಪುರ, ವಡೋದರ, ವಾರಾಣಸಿ ಮತ್ತು ವಿಶಾಖಪಟ್ಟಣಕ್ಕೆ ಮಾತ್ರವೇ ಅನ್ವಯಿಸುತ್ತದೆ.
